ኀበ ጢሞቴዎስ 1 1

ምዕራፍ 1

1 # ቈላ. 1፥27፤ ቲቶ 1፥3። እምጳውሎስ ሐዋርያሁ ለእግዚእነ ኢየሱስ ክርስቶስ በትእዛዘ እግዚአብሔር መድኀኒነ ወኢየሱስ ክርስቶስ ተስፋነ። 2#ግብረ ሐዋ. 16፥1፤ ቲቶ 1፥9። ለጢሞቴዎስ ወልድየ ዘአፈቅር በሃይማኖት ሰላም ለከ ወሣህል ወጸጋሁ ለእግዚአብሔር አቡነ ወእግዚእነ ኢየሱስ ክርስቶስ። 3#ግብረ ሐዋ. 20፥1። እስመ አስተብቋዕኩከ ትንበር ኤፌሶን አመ አሐውር መቄዶንያ ከመ ትገሥጾሙ ከመ ኢያምጽኡ ካልአ ትምህርተ። 4#4፥6። ወኢያምጽኡ መኀድምተ ወዛውዐ ነገር ዘይፈጥሩ በዘያስሕቱ ወያመጽኡ ተኀሥሦ ወየኀድጉ ሕገ እግዚአብሔር ዘበሃይማኖት። 5#ሮሜ 12፥9-10። ወማኅለቅቱሰ ለትእዛዝ ተፋቅሮ በንጹሕ ልብ ወበሠናይ ግዕዝ ወሃይማኖት ዘአልቦ ኑፋቄ። 6#6፥20። እስመ ቦ እለ አውከኩ ወገብኡ ውስተ ነገረ ከንቱ። 7#ዮሐ. 3፥10፤ 6፥4-20። ወእንዘ ይፈቅዱ መምህራነ ይኩኑ ኢየአምሩ ዘለሊሆሙ ይነብቡ።

በእንተ ሕግ

8 # ሮሜ 7፥12። ነአምር ከመ ሠናይ ውእቱ ኦሪት ለዘይገብሮ በሕጉ። 9#ገላ. 3፥19። ወነአምር ዘኒ ከመ አኮ ለጻድቃን ዘይሠራዕ ሕግ ዘእንበለ ለኃጥኣን ወለጽልሕዋን ወለዝሉፋን ወለውፁኣን እምጽድቅ ወለርኩሳነ ልብ ወቀተልተ አበዊሆሙ ወእሞሙ#ቦ ዘኢይጽሕፍ «ወቀተልተ አበዊሆሙ ወእሞሙ» ወቀተልተ አዝማዲሆሙ ወቀተልተ ነፍስ። 10#ዘፀ. 21፥16፤ 6፥8። ዘማውያን ወእለ የሐውሩ ኀበ ብእሲተ ብእሲ ሰረቅተ ሰብእ ሐሳውያን ወእለ ይምሕሉ በሐሰት። 11#6፥15። ወቦ ባዕድኒ ዓዲ በዘይትቃወምዋ ለትምህርተ ሕይወት ዘወንጌለ ስብሐቲሁ ለብፁዕ እግዚአብሔር ዘአነ ተአመንኩ ቦቱ።

አኰቴት በእንተ ጽዋዔሁ

12 # ግብረ ሐዋ. 9፥15፤ ገላ. 1፥15። አአኵቶ ለዘተአመነኒ ወአጽንዐኒ በክርስቶስ ኢየሱስ እግዚእነ እስመ ምእመነ ረሰየኒ ለመልእክቱ። 13#ግብረ ሐዋ. 9፥1። እንዘ ቀዲሙ ፀራፊ አነ ወሰዳዲ ወጸኣሊ ወባሕቱ ተሣሀለኒ እስመ በኢያእምሮ ገበርኩ በኢአሚን። 14ወፈድፈደ ጸጋሁ ለእግዚአብሔር በላዕሌየ ወሃይማኖቱ ወፍቅሩ ለኢየሱስ ክርስቶስ እግዚእነ። 15#ማቴ. 18፥11፤ ሮሜ 5፥8። እሙን ነገሩ ወርቱዕ ይትወከፍዎ በኵሉ እስመ ኢየሱስ ክርስቶስ መጽአ ውስተ ዓለም ከመ ያድኅኖሙ ለኃጥኣን ዘአነ ቀዳሚሆሙ። 16ወባሕቱ ተሣሀለኒ ከመ ያርኢ ተአምራቲሁ በላዕሌየ ኢየሱስ ክርስቶስ በብዝኀ ትዕግሥቱ ወእኩኖሙ አርኣያ ለእለ የአምኑ ቦቱ ለሕይወት ዘለዓለም። 17#ዳን. 7፥14። ንጉሥ ዘለዓለም ዘኢይመውት ወኢያስተርኢ አምላክ ባሕቲቱ ዘሎቱ ክብር ወስብሐት ለዓለመ ዓለም አሜን። 18#6፥12። ዘንተ ትእዛዘ አማሕፀንኩከ ኦ ወልድየ ጢሞቴዎስ በከመ ተነብዮ ዘላዕሌከ ከመ ትጽናዕ በኵሉ ገድል ሠናይ። 19#3፥9። እንዘ ብከ ሃይማኖት ወሠናይ ግዕዝ እስመ ሀለዉ እለ አውከኩ እምሃይማኖት ወተሰብሩሂ። 20#መዝ. 109፥6፤ 2ጢሞ. 2፥16። እለ ሄሜኔዎስ ወእለ እስክንድሮስ እለ መጠውክዎሙ ለሰይጣን ይትኰነኑ ኢይልመዱ ፀሪፈ።

Currently Selected:

ኀበ ጢሞቴዎስ 1 1: ሐኪግ

Highlight

Copy