ኀበ ሰብአ ተሰሎንቄ 1 2

ምዕራፍ 2

ዘከመ መሀረ ወንጌለ ቅዱስ ጳውሎስ በተሰሎንቄ

1 # 1፥5-9። ለሊክሙ ተአምሩ አኀዊነ ዘከመ ገበርነ ለክሙ ወኢኮነ በከንቱ በዊኦትነ ኀቤክሙ። 2#ግብረ ሐዋ. 14፥22፤ 16፥22። ዳእሙ ሐመምነ ወተጽእልነ ዘከመ ተአምሩ በፊልጵስዩስ ወአሜሃ ነገርናክሙ በብዙኅ ጻማ ትምህርተ ክርስቶስ በሞገሱ ለአምላክነ። 3እስመ ኢኮነ ትምህርትነ ዘስሒት ወኢ ዘርኵስ ወኢኮነ ዘጽልሑት። 4#1ጢሞ. 1፥11፤ ገላ. 1፥10። ዳእሙ በዘአመከረነ እግዚአብሔር ወተአመነነ በትምህርተ ወንጌሉ ከማሁ ንነግር ወአኮ ከመ ዘለሰብእ ያደሉ ዘእንበለ ለእግዚአብሔር ዘአመከረነ ልበነ። 5ወእምአመ ኮነ ኢየዋህናክሙ በቃል በከመ ተአምሩ ወኢተዐገልናክሙ በምክንያት ስምዕነ እግዚአብሔር በዝንቱ። 6#ዮሐ. 5፥41-44፤ ግብረ ሐዋ. 20፥33። ወኢንፈቅድ ያድሉ ለነ ሰብእ ኢአንትሙ ወኢባዕድ እንዘ ንክል አክብዶ ከመ ሐዋርያተ ክርስቶስ። 7ዳእሙ ኮነ ከመ ሕፃናት በማእከሌክሙ ወከመ ሐፃኒት እንተ ተሐዝል ደቂቃ። 8ከማሁ ንሕነኒ ናፈቅረክሙ ወንጽሕቅ ለክሙ ከመ ንመጡክሙ ወአኮ ባሕቲቶ ወንጌለ እግዚአብሔር ዓዲ ነፍሰነሂ እስመ ፍቁራነ ኮንክሙነ። 9#1ቆሮ. 4፥12። ወተዘከሩ አኀዊነ ጻማነ ወስራሐነ መዓልተ ወሌሊተ ኮነ ንትጌበር ከመ ኢናክብድ ላዕለ አሐዱሂ እምውስቴትክሙ። 10ወለሊክሙ ሰማዕትነ ወእግዚአብሔር ዘከመ ሰበክነ ለክሙ ትምህርተ ወንጌሉ ለእግዚአብሔር በጽድቅ ወበርትዕ ወበንጽሕ በኀበ ኵሎሙ እለ የአምኑ። 11ዘከመ ተአምሩ ለለ አሐዱ አሐዱ እምውስቴትክሙ ከመ አብ ለወልዱ ናስተበቍዐክሙ ወንናዝዘክሙ። 12#ኤፌ. 4፥1፤ ፊልጵ. 1፥27። ወናሰምዕ ለክሙ ከመ ትሑሩ ወትሩጹ በዘይደልወክሙ ለኀበ እግዚአብሔር ዘጸውዐክሙ ውስተ መንግሥተ ስብሐቲሁ።

በእንተ አኰቴተ እግዚአብሔር

13 # 1፥5፤ ገላ. 1፥11። በእንተዝ ንሕነሂ ዘልፈ ነአኵቶ ለእግዚአብሔር እስመ ተወከፍክሙ ቃለ ትእዛዙ ለእግዚአብሔር ወአኮ ቃለ ዜና ሰብእ አላ አማን ከማሁ ቃለ እግዚአብሔር ወይረድአክሙሂ በገቢር ለእለ ተአመንክሙ። 14ወአንትሙ አኀዊነ ተመሰልክሙ በቤተ ክርስቲያኑ ለእግዚአብሔር እለ በይሁዳ ምእመናን በኢየሱስ ክርስቶስ እስመ ሐመምክሙ አንትሙሂ እምሕዝብክሙ በከመ ሐሙ እሙንቱሂ እምአይሁድ። 15#ግብረ ሐዋ. 2፥22። እለ ቀተልዎ ለእግዚእነ ኢየሱስ ክርስቶስ ወለነቢያትሂ እለ እምውስቴቶሙ ሰደድዎሙ ወኪያነሂ ወኢያሠምርዎ ለእግዚአብሔር ወይትቃረኑ ምስለ ኵሉ ሰብእ። 16#ማቴ. 23፥32-39። ወይከልኡነ ኢንንግር ለአሕዛብ በዘየሐይዉ ከመ ይትፈጸሞሙ ኀጢአቶሙ ለዝሉፉ ወናሁ በጽሖሙ መቅሠፍቶሙ ዘለዓለም።

በእንተ አዘክሮተ ፍቅር

17 # ሮሜ 1፥11። ወንሕነሰ አኀዊነ ከመ ዕጓለ ማውታ ኮነ እምኔክሙ በዝ መዋዕል ለገጽ ዳእሙ ወአኮሰ እምልብ ወፈድፋደ ጽሕቅነ ንርአይ ገጸክሙ። 18ወብዙኀ ፈቀድኩ እምጻእ ኀቤክሙ ለልየ ጳውሎስ ምዕረ ወካዕበ ወአዕቀፈኒ ሰይጣን። 19#ፊልጵ. 2፥16፤ 4፥1። መኑ ተስፋነ ወፍሥሓነ ወአክሊለ ምክሕነ አኮኑ አንትሙ በቅድመ እግዚእነ ኢየሱስ ክርስቶስ በምጽአቱ። 20እስመ አንትሙ ክብርነ ወፍሥሓነ።

Currently Selected:

ኀበ ሰብአ ተሰሎንቄ 1 2: ሐኪግ

Highlight

Copy