ኀበ ሰብአ ቆሮንቶስ 1 3

ምዕራፍ 3

በእንተ ትምህርተ ወጣንያን

1 # ዮሐ. 16፥12። ወአንሰ አኀውየ ኢክህልኩ ምህሮተክሙ ከመ ዘመንፈሳውያን ዘእንበለ ከመ ዘበሕገ ሥጋ ወደም ወከመ ዘለሕፃናት በሃይማኖተ ክርስቶስ። 2#1ጴጥ. 2፥2፤ ዕብ. 5፥12-13። ሐሊበ ወጋእኩክሙ ወአኮ መብልዐ ጽኑዐ ዘአብላዕኩክሙ እስመ ዓዲክሙ ኢጸናዕክሙ ወበሕግ ዘሥጋ ወደም ሀለውክሙ። 3#10፥11፤ 11፥18። ወእመሰ ትትቃንኡ ወትትጋአዙ አኮኑ ዘሥጋ ወደም አንትሙ ወከመ ዕጓለ እመሕያው ተሐውሩ። 4#1፥12። እስመ ቦ እምውስቴትክሙ ዘይብል አነ ዘጳውሎስ ወካልእ ይብል አነ ዘአጵሎስ። 5#ግብረ ሐዋ. 18፥24። ምንትኑ ጳውሎስ ወምንትኑ አጵሎስ አኮኑ ሰብእ ከማክሙ እሙንቱ ወበላዕሌሆሙ አመንክሙ ወለለ አሐዱ አሐዱ በከመ ወሀቦ እግዚአብሔር። 6#ግብረ ሐዋ. 18፥4-12። አነ ተከልኩ ወአጵሎስ ሰቀየ ወእግዚአብሔር አልሀቀ። 7ወይእዜኒ ኢዘተከለ ወኢዘሰቀየ አልቦ ዘበቍዐ ዘእንበለ ዳእሙ እግዚአብሔር ዘአልሀቀ። 8#4፥5። ወዘሂ ተከለ ወዘሂ ሰቀየ አሐዱ እሙንቱ ወኵሎሙ ዐስቦሙ ይነሥኡ በአምጣነ ጻማሆሙ።

በእንተ አርድእት

9 # ኤፌ. 2፥20። እስመ ነኀብር በግብረ እግዚአብሔር ወላእካነ እግዚአብሔር ንሕነ ወአንትሙሰ ሕንጻ እግዚአብሔር አንትሙ። 10#15፥10። ወበከመ ጸጋሁ ለእግዚአብሔር ዘወሀበኒ አስተናደፍኩ መሠረተ ከመ ጠቢብ ሊቀ ጸረብት ወባሕቱ ካልእ ውእቱ ዘይሔድሳ ለሕንጸት ወኵሉ ለይትዐቀብ ዘከመ የሐንጽ። 11#ማቴ. 7፥24-28። ወካልአሰ መሠረተ አልቦ ዘይክል ሣርሮ ዘእንበለ ዘተሣረረ ወመሠረቱሂ ኢየሱስ ክርስቶስ ውእቱ። 12ወእመ ቦ ዘየሐንጽ ዲበ ዝንቱ መሠረት ወርቀ ወብሩረ ወእብነ ክቡረ ወዕፀ ወሣዕረ ወብርዐ። 13ለለአሐዱ ይትከሠት ምግባሩ ወዕለቱ ያዐውቆ አመ ከሠቶ እሳት ወለለ አሐዱ እሳት ያሜክር ምግባሮ። 14ወዘሰ ጸንዐ ወቆመ ምግባሩ ውእቱኬ ዘይነሥእ ዕሴቶ። 15ወዘሰ ውዕየ ምግባሩ የኀጕል ዐስቦ ወውእቱ የሐዩ ከመ ዘይድኅን እምእሳት። 16#6፥19፤ ዕብ. 3፥6፤ ሮሜ 8፥9። ኢተአምሩኑ ከመ ታቦቱ ለእግዚአብሔር አንትሙ ወመንፈሰ እግዚአብሔር ኅዱር ላዕሌክሙ። 17ወዘሰ አማሰነ ቤተ እግዚአብሔር ሎቱኒ ያማስኖ እግዚአብሔር ወቤቱሰ ለእግዚአብሔር አንትሙ ውእቱ ወቅዱሳን አንትሙ ወኢታርኵሱ ቤቶ ለእግዚአብሔር። 18#ራእ. 3፥14-19። ወኢታስሕቱ ርእሰክሙ ወዘይኄሊ እምውስቴትክሙ ከመ ጠቢብ ውእቱ በዝ ዓለም አብደ ለይረሲ ርእሶ ከመ ይኩን ጠቢበ። 19#ኢዮብ 5፥12-13። እስመ እበድ ውእቱ በኀበ እግዚአብሔር ጥበቡ ለዝ ዓለም እስመ ከመዝ ይቤ መጽሐፍ «ዘይእኅዞሙ ለጠቢባን ትምይንቶሙ።» 20#መዝ. 93፥11። ወካዕበ ይቤ «የአምር እግዚአብሔር ኅሊናሆሙ ለጠቢባን ከመ ከንቱ ውእቱ።» 21ወበእንተ ዝንቱ ኢይትመካሕ እንከ አሐዱሂ እምዕጓለ እመሕያው እስመ ኵሉ ዘዚኣክሙ። 22እመኒ ጳውሎስ ወእመኒ አጵሎስ ወእመኒ ጴጥሮስ ወእመኒ ዓለም ወእመኒ ሕይወት ወእመኒ ሞት ወእመኒ ዘኮነ ወእመኒ ዘይከውን ኵሉ ዘዚኣክሙ። 23#1ዮሐ. 5፥5። ወአንትሙሰ ዘክርስቶስ ወክርስቶስኒ ዘእግዚአብሔር።

Currently Selected:

ኀበ ሰብአ ቆሮንቶስ 1 3: ሐኪግ

Highlight

Copy