ኀበ ሰብአ ቆሮንቶስ 1 14

ምዕራፍ 14

በእንተ ተቃሕዎ ዘመንፈስ

1 # 12፥31፤ ግብረ ሐዋ. 9፥31። ዴግንዋ ለተፋቅሮ ወተቃሕዎ ዘመንፈስ ከመ ትትነበዩ። 2እስመ ዘይነብብ በነገረ በሐውርት አኮ ለሰብእ ዘይነብብ ዘእንበለ ለእግዚአብሔር እስመ አልቦ ዘይሰምዖ ዘይነብብ ዳእሙ በመንፈስ ዘኅቡእ ይትናገር። 3ወዘሰ ይትኔበይ ለሰብእ ይነብብ በዘይጸንዕ ወበዘይትፌሣሕ ወበዘይትናዘዝ። 4ወዘሰ ይነብብ በነገረ በሐውርት ርእሶ የሐንጽ ወዘሰ ይትኔበይ ቤተ ክርስቲያን የሐንጽ። 5ወእፈቅድ ትንብቡ በነገረ በሐውርት ወዓዲ ፈድፋደ ከመ ትትነበዩ እስመ የዐቢ ወይኄይስ ዘይትኔበይ እምዘ ይነብብ በነገረ በሐውርት ዘእንበለ ፍካሬ ወለእመሰ ይተረጕም የሐንጽ ሕዝበ። 6#ምሳ. 12፥8። ወይእዜኒ አኀዊነ አመ መጻእኩ ኀቤክሙ ወነበብኩክሙ በነገረ በሐውርት ዘኢተአምርዎ አየ በቍዔተ ዘበቋዕኩክሙ ለእመ ኢተናገርኩክሙ ክሡተ ወገሃደ አው ዘጥበብ አው ዘተነብዮ አው ዘትምህርት። 7ወውስተ ዓለምኒ ግብር ዘአልቦ ነፍስ ወይሁብ ቃሎ ከመ ንዋየ ተውኔት ወመሰንቆ ወእመሰ በትእምርት ኢነቀዉ፥#ቦ ዘይቤ «ኢሰንቀዉ» ወኢነበቡ መኑ የአምር ዘይብል መሰንቆሁኒ ወእንዚራሁኒ። 8ወዘሂ ይነፍኅ ቀርነ ለእመ በትእምርት ዘይትዐወቅ ኢነፍኀ መኑ ይትረሰይ ለቀትል። 9ከማሁ አንትሙሂ ለእመ ተናገርክሙ በነገረ በሐውርት ወኢተርጐምክሙ ዘንተ ገሃደ መኑ የአምር ዘትብሉ ወዘትትናገሩ ትከውኑ ከመ ዘምስለ ነፋስ ትትናገሩ። 10ወውስተ ዓለም ብዙኅ አሕዛብ ወዘዘ ዚኣሆሙ ቃሎሙ ወተስናኖሙ ወኵሉ ይነብብ በነገረ ብሔሩ። 11ወለእመ ኢያእመርኩ እንከ ፍካሬሁ ለነገር ወኀይለ ቃሉ አነ እከውኖ ከመ በሃም ለዘይትናገረኒ ወውእቱኒ ዘይትናገረኒ ከመ ዘይዘነግዕ ይመስለኒ። 12ከማሁኬ አንትሙኒ ተቃሐዉ ለዘበመንፈስ ኅሡ ከመ ትብዝኁ በዘይትሐነጽ ሕዝብ። 13#12፥10። ወዘሂ ይነብብ በነገረ በሐውርት ለይጸሊ ከመ ይክሀል ተርጕሞቶ ሎቱ። 14ወእመሰ እጼሊ በነገረ በሐውርት መንፈስየ ዳእሙ ይጼሊ ወልብየሰ ዕራቁ ውእቱ። 15#ኤፌ. 5፥19። ምንተኑ እንከ እገብር እጼሊ በመንፈስየ ወእስእል በልብየኒ ወእዜምር በመንፈስየ ወእዜምር በልብየኒ ለርእስየኒ ወለቢጽየኒ። 16እስመ ለእመ ተአኵት አንተ በመንፈስ ዝኩ ዘይቀውም የዋህ እፎ ይብል አማን ላዕለ አእኵቶትከ ለከ እስመ ኢየአምር ዘትብል ወዘከመ ተአኵት። 17ናሁ አንተሰ ሠናየ ተአኵት ለዝክቱ እፎ እንከ ይትሐነጽ ልቡ እስመ የዋህ። 18ወአአኵቶ ለእግዚአብሔር እስመ እነብብ በነገረ በሐውርት ፈድፋደ እምኵልክሙ። 19ወባሕቱ በቤተ ክርስቲያን እፈቅድ ኀምስተ ቃላተ እንግር በልብየ ከመ ለባዕዳንሂ እምሀር እስመ ይኄይስ እምአእላፍ ቃል በነገረ በሐውርት። 20#ኤፌ. 4፥14፤ ማቴ. 18፥3። አኀዊነ ኢትእበዱ ወኢትስሐቱ ምክረ ወኢትኩኑ ከመ ሕፃናት ወባሕቱ ኩኑ ከመ ሕፃናት እምእኩይ ወፍጹማነ ኩኑ በአእምሮ። 21#ዘዳ. 28፥49፤ ኢሳ. 28፥11-12። ወበውስተ ኦሪትኒ ይብል «በካልእ ልሳን ወበካልእ ከናፍር እትናገሮሙ ለዝ ሕዝብ ወምስለ ዝኒ ኢሰምዑኒ ይቤ እግዚአብሔር።» 22ወይእዜኒ ነገረ በሐውርትሰ ለትእምርት ውእቱ ለእለ ኢየአምኑ ወአኮ ለእለ የአምኑ ወተነብዮሰ ለእለ የአምኑ ወአኮ ለእለ ኢየአምኑ። 23ወለእመኒ ተጋብኡ ኵሎሙ ሕዝብ ኅቡረ ወነበቡ ኵሎሙ በነገረ በሐውርት ወመጽኡ አብዳን እለ ኢየአምኑ አኮኑ የአብዱ ይቤልዎሙ። 24ወእመሰ ኵሎሙ ይትኔበዩ ወመጽኡ አብዳን እለ ኢየአምኑ አኮኑ ኵሎሙ ይዛለፍዎሙ ወኵሎሙ ያስተኃፍርዎሙ። 25ወይከሥቱ ዘየኀብኡ ውስተ ልቦሙ ወእምዝ ይገብእ ወይኔስሕ ወይሰግድ ወይገኒ ለእግዚአብሔር ወይነግር ከመ በአማን ሀሎ እግዚአብሔር ምስሌሆሙ።

በእንተ ሥርዐተ ጸሎተ ማኅበር

26 # 12፥8-10፤ ኤፌ. 4፥12፤18-19፤ ቈላ. 3፥16። ወይእዜኒ አኀዊነ ሶበ ትትጋብኡ ኵልክሙ ብክሙ መዝሙር ወብክሙ ትምህርት ዘከሠተ አበይኖ ዘነገረ በሐውርት ወዘምድራሳት ወኵሎ በዘትትሐነጹ ግበሩ ለበቍዔት። 27ወእመኒ ቦ ዘይነብብ በነገረ በሐውርት ለይትናገሩ በበ ክልኤቱ ወበበ ሠለስቱ ዝኒ ለእመ በዝኀ ለይትናገሩ በበ አሐዱ ወይፈክር ሎቱ ካልእ። 28ወእመሰ አልቦ ዘይተረጕም ለያርምም በቤተ ክርስቲያን ዝኩ ዘይትናገር በነገረ በሐውርት ወይትናገር በዘማእከሌሁ ወማእከለ እግዚአብሔር። 29ወነቢያትኒ ይትናገሩ በበ ክልኤቱ ወበበ ሠለስቱ ከመ ይትዐወቅ ለቤተ ክርስቲያን ቃሎሙ። 30ወእመሰ ቦ ዘአስተርአዮ ወተከሥተ ሎቱ እንዘ ንቡር ለያርምም ቀዳማዊ። 31እስመ ይትከሀለክሙ ትትነበዩ ኵልክሙ በበ አሐዱ ከመ ኵሉ ይትመሀር ወከመ ኵሉ ይትፈሣሕ ወይጽናዕ። 32#12፥9። እስመ መንፈሰ ነቢያት ይትኤዘዝ ለነቢያት። 33እስመ ኢኮነ እግዚአብሔር አምላከ ሀከክ ዘእንበለ አምላከ ሰላም በከመ ይትገበር በኵሉ ቤተ ክርስቲያኖሙ ለቅዱሳን።

በእንተ አንስት

34 # ዘፍ. 3፥16። ወአንስትኒ ለያርምማ በቤተ ክርስቲያን እስመ ኢእዙዝ ይትናገራ ዘእንበለ ከመ ይትአዘዛ እስመ ከማሁ ይቤ ኦሪት። 35#1ጢሞ. 2፥12። ወእመሰ ይፈቅዳ ይትመሀራ በአብያቲሆን እምአምታቲሆን ይሰአላ እስመ ኀሣር ውእቱ ለብእሲት ተናገሮ በቤተ ክርስቲያን። 36#ኢሳ. 2፥3፤ መዝ. 18፥4። እምኀቤክሙኑ ዳእሙ ወፅአ ቃለ እግዚአብሔር ወኀበ ባሕቲትክሙኑ በጽሐ ቃለ እግዚአብሔር። 37#1ዮሐ. 4፥6። ወእመቦ ዘይብል ርእሶ ከመ ነቢይ ውእቱ አው ከመ ዘመንፈስ ቅዱስ ላዕሌሁ ያእምር ዘንተ ዘጸሐፍኩ ለክሙ እስመ ትእዛዘ እግዚአብሔር ውእቱ። 38#1ዮሐ. 4፥6። ወዘሰ ኢየአምር ኢየአምሮ። 39ወይእዜኒ አኀዊነ ተቃሐዉ ለተነብዮ ወለዘኒ ይነብብ በነገረ በሐውርት ኢትክልእዎ። 40#ቈላ. 2፥5። ወኵሎ ሥሩዐ ወዕቁመ ወውሱነ ግበሩ።

Currently Selected:

ኀበ ሰብአ ቆሮንቶስ 1 14: ሐኪግ

Highlight

Copy