ኀበ ሰብአ ቆሮንቶስ 1 13

ምዕራፍ 13

በእንተ በቍዔተ ፍቅር

1ወእመኒ አእመርኩ ነገረ ኵሉ ሰብእ ወነገረ ኵሉ መላእክት ወተፋቅሮ አልብየ ኮንኩ ከመ ድምፀ ብርት ዘይነቁ ወእመ አኮ ከመ ከበሮ ዘይዘበጥ። 2#ማቴ. 7፥22፤ 17፥20፤ ያዕ. 2፥17። ወእመኒ ተነበይኩ ወአእመርኩ ኵሎ ዘኅቡእ ወኵሎ ጥበበ ወእመኒ ብየ ኵሉ ሃይማኖት እስከ አፈልስ አድባረ ወተፋቅሮ አልብየ ከንቶ ኮንኩ። 3#ማቴ. 7፥1፤ ዮሐ. 15፥13። ወእመሂ ወሀብኩ ለምጽዋት ኵሎ ንዋይየ ወዓዲ ሥጋየኒ ለውዕየተ እሳት ወተፋቅሮ አልብየ አልቦ ዘረባሕኩ። 4#ምሳ. 10፥12። ተፋቅሮ ያስተዔግሥ ተፋቅሮ ያስተማሕር ተፋቅሮ ኢያስተቃንእ ወኢያስተኃፍር ወኢያስተዔቢ ልበ። 5#ፊልጵ. 2፥4። ወኢያኀሥሥ ተድላ ለባሕቲቱ ኢያስተማዕዕ ወኢያኄሊ እኩየ። 6ወኢያስተፌሥሕ በግፍዕ ወያስተፌሥሕ በጽድቅ። 7#ምሳ. 9፥12፤ ሮሜ 15፥1። በኵሉ ያስተማሕር ወበኵሉ ያስተዔግሥ ወበኵሉ ያስተኣምን ወበኵሉ ያስተዌክል። 8ተፋቅሮ ለዝሉፉ ኢያኃሥር ወኢያወድቅ ወዘሂ ተነበየ ኀላፊ ወይሰዐር ወዘሂ ነበበ በነገረ በሐውርት ኀላፊ ወይትፌጸም ወዘሂ ጠበበ ኀላፊ ወይሰዐር። 9እስመ ነአምር ንስቲተ ወንትኔበይ ንስቲተ በበገጹ። 10ወአመ በጽሐ ፍጻሜሁ ሎቱ ይሰዐር ውእቱኒ። 11ወአመሰ ደቂቅ አነ ተናገርኩ ከመ ደቂቅ ወኀለይኩ ከመ ደቂቅ ወመከርኩ ከመ ደቂቅ ወአመሰ ልህቁ ሰዐርኩ ኵሎ ሕገ ደቂቅ። 12#2ቆሮ. 5፥7። ወይእዜሰ ተዐውቀኒ ወአስተርአየኒ ክሡተ እስመ በተሐዝቦ ንሬኢ ከመ ዘበመጽሔት ወአሜሃሰ ንሬኢ ገጸ በገጽ ወይእዜሰ አአምር እምአሐዱ ኅብር ወድኅረሰ አአምር ኵሎ ዘከመ ተዐውቀኒ። 13#1ተሰ. 1፥3፤ 1ዮሐ. 4፥16። ወይእዜኒ እሉ ሠለስቱ ዘይነብሩ እሙንቱ ሃይማኖት ወትውክልት ወተፋቅሮ ወእምኵሉሰ የዐቢ ተፋቅሮ።

Currently Selected:

ኀበ ሰብአ ቆሮንቶስ 1 13: ሐኪግ

Highlight

Copy