ፊል 3
3
ኪን ጺሊ̇ቲ
1ዪዚ ቴ ኢሺንታ̈ን! ጎዳ̈ባራ ዪንታ̇ብ ፔቲ̇ቲ ዎኮታ̇ቦ ኡፋይቲ̇ብቴ፤ ዓኒ̇ፖ ቲ̈ን ቴ ዪንታ̇ብ ጻ̈ፊኖን ዓታ̇ር ማ̈ሃራ ጻ̈ፋንዳቦ ታ̈ና ቦ̈ሲሳባሴ፤ ማ ዪና̇ ዪንታ̇ ኢ̈ታ ባዝ ጋልዳፖ ና̈ጋ̈ሬ። 2ካናፌ̈ን ማ̈ቂ̇ኖ ኢ̈ት ኣሳን ጋልዳፖ ዪንቲ̇ ዪንታ̇ ና̈ጊብቴ፤ ቢሪንቲ ሙታ “ጋራ̇ዚንቲ̇ብቴ፤ጋራዚንቲ̇ብቴ” ጌይዝ ኣሳን ጋልዳፖ ዪንቲ̇ ዪንታ̇ ና̈ጊብቴ። 3ኑ̈ኒ ኣያ̇ናባር ጾ̈ሳ̇ ጎሽቲ̇ዛንኬ ኣ̈ፍባር ቤንቲ̇ዝ ኣሳ ዎጋባር ጊዳካ̇ይዶን ዬሱ̈ስ ክርስቶ̈ሳባር ኬርፊዛን ማ̈ቂ̇ኖኮታ̇ቦ፤ ኑ̈ኒ ኪን ጋራ̇ዚንቲ̇ኖ ኣሴ። 4ኬራፍ ኮሺ̇̈ርኮ ታ̈ናር ኬርፊዝ ባዚ ታ̈ብ ዎ። ኦ̈ናካር ማ̈ቂ̇ን ኣ̈ፍባር ቤንቲ̇ዝ ባዝባር ኬርፊ̈ርፌ̈ንኮ ታ̈ናር ሺ ኬርፊሲዝ ባዚ ታ̈ብ ዎ። 5ቴ ዬሊንቲ̇ኖፖ ላ̈ሚ ቃምባራ ጋራ̇ዚንቲ̇ኔ፤ ቴ ዜር ኦይጬጌንዶ ኢስሬ̈ላ ጋርታ ቢ̈ናማ ዜር፤ ኢብራዊ ኮች ጋርታፓ̇ሬ ኤሪንቲ̇ኖ ኢብራ̈ዊዬ፤ ኣይሁድ ሂጊ̇ን ጎይ ታ̈ና ኦይጬጌይንዶ ታ̈ኒ ሚን ፋ̈ራሳ̈ዊዬ። 6ታ̈ኒ ኣይሁዳ ሂጊ̇ንቦ ሚጪንታ̇ራ ዬሱ̈ሳ ኣማ̇ኒኖ ኣሳን ዳኪ̇ኔ። ሂጋ̇ ና̈ጋር ጺሊ̇ዝ ጎይባራር ማ̈ቂ̇ን ኣባካር ማዛ ታ ጋልዳ ባዪዶን ዎ ኣሴ። 7ዎቲናካሬ ዓኒ̇ፖ ቲ̈ን ታ̈ና ማ̈ዲ̇̈ሬ ጌያ ቴ ኤ̈ር ዎ ዪን ባ̈ዛን ዎይ ዓት ክርስቶ̈ሳኮታ̇ቦ ማ̈ዲ̇ባሶ ባዝፌ̈ን ማሃራ ፋይዳር ኣሺ̇ኔ። 8ጎ̈ዳ ዬሱ̈ስ ክርስቶ̈ሳ ኤራዚምፖ ሺዝ ባ̈ዚ ኣባካር ባዮ̇ን ቴ ኣማ̇ኒኖንኮታ̇ ባዝ ዎይዳ ፋባ̈ሶ ባዝፌ̈ን ፋይዲኔ። ቴ ኢ ጊሻ̇ቦ ጋ̈ራ ዎይ ባዝ ኣሺ̇ኔ፤ ክርስቶ̈ሳ ዲጛ̈ንዳቦ ጋ̈ራ ዎይ ባዝ ቶጚቲኖ ፒቲፌ̈ን ፋይዲኔ። 9ዪኖ̇ ቴ ዎቲኖንዳ ኣኮታ̇ቦ ጌይን ሂጋ̇ ና̈ጋባር ቤንታ̇ዝ ቴ ጺሊ̇ቲን ኣሻ̇ራ ኣማ̇ናባር ቤንታ̇ዝ ጾ̈ሳ̇ ጺሊ̇ቲን ክርስቶ̈ሳ ኣማ̇ናር ዲጛንዳብኬ ኢባራ ዎልኣ ፔታ̇ን ማ̈ቃ̇ንዳቦ። 10ማ ሜላ ኣኮታ̇ቦ ጌይን ታ̈ኒ ክርስቶ̈ሳ ኤራንዳቦ፣ ኢ ዓይቃ ጋርታ̇ፖ ዲ̇̈ንዲኖ ዎልቂን ኤራንዳቦ፣ ኢ ኤኪ̇ኖ ሜቲን ኤካ̇ንዳብኬ ኢ ዓይቂ̇ኖ ዓይቂንዲፌ̈ን ታ̈ናር ዓይቃ̇ንዳቦ። 11ማ ቴ ዓይቃ̇ራ ዓይቃ ጋርታ̇ፓር ዲንዳ̇ራ ሜናቦ ሼምፓባር ዶኣዚን ታስፋ ጋዲ̇ኖኮታ̇ቦ።
12ዪን ባ̈ዛን ዎይ ቢ̈ርቲ ቴ ዲጛ̈ካዬ ዎይ ቴ ጋልዳ ኣባክ ኣቲ̇ኖ ባዚ ባዬ ጌንት ጊዳካ̇ዬ፤ ማ̈ቂ̇ናካሬ ዬሱ̈ስ ክርስቶ̈ሲ ታ̈ና ፌዪ ማሃር ታ̈ብ ጊጊሲኖ ሺልማ̈ቲንዶ ኤካ̇ንዳቦ ሚጛር ዎጻ̇̈ሬ። 13ቴ ኢሺንታ̇ን! ታ̈ኒ ዪና̇ ኢዞ ዓት̇ ዬሊ̇ኔ ጌያ ፋይዳባሴ፤ ማ̈ቂ̇ናካሬ ቴ ዓት ዎታ̈ዚንዳ፥ ኣ̈ኖ ባዛን ቦቲጛሙታ ቴ ቲ̈ን ዎ ባዛ̈ን ኤ̈ንዳቦ ሚጛ̈ር ኦ̈ሬ። 14ጾ̈ሳ̇̇̈ዲ ዬሱ̈ስ ክርስቶ̈ሳ ጎይባራ ታ̈ና ፉዳ ጼይጊኖኮታ̇ቦ ኢ ታ̈ብ ኢማ̈ዝ ሺልማ̈ቲን ኤካ̈ንዳቦ ሚ̈ጛር ቤስ̇ ኢዞ ዬላ̇ንዳብ ዎጻ̇̈ሬ።
15ዪዚ ኑ ኣማ̇ናባር ሚጚ̈ኖን ዎይ ኑ ቆፊን ዪኒ̇ፌ̈ን ማ̈ቃ̇ንዳቦ ኮሻ̇̈ሬ፤ ማ ዪንታ̇ ጋርታ ዱማ ዱማ ቆፊ ዎ ኣሲ ዎኮ ዪና ቆፊንዳር ማ̈ቂ̇ን ጾ̈ሳ̇ ዪንታ̇ብ ፋላ̇ ጋልዳ ኬሳ̇ር ቤይሲ̈ሬ። 16ዪ ማ̈ቂ̇ናካሬ፥ ጾ̈ሳ̇ ኑ̈ና ቤይሲኖ ባዛንቦ ሙታ ኪ̈ቲንቲ̇ሙታ ዶኤጌይንዶ ኑ̈ብ ጊዲ̈ሬ።
17ቴ ኢሺንታ̈ን! ቴ ዎታዚን ቤቃ̇ሪ ዪንታ̇ር ዪና̇ ኢዝፌ̈ን ዎቲብቴ። ኑ ዎታዚንዲፌ̈ን ዎቲዝ ኣሳን ኮሺንቻር̇ ኢንታኮን ቤቂ̇ብቴ። 18ዓኒ̇ፖ ቲ̈ን ቴ ዪንታ̇ብ ማሃ ማሃር ሶ̈ሊኖንዲፌ̈ንኬ ዓታ̇ር ዬ̈ካሙታ ቴ ዪንታ̇ብ ሶ̈ላዚንዳ ዎይሊንን ፌ ዶኣዝ ዶኢንባራ ክርስቶ̈ሳብ ጻላ̈ታፌ̈ን ማ̈ቃ̇ር ዶኢ̈ሬ። 19ዪንፌ̈ኖ ኣሳን ኢንታ ዉርሲንዳ ይ ኣባ ጌይን ኢንታ ጋርሲን ኢንታ̇ብ ላ̈፤ ኣስ ዬልቂዝ ባዛ̈ን ዎይ ኢንታ̇ብ ቦ̈ንቼ፤ ኢንታ ቆ̈ፊን ዎይ ዎንዳ ኣላሚን ዓኒ̇ ጋልዳ ዎ ባዝ ጋልዳ። 20ኑ̈ኒ ማ̈ቄጌ̈ንዶ ኑ ጋዲን ኣፋ፤ ኢናፖ ዬይዛ ኑ̈ና ፋዛ ጎዳ ዬሱ̈ስ ክርስቶ̈ሳ ኑ ሹ̈ናባር ና̈ጊ̈ሬ። 21ኢ ዎይ ባዝ ፌ ሲልጣ̈ና ጻና ኣ̈ዝ ፌ ዎልቂንባራ ዓይቃ̇ዝ ኑ ኣይሺ̇ን ኦ̈ሃሪ ቦ̈ንቺንቲኖ ጋሊ̇ን ፌ̈ኮን ማይጻምፔ̈ን ዎቲ̈ሬ።
Currently Selected:
ፊል 3: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
