ቆላ̈ 4

1ላ̈ንታን! ዪንታ̇ባር ላ̈ ኣፋ ዎን ኤራ̈ሪ ዪንታ̇ ኣይላ̈ን ኮሽ̇ ቡ̈ዳባራ ኢንታ̇ ዎልፌ̈ን ቤቃ̇ር ኣቂሲብቴ።

ዉርሲ ዞራ

2ጾ̈ሳ̇ ጋላቲሙታ̇ ባርካ̇ሪ ዎ̈ሳባር ሚ̈ጚብቴ። 3ማ ኑ̈ኒ ጾ̈ሳ̇ ቃ̈ሊን ሳባኪዝ ጎይ ኑ̈ብ ፊርቃምፔ̈ንኬ ክርስቶ̈ሳ ሚስጢ̇ሪን ኣሳብ ሶ̈ላንዳብ ዳንዳኣምፔ̈ኒ ጾ̈ሳ̇ ኑ̈ብ ዎ̈ሲ̇ብቴ፤ ታ̈ናር ቃቺንቲ̇ኖንዳ ዓና̇ ሚስጢ̇ሪን ሳባኪ̇ኖኮታ̇ቦ። 4ታ̈ናሬ ታ̈ብ ኮሻ̇ዚንዲፌ̈ኒ ጾ̈ሳ̇ ቃ̈ሊን ፋል̇ ሶ̈ላምፔ̈ኒ ታ̈ብ ዎ̈ሲ̇ብቴ̇።

5ዪንታ̇ብ ቤንቲ̇ኖ ኬሊ̇ን ኢዞ ሜላ̇ ይሳካ̇ይዶር ኦ̈ሳጋልዳ ፌ̈ሺ̇ሙታ̇ ኣማ̇ናካ̇ዮ ኣሳንባራ ኤራባር ዶኢብቴ̇። 6ኣስ ዎይቦ ኮሻ̇ዝ ሶ̈ሊን ሶ̈ላር ማሃንዳቦ ዪንታ̇ ሶ̈ሊንዳ ዎይ ጋላስ ቃ̈ጺዝ ኮሽ̇ ሶ̈ላ ማ̈ቆ̇።

ዉርሲ ሳሪቲ

7ጾ̈ሳ̇ ኦ̈ሳቦ ኣማ̇ኒንቲ̇ኖ፥ ጎዳ ኦ̈ሲን ታባር ዎልኣ ኦ̈ዛ፥ ካንቲ̇ኖ ኑ ኢሻ ቲኪቆ̈ሲ ታባዝ ዎይ ዪንታ̇ብ ሶ̈ሊ̈ሬ። 8ታ̈ኒ ኢያ ዪንታ̇ክ ሚሺኖንዳ ኢ ኑባዝ ዪንታ̇ቦ ሶ̈ላምፔ̈ኒኬ ዪንታ̇ ቡ̈ዲን ሚ̈ንኒፌ̈ኔ። 9ማ ዪንታ̇ ጋዶ̇ ኣስ ማ̈ቂ̇̈ኖ ኣማ̇ኒቲ̇ኖ̈ዲኬ ካንቲ̇ኖ ኑ ኢሻ ኣና̈ሲሞሲ ኢባር ዎልኣ̈ ዪንታ̇ክ ዬይሬ፤ ኢንቲ̇ ዓንዳ ኑ ጊዳ̇ ኦ̈ሲንቲ̇ሙታ̇ ዎ ባዛን ዎይ ዪንታ̇ቦ ሶ̈ሊ̈ሬ።

10ታባራ ዎልኣ ቃሺ ኣ̈ል ዎ ኣስጥሮኮ̈ሲ ዪንታ̇ ሳሮ ጌይኔ፤ ባርናባ̈ስ ኣቢ̇ ናኣ ማ̈ርቆሳሬ ዪንታ̇ ሳሮ ጌይኔ። (ማ̈ርቆ̈ሲ ዪንታ̇ክ ሉኬ̇ጌይን ኢያ ሞኪ̇ ኤኪ̇ብቴ ዪዝ ጌይዝ ኪ̈ቶ ዪንታ̇ ዬሊ̇ኔ) 11ዮስጦ̈ሳ ጌዪ ጼይጊንቲ̇ዛ ዬሱ̈ሲ ዪንታ̇ ሳሮ ጌይኔ፤ ጾ̈ሳ̇ ካ̈ቲቲ ኦ̈ሲን ታባር ኦ̈ዛን ጋርታ̇ፖ ኣይሁዳ ዜር ማ̈ቂ̇̈ኖን ዪን ሙታ̇፤ ኢንታ̇ር ጴች ታ̈ና ሚ̈ንኔ።

12ዬሱ̈ስ ክርስቶ̈ሳብ ኣይላ ማ̈ቂ̇ኖ ዪንታ̇ ጋዶ̇ ና̈ሳ ኤጳ̈ፍራሬ ዪንታ̇ ሳሮ ጌይኔ። ዪንቲ ጾ̈ሳ̇̇ ጎይባራ ዲጫ̇ንፔ̈ንኬ ጾ̈ሳ̇̇ ቆፊን ዎይ ኦ̈ ፎታምፔ̈ኒ ዪንታ̇ ኮታ̇ ኢ ዎይ ጋላስ ዎ̈ሳባር ዳ̈ቡሪ̈ሬ። 13ኢ ዪንታ̇ቦ ማ ሎዶ̈ቃ ጋዳ̇ ዎ ኣንብኬ ሂራ̈ፖ̇ሊስ ካታማ̈ን ጋርታ ዎ ኣሳንቦ ጴች ዋ̈ያዚን ቴ ኢ̈ቦ ማርኪ̇ታ̈ሬ። 14ካንቲኖ ኣኪማ ሉቃ̈ሳኬ ዴ̈ማሳኬ ዪንታ̇ ሳሮ ጌይኔ። 15ሎዶ̈ቃ ጋዳ̇ ዎ ኣማ̇ኒኖ ኣሳንቦ ማ ኒምፒ̇ኬ ኢዝ ኣ̈ል ሺ̈ቂዝ ኣማኒ̇ኖ ኣሳን ታ̈ብ ሳሮ ጌብቴ። 16ዓና̇ ጻ̈ፊኖ ኪ̈ቲን ዪንቲ̇ ናባ̇ቢኖፖ ዓኒ ሎዶ̈ቃ ጋዳ̇ ዎ ኣማ̇ኒኖ ኣሳን ቲ̈ን ናባ̇ብሲብቴ፤ ማ ዪንታ̇ሬ ሎዶቃ̈ፖ ዪንታ̇ክ ዬ̈ዝ ኪ̈ቲን ናባ̇ቢብቴ። 17ኣርኪጳ̈ሳኮ “ጎዳ ኔ̈ና ኦ̈ ጌይ ኔ̈ብ ኢሚ̇ኖ ኦ̈ሲን ኦ̈ ፎታቤ” ጋ̈ር ኢ̈ብ ሶ̈ሊብቴ።

18ዓና ሳሪቲ ኪ̈ቲን ቴ ኩሽ ጌ̈ቲንባር ጻ̈ፊኖ̈ዲ ታ ጳውሎ̈ሳ፤ ቴ ቃሺ ኣ̈ል ዎን ዪንቲ ቦቲጛፒ̇ቴ። ጾ̈ሳ̇̈ ኮሺቲን ዪንታ̇ባር ማ̈ቆ̇።

Currently Selected:

ቆላ̈ 4: ኦጫ̈ቃማ

Highlight

Copy