ቆላ̈ 3
3
ጌ̈ሺቲባር ዶኣምፔ̈ኒ ኢሚ̇ኖ ኪ̈ታ
1ዪዚ ዪንቲ̇ ክርስቶ̈ሳባር ዓይቃ ጋርታፖ̇ ዲንዲ̇ኖኮታ̇ቦ፥ ክርስቶ̈ሲ ጾ̈ሳ̇̈̇ቦ ኡሻች̇ ጎይ ዶኢኖ̈ንኮ ኢና ኣፋ ዎ ባዛን ኮዪብቴ̇። 2ዪንታ̇ ቆፋ̈ዳሬ ኣፋ ዎ ባዛን ጋልዳዶኬ ሳ̈ዳ̇ ዎ ባዛን ጋልዳ ማ̈ቃፖ̇። 3ኣሲ ኣሳ ጋልዳፖ ዓይቃባር ፋጊንታ̇ዚንዲፌ̈ኒ ዪንቲ̇ ዓኒ̇ ኣላሚን ጋልዳፖ̇ ፋጊንቲ̇ኔ። ዪንታ̇ ሼምፒ̇ንዳ ክርስቶ̈ሳባራ ጾ̈ሳ̇ ላፍ ኣ̈ቺንቲ̇ኔ። 4ዪንታ̇ብ ሼምፓ ማ̈ቂ̇ኖ ክርስቶ̈ሲ ቦንችባራ ቤንታ̇ምባራ ዪንታ̇ሬ ኢባር ዎልኣ ቦንችባራ ቤንቲ̇̈ሬ።
5ዪ̈ኮታ̇ቦ ሳ̈ዝ ጋልዳ ዎ ባዛብ ኢኒ̇ታዝ ኢ̈ታ ኢኒ̇ን ዎይ ዎብቴ፤ ዪንሬ፦ ኦሎ̈ላ፣ ቱኒቲ፣ ዲርጊስ፣ ኢ̈ታ̇ ኢና̈ኬ ዎይባዝ ታ̈ብ ማ̈ቆ̇ ጌንት፤ ዎይባዝ ታ̈ብ ማ̈ቆ̇ ጌይዛ̈ዲኬ ኤ̈ቃብ ጎይኒዛ̈ዲክ ዎልኣ ፔታ̇ኔ። 6ጾ̈ሳ̇̈̇ብ ኪ̈ቲንቲ̇ባ̈ሶ ኣሳን ጋልዳ ዪንፌ̈ኖ ባዛንጊሽ̇ ጾ̈ሳ̇̇ ጎይሊን ዬ̈ሬ። 7ዓኒ̇ፖ̇ ቲ̈ን ዪንቲ̇ ጎዳ ኣማ̇ናካ̇ዮ ኬል̇ባራ ዪንፌ̈ኖ ባዛን ኦ̈ሙታ̇ ጋምኢ̇ኔ።
8ዪዚ ዓት ዪንቲ̇ ጎይል፣ ዛላ፣ ቆ̈ሳ፣ ጌስትኬ ኣስ ዬ̈ሊ̇ዝ ሶ̈ላ ዪንታ̇ ጋልዳፖ̇ ፋይብቴ̇። 9ዪንቲ̇ ቲ̈ኖ ዪንታ̇ ኣሲቲን ኢዝ ኦ̈ሲምባር ዎልኣ ዪንታ̇ ጋልዳፖ̇ ኬሳ̇ር ቶጚኖኮታ̇ቦ ዪንቲ ዎልዎልኣ ማቃ ሶ̈ላፒ̇ቴ። 10ዪንቲ̇ ዪንታ̇ ኮቺ̇ኖ ጾ̈ሳ̇̇ ማይጺሙታ̇ ጾ̈ሳ̇ ኤራባር ኦራ ማ̈ቂ̇ሙታ̇ ሉኪ̇ዝ ኦራ ኣሲቲ ማኢኔ። 11ዪዚ ዪና̇ ኦራ ኣሲቲን ጋርታ̇ ኣይሁድ ዎይ ኣይሁድ ባዮ̇ ኣሲ፣ ጋራ̇ዚንቲ̇ኖ ኣሲ ዎይ ጋራ̇ዚንታካ̇ዮ ኣሲ፣ ኣሳ ጋዶ̇ ኣሲ ዎይ ታማ̈ራካ̇ዮ ኣሲ፣ ኣይላ ዎይ ኣይላ ጊዳካ̇ዮ ኣስ ጌይዝ ፋጊቲ ባዬ̇፤ ክርስቶ̈ሲ ዪን ዎይንስ ጋርታ̇ ዎኮታ̇ቦ ዋ̈ና̇̈ዲ ክርስቶ̈ሳ።
12ዪዚ ዪንቲ̇ ጾ̈ሲ ዪንታ̇ ፌዪ ማሃንዳብ ቆሪኖንኬ ኢባር ካንቲ̇ኖ ጾ̈ሳ̇̇ ዎርዣ ማ̈ቂ̇ኖኮታ̇ቦ ኣሳብ ሚጪንቲ̇፣ ኣሽኪቲ፣ ዪንታ̇ ዪርክ ዪርክ ዎቲ፣ ኮሺ̇ቲኬ ዳንዳኣ ማኢኖ ኣስ ማ̈ቂ̇ብቴ። 13ዪዚ ዪንቲ̇ ዎልዎልኣ ዳንዳኢብቴ፤ ዪንታ̇ ጋርታ̇ ፔታ̇ና̈ዲ ፔታ̇ና ጋልዳ ሺን ጌይኖባዝ ዎኮ ክርስቶ̈ሲ ዪንታ̇ብ ኣቶ̇ ጌይኖንዲፌ̈ኒ ዪንታ̇ር ዎልዎልኣ ኣቶ̇ ጌብቴ። 14ዪን ዎይንፖ ሺ ዎይ ባዝ ሺ̈ሻር ዎልኣ ፔታ̇ን ማሃንዳብ ዳንዳኣዚን ካንን ማኢብቴ።
15ዪንቲ̈ ፔቲ ኣስ ጋል̇ ጋልዳ ዎ ጋላ̇ንፌ̈ኒ ማ̈ቃ̇ሪ ኪን ጼይጊንቲ̇ኖንዳ ዓና̇ ሳሪቲምቦ ማ̈ቂ̇ኖኮታ̇ቦ ክርስቶ̈ሳ ሳሪቲንዳ ዪንታ̇ ጋርታ̇ ኩማጋ̈ቤ፤ ማ ጾ̈ሳ̇̇ ጋላቲዝ ኣስ ማ̈ቂ̇ብቴ። 16ክርስቶ̈ሳ ቃ̈ሊን ኩም ዪንታ̇ ጋርታ̇ ዶኣጋ̈ቤ፤ ኤራ ዎይባራ ዎልዎልኣ ታማ̈ርሲብቴ̇፤ ዎል ዎልኣ ዞ̈ሪንቲ̇ብቴ፤ ጋላታ ማዝሙራባራኬ ዎይ ኣይናታ ማዝሙራባራ ጾ̈ሳ̇̇̈ቦ ቡ̈ዳ ጋርታ̇ፖ ዬጺ̇ብቴ። 17ዬሱ̈ስ ክርስቶ̈ስ ጎይባራ ጾ̈ሳ̇ ባ̈ባ ጋ̈ላቲሙታ̇ዶ̈ሪ፥ ቃ̈ላባራር ማ̈ቆ̇ ኦ̈ሳባራ፥ ዪንቲ ኦ̈ዝ ባዛን ዎይ ጎዳ ዬሱ̈ስ ክርስቶ̈ስ ሱ̈ምባራ ኦ̈ብቴ፤ ማ ኢ ጎይባራ ጾ̈ሳ̇ ባ̈ባ̈ ጋ̈ላቲብቴ።
ፔቲ̇ ኣ̈ሎ ኣስ ማ̈ቂ̇ኖ ኣማ̇ኒዝ ኣሳን ዎል ዎዛርፌ̈ን ዶኣንዳ̇ብ ኮሺ̇̈ርኮ
18ማ̈ጫ̇ን! ጾ̈ሳ̇ ቲ̈ን ኮሺ̇ዝ ባዝ ማ̈ቂ̇ኖኮታ̇ቦ ዪንቲ ኣስኒንታ̇ንቦ ኪ̈ቲንቲ̇ብቴ።
19ኣስኒንታ̇ን! ዪንታ̇ ማ̈ጫ̇ን ካብቴ፤ ኢንታ̇ብ ጋራፌ̈ን ጫ̈ጛፒ̇ቴ።
20ናኣን! ጎዳ ኡፋይሲ̇ዝባዝ ማ̈ቂ̇ኖኮታ̇ቦ ዪንታ̇ ባ̈ባ̈ብኬ ዪንታ̇ ኢንዲቦ ባዝ ዎይ̈ባራ ኪ̈ቲንቲ̇ብቴ።
21ባ̈ቢንታ̇ን! ዪንታ̇ ናኣን ታስፋ ቃጻካ̇ዮ̈ዲፌ̈ን ኢንታ̇ ማ̈ራ̇ሪሳፒ̇ቴ።
22ኣይላ̈ን! ሳ̈ዝ ጋልዳ ዎ ዪንታ̇ ላ̈ንቦ ባዝ ዎይባራ ኪ̈ቲንቲ̇ብቴ፤ ዪንቲ ኪ̈ቲንታ̇ዚንዳ ኣስ ኡፋይሳ̇ንዳቦ ጊዳካ̇ይዶን ጾ̈ሳ̇̇̈ቦ ኢ̈ጪ̇ሙታ̇ ኪን ቡ̈ዳባራ ኪ̈ቲንቲ̇ብቴ። 23ዪንቲ ኦ̈ዝ ባዛን ዎይ ኣሳብ ኪ̈ቲንቲ̈ዛ̈ዲፌ̈ን ፋይዳካ̇ይዶሪ ጎዳ̈ቦ ኦ̈ዛ ማ̈ቂ̇ኖን ኤራሪ ቡ̈ዳ ጋርታፖ̇ ኦ̈ብቴ፤ 24ኣባ ጌይን ጾ̈ሳ̇ዲ ዪንታ̇ቦ ኢማ̇ንዳ ጌዪ ቃ̈ላ ጌሊኖን ዪንታ̇ብ ኢማ̇ዚን ዪንቲ̇ ኤሪ̈ሬ፤ ዪንቲ̇ ኦ̈ዚንዳ ጎዳ ክርስቶ̈ሳቦ። 25ጾ̈ሳ̇ዲ ኪን ፊርዲዛኮታ̇ቦ ኢ̈ት ኦኖ ኣሲ ፌ ኢ̈ታ ኦ̈ሲንቦ ፌ̈ብ ኮሻ̇ዝ ቂጣ̈ቲን ኤኪ̇̈ሬ።
Currently Selected:
ቆላ̈ 3: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
