1 ጢማ̈ 4
4
ማቃ ኣስታማ̈ራን
1ጊዳን ዬይዝ ኬላ̇ን ጋርታ̇ ፔቲ̇ ፔቲ̇ ኣሳን ፌ ኣማ̇ኒን ኣሻ̇ሪ ባ̈ልዝ ኢ̈ታ ኣያ̇ና ጎይኬ ሴ̈ጣና ቲሚርታ ዎሂን ዬዚን ጾ̈ሳ̇ ኣያ̇ና ፋል̇ ሶ̈ሊ̈ሬ። 2ዪኒ̇ፌ̈ኖ ቲሚርቲን ኬስካ̇ዚንዳ ኣሳ ቲ̈ን ኮሽ̇ ኣስ ማ̈ቃ̇ር ቤንታ̇ንዳቦ ማቃ ሶ̈ላምባራ ቆፊ ዪኖ ኢንታ ቡ̈ዲንዳ “ኔ ዪኖ̇ ኣባብ ማቃ̇̈ራ” ጋ̈ባሶ ኣሳን ጋልዳፖ ኬስካ̇̈ሬ። 3ዪንፌ̈ኖ ኣሳን ኣቲናር ማጫ̇ ኤካካ̇ይፌ̈ኒ ማጫ̇ር ኢስታካ̇ይፌ̈ኒ ካዪ̈ሬ፤ ኣማ̇ኒዛንኬ ኪንን ኤሪዛ̈ን ጾ̈ሳ̇ ኮቺ̈ኖ ፊ̈ሺን ኢያ ጋላቲሙታ ሞ̈ዚንዶ ሞ̈ካ̇ይፌ̈ኒ ካዪ̈ሬ። 4ዎቲናካሬ ጾ̈ሲ ኮቺ̇ኖ ባዚ ዎይ ኮሽ̇ ማ̈ቂ̇ኖኮታ̇ቦ ጾ̈ሳ̇ ጋላታር ኤኬ̇ጌይንዶ ኢዝ ጋርታ̇ ቶጚንቲዝ ባዚ ባዬ። 5ኣባቦ ጌዬጌይንዶ ጾ̈ሳ̇ ቃ̈ላባርኬ ዎ̈ሳባራ ኣንጂንቲ̇ኖ ማ̈ቂ̇̈ሬ።
6ኔ ዪና̇ ኪ̈ቲንዶ ኣማ̇ኒዝ ኣሳንቦ ኤርሴጌይንዶ ጾ̈ሳ̇ ቃ̈ላባርኬ ኔ ኤ̈ኖ ኮሽ ቲሚርቲ̇ንባራ ዲጪ̇ኖ ኣስ ማ̈ቃ̇ራ ዬሱ̈ስ ክርስቶ̈ሳብ ኮሽ ኦ̈ዝ ኣስ ማ̈ቃ̇̈ሬ። 7ጾ̈ሳ̇ቦ ቦንች ማ̈ቂ̇ባ̈ሶ ፋባ̈ሶ ላ̈ፋ ቶሳፌ̈ኖ ሶ̈ላ ጋልዳፖ ጎታ̇ቤ፤ ጾ̈ሳ̇̇̈ቦ ጎሽታ̇ዚን ኔ ኔ̈ና ኤርሳቤ። 8ኣሲ ፌ̈ ጋሊ̇ን ሚ̈ንንዳቦ ኢስፖ̈ርታ ኦ̈ዚንዳ ጊላ̇ ጊዛብ ማ̈ዳ̇̈ሬ፤ ጾ̈ሳ̇ብ ጎሽታዚን ፌ̈ና ኤርሳዚንዳ ዎቲናካሬ ዓቶ̇ ላይን ጋርታ̇ር ማ̈ቂ̇ን ጊዳክ ዬ̈ዝ ላይን ጋርታ̇ሬ ታስፋ ዎኮታ̇ቦ ዎይ ባዛብ ማ̈ዳ̇̈ሬ። 9ዪና̇ ሶ̈ሊንዳ ኣሲ ዎይዲ ኪን ጌዪ ኤካ̇ንዳቦ ኮሺ̇ዝ ሶ̈ላ። 10ዪዚ ዪኒ̇ቦ ጋ̈ሪ ኑ ዋ̈ዪ ዳ̈ቡሪሬ፤ ዪ̈ዳሬ ኣስ ዎይዳ ማ ዎይፖ ሺ ኣማ̇ኒዝ ኣሳን ፋዛ ሼምፓባር ዶኢዝ ጾ̈ሳ̇ ጋልዳ ታስፋ ጋዲ̇ኖኮታ̇ቦ።
11ዪን ባዛን ኪ̈ታቤ፤ ታማ̈ርሳቤ፤ 12ኔ̈ና ናኤ ጌዪ ኦናካር ሌቃ̈ፖጋ̈ቤ፤ ዎቲናካሬ ኔ̈ኒ ኣማ̇ኒዝ ኣሳን ዎይንቦ ኔ ሶ̈ሊዝ ሶ̈ላባራ፥ ካንባራ፥ ኣማ̇ናባራ፥ ጌ̈ሺቲባርኬ ኮሽ ኦ̈ሳባራ ኢንታ̇ብ ሚሳ̇̈ሊ ማ̈ቃ̇ር ቤንታ̇ቤ። 13ቴ ዬይዝ ድራስ ዎርዣ̈ቦ ጌ̈ሻ ማጻ̈ፋ ናባ̇ባ፥ ኢንታ ዞራንዳብኬ ታማ̈ርሳንዳቦ ሚጛ̈ቤ። 14ዎ̈ሳ ኬ̈ ጪጛሻን ፌ ኩሺን ኔ ጋልዳ ጋዳ̇ር ኔ̈ብ ዎ̈ሲ̇ን ካ̈ያባር ኔ̈ብ ኢሚ̇ንቲ̇ኖ ኣያ̇ና ኪልሲን ቦቲጛፔ። 15ኔ̈ኒ ኮሽ̇ ዲጫ̇ሙታ ዎንዶ ኣሲ ዎይ ቤቃ̇ምፔ̈ኒ ዪን ባዛን ሚጛር ኦ̈ሙታ ዶኣቤ። 16ኔ ኔ ቆሚንዴኬ ኔ ታማ̈ርሳዝ ቲሚርቲ̇ንዶ ሚ̈ጛር ና̈ጋቤ፤ ባዛን ዪንባራ ሚ̈ጛቤ፤ ኔ ዪኖ̇ ዎቴጌይንዶ ኔ ቆሚ̇ንዲኬ ኔ̈ኮን ሲስኪ̇ዝ ኣሳን ኔ ፋ̈ሬ።
Currently Selected:
1 ጢማ̈ 4: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
