1 ቆሮ 8
8
ኤ̈ቃብ ሹኪንቲ̇ኖ ኣይሽ
1ማ ኤ̈ቃብ ሹ̈ኪንቲ̇ኖ ኣይሽ ጎይ ዪንቲ̇ ጌይኖንዲፌ̈ኒ ኪን ኑ ዎይንቦ ኤራ ዎ፤ ማ̈ቂ̇ናካሬ ኤሮ ኣስ ኦቲርሲ̇̈ሬ፤ ካን ኣስ ሚ̈ን ኤሲ̇̈ሬ። 2“ታ̈ብ ኤራ ዎ” ጌይዝ ኣሲ ዎኮ ኢ ኤራንዳ̇ብ ኮሻ̇ዝ ባዚን ዎይ ቢርት ኤራካ̇ዬ። 3ጾ̈ሳ̇̇̈ ካዝ ኣሲ ኢ ጾ̈ሳ̇ ቲ̈ን ኤሪንቲ̇ኖ ማ̈ቂ̇̈ሬ።
4ዪዚ ኤ̈ቃብ ሹ̈ኪንቲ̇ኖ ኣይሽ ሙይዝ ጎይ ቴ ጌይዝ ባዚ ዎ፦ ዓና̇ ኣላሚን ጋልዳ ጻላሆ ሜላ̇ ዓሪ ፋባሶ ባዝ ማ̈ቂ̇ኖንዲኬ ማ ጾ̈ሳ̇ ፔታ̇ናፖ ሜላ ጾ̈ሲ̇ ባዮ̇ን ኑ ኤሪ̈ሬ። 5ጾ̈ስ ባይዶር ኣሲ ኢንታ ጾ̈ሴ̇ ጌዪ ጼይጊዛን ዎይሊን ማቃ ጾ̈ስ̇ኬ ዎይሊን ላ̈ን ኣፋር ማቂን ሳ̈ዳ̇ር ዎ ጌይናካሬ፥ 6ኑ ጾ̈ሳ̇̇̈ዲ ዎይ ባዝ ኮ̈ቺ̇ኖ ኢያ ማ̈ቂ̇ኖንዲኬ ኑ̈ናር ኢዬይ ማ̈ቂ̇ኖ ፔታ̇ና ጾ̈ሳ̇̇፥ ባ̈ባ̈ ኢ ሙ̈ታ̇፤ ማ ዎይ ባዝ ኮ̈ቺ̇ኖ̈ዲኬ ኑ̈ናር ሼምፓባር ጋዲ̇ኖ ፔታ̇ና ጎዳ ዬሱ̈ስ ክርስቶ̈ሳ ሙ̈ታ̇።
7ዎቲናካሬ ዪኖ̇ ኤሪዛን ዎይን ጊዳካ̇ዬ፤ ፔቲ̇ ፔቲ̇ ኣሳን ዓኖ̇ ዬሊ̇ዝ ዲራስ ኤ̈ቃብ ጎሽቲ̇ ሎሲኖኮታ̇ቦ ዪኒ̇ፌኖ ኣይሽ ሞ̈ምባ̇ራ ኣይሺን ኢዛ ኤ̈ቃብ ሹኪንቲ̇ኖ ኣይሽ ኢንታ̇ክ ማይጻ̈ሬ፤ ኢንቲ̇ ኮሽ ማ̈ቂ̇ኖንዲኬ ኢ̈ታ ማ̈ቂ̇ኖ ባዚን ቆሪ ኤሪባ̈ሶኮታ̇ቦ ኢዞ ሞ̈ምባ̇ራ ባዝ ኢዛ ኢንታ̇ ቄ̈ሬ። 8ዎቲናካሬ ፊሺ ኑ̈ና ጾ̈ሳ̇̇̈ባር ዳቢባ̈ሴ፤ ኑ ሞ̈ካ̇ይ ኣቴጌይናር ኑ ጋልዳፖ ዲሪጚዝ ባዚ ባዬ̇፤ ኑ ሞ̈ራር ጉ̈ጂዝ ባዚ ባዬ̇።
9ኪንባር ዪንቲ̇ ኮዪኖ ባዝ ሞ̈ንዳብ ዳንዳኢ̈ሬ። ዎቲናካሬ ዪንቲ̇ ዎታ̇ዚን ቤቃ̇ር ኣማ̇ናባር ሚ̈ጛካዮ ኣሳን ናጋራ ጋርታ ጌላካ̇ዮ̈ዲፌ̈ን ና̈ጊንቲ̇ብቴ̇። 10ኔ̈ኒ “ታ̈ብ ኤራ ዎ” ጌያሙታ̇ ዛባ̇ ጋርታ ዶኣራ ኤ̈ቃብ ሹኪ̇ኖባዝ ሞ̈ዚምባራ ኢ̈ቲንዲክ ኮሺ̇ንዲክ ቆሪ ኤሪባ̈ሶ ኣሲ ኔ̈ና ቤቃ̇ሪ ኤ̈ቃብ ሹኪ̇ኖ ኣይሽ ሞ̈ንዳብ ኢጪ̇ባ̈ሴ። 11ዪዚ ክርስቶ̈ሲ ኢ ጊሻ̇ብ ዓይቂ̇ኖ ዪ̈ ኣማ̇ናባር ሚ̈ጛካ̇ዮ ና̈ሳ ኔ ኤሪን ኢያ ይሲ̇ኔ ጌንቴ̇። 12ዪዚ ዪኒ̇ፌ̈ን ዎቲሙታ̇ ዪንታ̇ ኢሺንታን ጋልዳ ናጋራ ኦ̈ሙታ̇ኬ ኢንቲ ̇“ዓና̇ ናጋራ ኦ̈ሳ” ጌዪ ቆፓ̇ዝ ባዚን ኦ̈ምፔ̈ን ዎቲሙታ̇ ክርስቶ̈ሳ ባሊ̈ሬ። 13ዪዚ ቴ ሞ̈ዝ ባዚንዳ ቴ ኢሻ̈ ና̈ጋራ ኦ̈ሳ̈ርኮ ቴ ኢሻ ናጋራ ኦ̈ሳካዮ̈ዲፌ̈ን ቴ ዉርሳ ኣይሽ ጌይዝ ባዝ ሞ̈ብዳ።
Currently Selected:
1 ቆሮ 8: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
