Yasaqya 2
2
WAY BAYE WAA WAGARI
(Miika 4:1-3)
1Aham, Yalli Yarusalaam kee Yuudâ-rasih giddinaamak Amóx-Yasaqyah-gabat ruube farmo. Too farmo intaamah:
2Tamaatu wayta ayroorah addat
YALLIH Qibaadah-Qari elle yan qale
kulli'kkek fayyah giffa axcele.
Kulli qalek fayyah giffa luk raaqele.
Kulli koomak fayyah giffa luk raaqele.
Baadal tan ummatta tet fan amaatele.
3Mango baaxol yan mari too saaku iyyu waamah,
«Qibaadâ-Qari elle yan YALLIH-Qale fan nee beya» tittak axcelon.
«Israayil ummat doore Dageltih-Qibaadah-Qari elle yan arac nawaqu wayna.
Yalli tokkel isih faxem nee barsele.
Usuk faxe gitat gexenno» 'yaanam axcelon.
YALLIH-baritto elle tanim, Yarusalaam magaalaay;
Siyon qalek isi ummat lih yaaba.
4Mango doolatwah fanat bica abeleeh;
baaxooxal yan tittin-way bicsele.
Qeebi edde abak sugen seefwa
buqre edde aban biriitah korselon.
Qeebi edde abak sugen macaxu
caxak luud edde yargiqen gileelah gacselon.
Tahak wadir doolatwa gaaduh tittah magexxa;
ahaysa qeebi tittat aboonuh masilaacsitan.
5Tonnal hay! Yaqkuubuk rade maraw, YALLI neh yecee ifut genxa'gidih ama.
YARUSALAAMAL YAN UMA-DIINI
6Yallaw, Yaqkuubuk rade isi marak texxeereh. Oson ayrô-mawqa le kabul yan mara kee Filistiinih yooboke mari ken barse baab taamah haysiten. Isinni qaada cabba heenih marin qaadah tanim aben. 7Ken baaxol dahab kee lakqo kibuk tan. Oson yedderen duyye kaxxam mango. Ken baaxol mango faaris yan. Oson lon gaariirak loowo matamixxiga. 8Ken baaxol xeet kee cooxuk bicsen duyyeeyay yaqbudeeni kibuk tan. Too duyyey isinni gabak bicseenihiyya yaqbudeenih, gabat oren duyyeh gomboh radan. 9Tohih sabbatah kulli num keenik qaybit radeleeh, gaca mara akkelon. YALLAW, keenih maracmatin.
10YALLA kee kay kaxxa nabnah meysih, xixxaq le qaleela kee baaxô-bagul dagen boodoodah addat ombooqora. 11Sahdâ-kaxxiina kee anaani gaba edde kalta wakti amaatele. Too ayro nabna luk raqtu waytam, dibuk YALLA.
12Macaay inteenik, YALLAY Nabaamak Nabahiyya ayro le. Too ayrot qande leemiiy kaxxiina kee qubbuy intam inkih wacarroysele. 13Lubnaanal tan sariida kee Basan rasul tan garsa baysele. 14Amo xer qaleela kee koomaamiiy, 15xer ikkek yamaate mara akak yabloonuh bicsen fayya 'ta arooca kee megdebih bicsen gasoosa elle sugte baaxo booxah cabba heele. 16Kaxxa nabna kee qaxa le maraakib finqisele. 17-18Sahdayti kaxxiina kee anaani gaba kaleleeh; Yallih aftok aqbuduk sugen xeet kee coox bayele. Too ayro nabna luk raqtu waytam, dibuk YALLA. 19Usuk baaxo yasgayye'gidih yamaatu waa saaku, YALLA kee kay kaxxa nabnah meysih, ummat gablah addat tambooqorem kee booriimah addat tambooqorem akkele. 20Too ayro dahab kee lakqok bicsen duyyey yalla 'yeenih aqbuduk sugeenihiyya baaxot qideloonuuh; woo duyye elle qiden arac gablâ-kimbir kee hantuuti-dabqi akkele. 21YALLI baaxo yasgayye'gidih yamaatu waa saaku, ummatta kaa kee kay kaxxa nabnah meysih, gabla kee booriima le qaleelah bagut ambooqorelon. 22Tonna'mmay sahdaytuy rabah yakkehiyyal kibaal mahana. Sahdayti ma tuxxiq leh?
