Aster 9
9
YAHUUD MARI ISI NAQBOYTIT SELEH
1Adar deqsita alsak taban kee sidochaytoh ayroy duma Yahuuduh yooboke mara qida 'yaanamih amri edde yeceenihiyya toofeeh; Yahuud niqibuk suggu 'ye mari too alsat isinni gubat ken haanam faxak yenen. Takkay immay toh makkinnay, wohih aftok Yahuud-mari keenik yaysem tibbixe. 2Yahuud mari elle aninnaan magaalak gudel keenit qeebi abuh amaatinnaan marat qeebi aboonuh ittikiyya 'yeeniih, bical gacen. Sahda elle aninnaan ikkel meysik gexxaamah, num keenit koysite cineh. 3Rakaakayittel doolat saqoltih yen maraay, ken xintoh abbobti kee malik taamak saqoltih yen mari inkih, Mordakay-meysik gexxaamah, Yahuud marih kabu gacen. 4Mordakay kaxxa arac le numuy abbootan geyak geya yekkem malik abbah elle enna 'ya baaxol inkih tontoobbe. 5Tonna leemiik Yahuud-mari duma naqboytiitih keenik suge marak isinnih faxxa haanam aben. Seefit ken yusguuden.
6Suusâ-magaalay inaytah-tanihiyyal Yahuud-mari koona boolih num qide. 7-10Too maray qideenihiyyak taban Haaman xaylok ten. Migaaqah Farsandata kee Dalfon kee Asfata kee Foraata kee Adalya kee Aridaata kee Farmasta kee Arisay kee Ariiday kee Waydaata deqsitak yenen. Yakkeenimiik Israayil qaduwwik yenen. Takkay immay qiden marih duyye mabuubinnon. 11Too ayrot edde Suusâ magaalal sahdak qideenih gide malikih warsen. 12Sarrak malik Asterik iyyeemih, «Suusah addal dibuk Yahuud mari koona boolih num qide. Haaman xayloh agantah seleenih. Dibuk Suusâ magaalal ta gide akak qideeni aki magaaloolil wohuk fula qide'kal maraaqaanam digga le. Taway hay maca faxak raqte? Uxih faxxam tellek geetto. Kalah faxxam tellek yoh waris, koh abeyyok» teetik iyye.
13Aster too waqdi kaak inteemih, «Malikow, atu raabittek, ta saaku abeenim kaadu Suusâ-magaalal beera qagsaana'gidih, ruksat keenih ucuy. Haaman xayloh tabanak raysa takara inxic» inte. 14Malik is inxicca intem oggoleeh, absiiseh. Haaman xayloh tabanak ginaada gubbik bagul sahda elle table ikkel takaren. 15Adar deqsita alsak taban kee fereyhaytoh ayro Yahuud mari yakkeemiik gaabowwa 'yeh Suusâ magaalah addal kaadu sidooca boolih num qiden. Too saaku kaadu duyye keenik mabennon.
16Yahuuduk rakaakayitteh addal yen mari kaadu yittikiyeh bical gace. Ken niqibuk suge marak malcina-taban kee koona alfih num qideenih immay, duyye keenik mabuubinnon. 17Tah edde tekkem, Adar deqsita alsak taban kee sidochaytoh ayrok ten. Taban kee fereyhaytoh ayroy ciggiltahiyya qidimik yeedeenih. Too ayro farcatak gacca 'yeenih qiidih asen. 18Takkay immay Yahuuduk Suusa deqsitta kaxxa magaalal suge mari, too alsak taban kee konoyhaytoh ayro qiidih farcatak asen. Toh akah abeenim, taban kee sidochaytoh ayro kee taban kee fereyhaytoh ayrot naqboytiitih keenik suge mara selak suggu 'yeenih, taban kee konoyhaytoh ayrot qidimik yeedeenih. Too ayro qiidih asen. 19Tohuk gexxaamah tohuk wadir, Yahuuduh yooboke maray qunxa magaaloolil sugehiyya taban kee fereyhaytoh ayro africuk qiidih edde asaah; kulsa le maaqo tittah edde yecee ayro tekke.
FUURIM DEQSITA QIIDIH ASEN
20Mordakay tekkem inkih kitaabah yuktubeeh, sarra kaadu waraakit uktubba heeh Fursi-rasul enna 'ya Yahuud maray xeri'kke kee xayi'kkel yanihiyyah inkih ruube. 21Too waraakitil ken yiysixxigeemih, Adar alsak taban kee ferey kee taban kee konoyhaytoh ayrot kulli sanatal qiidih asa. 22Ta namma ayro Yahuud mari naqboytit edde bayse ayro; ta alsat akke raarte rooka kee niyâ-digloh aftok africuk kee ruffu edde iyyen ayro. Tonna-kinnuk tama namma ayro qiidih asaay, kulsa le maaqo tittah ucuya. Masaakiinah kaadu acwa ucuya 'yaanam elle tan warkat keenih ruube. 23Tohuk wadir Yahuud mari Mordakay inxicca 'yem kataateeh, too ayrok lakal kulli sanatal too namma ayrot qiidih asan.
24Hammadaatá-Haaman deqsita numuy Agag deqsitta kedoh yoobokeeh, Yahuuduh yooboke marak naqboytah sugehiyya ramli qideeh, ramli ken afat Fuurim deqsitak yen. Ramli akah qidem Yahuud bayisuh ramli edde yawqe ayro yaaxige'gidik ten. Yahuud mara inkitanuuk saabo cabsiisam faxe. 25Takkay immay Aster malikil gexxeeh, too saaku malik amri yecee. Haaman Yahuuduh loowe umaane kaal tuduure. Kaa kee kay xaylo takkartinteh. 26Toh edde tekke ayroorak Fuurim qiidi akah iyyeenim, tohih sabbata. Mordakay yuktube warkat kee keenit tekkeemik gexxaamah, Yahuud-mari too ayroorak Fuurim-qiidi iyye. 27Yahuud mari isi kee isik rade mara kee Yahuud yekke maral inkih, kulli sanatal ta namma ayro, Mordakay elle inxicca 'ye innal, qiidih asaanam tohuk temeete. 28Tohuk wadir kulli way sanatal ta namma ayro Yahuuduh ubukka 'ye num elle aninnaan magaala kee rakaakayal qiidih asay 'yaanamal gaba kalen. Too qiidik migaaqah Fuurim qiidi iyyen.
29Malikáh ten Aster warkat taktubeeh, too warkatal leh tan abbootanak ugutak, duma Mordakay yuktubeh suge Fuurim qiidih qaada akah maaqile waan innah keenil diggosse. 30Too warkatay yuktubeenil, Malik-Ekserkas xintoh gubat yan rasul enna 'ya Yahuuduh yooboke marah yuktuben warkata 'yaanam bagul akak ten. Yahuud marah amaan kee wagari gacay 'yaanam addal akak ten. 31Toh lih kaadu, «Ahak duma soom kee rookah ayroh massakaxxah madqa eyyeqqa heenih too ayro assakaxxayuk elle sugen gurral, Fuurim deqsita qiid gufa saaku sin kee siinik radu waa mara too ayro tassakaxxeenimiiy qiidih asaanama» 'yaanam elle ten. Taham amrisseeh tuktubem, Mordakay kee Asterik ten. 32Aham diggoysa amriy Aster tuktubehiyya xambaqu le warkatal yuktubeenih yenen.
