रोमि 4

विस्वासता द्वारा परमेस्वरना मुने येताना योग्य ठहरे मायाना साटि अब्रहामना उदाहरण

1ते मावोर पुरकातोर बाबो अब्रहाम परमेस्वरना मुने येताना योग्य ठहरे मायानाता बारेते बाताल इन्काट? 2अब्रहामिन ओना बुतोता कारणते परमेस्वरना मुने येताना योग्य ठहरे मातोर ते ओना हजोरपण कियाना पोल्लो मता मति ओर परमेस्वरना मुने हजोरपण किया परोर। 3पवित्र पुस्तकतिगा इदेना बारेते बाताल कोटता मन्ता? “अब्रहाम परमेस्वरनिगा विस्वास कितुर अनि ओद विस्वासता द्वारा ओर परमेस्वरना मुने येताना योग्य ठहरे मातुर#उत्प १५:६; गला ३:६” इन्जोर मन्ता।

4मति बुतो केवालना रोजि हियाना बोदे दान आयो मति ओद ते रोजि पुटाना ओना हक्क मन्ता। 5मति परमेस्वरना बुतो मानेयना लेहका आयो। बोरे मानेय आपुना बुतोता कारण परमेस्वरना मुने येताना योग्य बनेमाय परोर, बोरे परमेस्वरनिगा विस्वास किन्तोर ओन परमेस्वर आपुना मुने येताना योग्य ठहरे किन्तोर। 6परमेस्वर बिना बुतोते आपुना मुने येताना योग्य ठहरे किन्तोर ओर मानेय पकाय धन्य मन्तोर इन्जोर दावुद वने इदेना बारेते इन्तोर:

7“गुना मापि आतु अनि पापतुन उमसतोर ओर लोकुरक धन्य मन्तोर।

8अनि प्रबु पापि ठहरे केवोर ओरक मानेय धन्य मन्तोर#भज ३२:१-२”

इन्जोर दावुद पवित्र पुस्तकतिगा कोटतोर।

9ते इद आशिष बाताल केवल कतना केवालोरकुन साटि मन्ता? या बाताल कतना आयोर लोकुरक साटि वने मन्ता बहे? अब्रहामना साटि ओना विस्वासता कारण परमेस्वरना मुने येताना योग्य ठहरे मातोर इन्जोर माक वळकिन्तोरोम। 10ते येर बसकेय परमेस्वरना मुने येताना योग्य ठहरे मातुर, ओना कतनाता मुने या ओना कतनाता पजा मता बहे? आयो! ओना कतना आयानाता पजा आयो मति कतना आयानाता मुने ओर परमेस्वरना मुने येताना योग्य ठहरे मातुर। 11अनि ओना कतनाता मुने विस्वासता द्वारा पुटता दारमिकताता शिक्का लेहका कतनातुन आपुना मेन्दुलतिगा येतितुर। इदाम बिना कतनाते बोर विस्वास किन्तोरक ओरक सबोय लोकुरकुन ओर बाबो आयान साटि इदाम ओरा विस्वासता द्वारा ओरकुन परमेस्वरना मुने येताना योग्य ठहरे मायाना साटि मन्ता#उत्प १७:१०। 12अनि ओर केवल कतना कितोरक लोकुरा आयो मति कतना आयाना मुने अब्रहाम विस्वासते ताकिन्दुर अदाम लेहका अब्रहामना ओद विस्वासता अनुसार ताकान्तोर ओर लोकुरा वने बाबो मन्तोर।

विस्वास किन्तोर सबोय लोकुरक साटि परमेस्वरना वाचा

13इद दुनियाता वारिस आयनुर इन्जोर वाचा अब्रहाम अनि ओना वंशतुन मूसाना नियमता द्वारा पुटो मति विस्वासता कारण परमेस्वरना मुने येताना योग्य ठहरे मातुर इन्जोर पुटता। 14नियमतुन मानेमान्तोरक ओर लोकुरक वारिस मन्तोरक ते विस्वासता बोदे अर्थ हिले अनि परमेस्वर अब्रहामिन हिता वाचावने बेकार आन्ता#गला ३:१८। 15बाक्याकि लोकुरक नियमता पालन केवोरक इन्जोर परमेस्वरतुन होंग वान्ता मति मूसाना नियम बगा हिले अगा नियमता पालन वने केवो आयाना आय परो।

16इन्जोर परमेस्वरना वाचा विस्वासता काया आन्दु अनि इद परमेस्वरताल दया आस फुकोटते पुटान्ता। इद प्रकारते परमेस्वरना वाचा अब्रहामना सबोय वंशज साटि मन्ता। केवल नियमतुन मानेमान्तोरक ओर लोकुरकुन आयो मति अब्रहामना लेहका विस्वास किन्तोरक लोकुरकुन वने पुटार इन्जोर पका कियाना साटि मन्ता#गला ३:७। बाक्याकि अब्रहाम माक सबोय लोकुरा बाबाल मन्तोर। 17हातोर लोकुरकुन जितो किन्तोर अनि बोव पोल्लोंग हिलेंग अव पोल्लोनुंग बनेहकिया परान्तोर इन्जोर परमेस्वरना बारेते अब्रहाम विस्वास कितोर। ओर परमेस्वरना मुने अब्रहाम मावोर सबोय लोकुरा बाबो आयाना साटि “नना निकुन पकाय जातिता बाबो ठहरे कितोना” इन्जोर पवित्र पुस्तकतिगा कोटता मन्ता#उत्प १७:५।

18“निया वंशज आबाळतांग हुकोंग इचोन आयनुंग” इदाम वाचा अब्रहामिन पुटतु। अनि ओद वाचा पुरा आयाना परिस्थिति ओना जिवनते हिले आसि ते वने ओद वाचा पुरा आयार इदाम ओर आशा इरस विस्वास कितुर#उत्प १५:५। 19ओर उन्दि नुर वरसाना हेरे आस मतोर, आपुना मेन्दुलते बालक जन्मे कियाला परोर अनि ओना मुत्ते सारा वान्जिलि अनि पकाय सेळो आस मता इव पोल्लोंग पुन्ज वने ओर आपुना विस्वासते कमजोर आयोर आतुर#उत्प १७:१७। 20अनि ओर बसकेय परमेस्वरना वाचातुन अविस्वासते शंका केवोर मति विस्वासते मजबुत आस परमेस्वरना महिमा कितुर। 21परमेस्वर हितोर ओद वाचा पुरा कियान साटि ओर परमेस्वर सबोय रितिते लाववाले मन्तोर इन्जोर अब्रहाम सोबाय समजेमातुर। 22इन्जोर ओद विस्वासता कारण परमेस्वर ओन आपुना मुने येताना योग्य मानेय ठहरे कितुर#उत्प १५:६ ।

23अनि “ओद विस्वास ओना साटि दारमिकता ठहरे मातु” इद पोल्लो केवल अब्रहाम साटि कोटता हिले, 24मति मावा साटि वने मन्ता। परमेस्वर येसु मसिन मावा पापताल मुक्ति साटि हायिला हितुर अनि माकुन परमेस्वरना मुने येताना योग्य बनेकियान साटि ओर येसु मसिन हातोरिगाडाल असा जिवेहकितुर#यश ५३:४-५। 25मावोर प्रबु येसु मसिन हातोरिगाडाल असो जिवेहकितोर ओर परमेस्वरनिगा विस्वास कितोरक माकुन वने अदेना द्वारा परमेस्वरना मुने येताना योग्य ठहरे कियान साटि मन्ता।

Currently Selected:

रोमि 4: fmu

Highlight

Copy

Compare