रोमि 13

सबोय अदिकारि लोकुरा आदर किम्ट

1सबोय विस्वासि लोकुरक आपुना सरकारता मुक्य अदिकारिना अधिनते मन्दिला पहाजे बाक्याकि ओर अदिकारिलोकुरकुन परमेस्वरे अदिकार हितोर। सबोय अदिकार परमेस्वरनिकेडाले मन्ता अनि ओरकुन परमेस्वरे आचतोर। 2इन्जोर सरकारि अदिकारिना आग्याता पालन केवोर ओर परमेस्वर बनेहकिता आग्याता विरोद किन्तोर अनि बोर इदाम विरोद किन्तोर ओन परमेस्वरताल पका दन्ड पुटार। 3अनि सोबाय बुतो किन्तोरक ओर लोकुरक अदिकारिलोकुरकुन वरियाना जरुरि हिले मति बोर खराब बुतो किन्तोरक ओरके वरियान्तोरक। इन्जोर निमाट अदिकारिलोकुरकुन वरियाना इच्चा केविट ते सोबाय बुतो किसोर मन्ट असके ओरक मिया स्तुति कियानुरक। 4बाक्याकि मिया भलाकियान साटि परमेस्वर ओरकुन सेवकता रुपते आच इरतोर। मति निमाट खराब बुतो कियाकिट ते ओरकुन वरियाट बाक्याकि मिकुन दन्ड हियानाता अदिकार ओरा कयदे हिता मन्ता। अनि खराब बुतो किन्तोर ओरकुन दन्ड हियान साटिय परमेस्वर ओरकुन आच इरतोर। 5इन्जोर निमाट ओरा अधिनताते मन्दिला पहाजे। केवल दन्डता वरेते आयो मति मिया अन्तकरणता कारणते इदाम कियाला पहाजे। 6इन्जोर निमाट अदिकारिलोकुरकुन टाक्स वने हियाला पहाजे बाक्याकि परमेस्वर ओरकुन हितोर ओद बुतो ओरक परमेस्वरना सेवक लोकुरक लेहका पुरा किन्तोर#मत्ति २२:२१; मर १२:१७; लूका २०:२५। 7अनि ओरक अदिकारिलोकुरकुन बोद हियाना मन्ता ओद हिम्ट। बोन टाक्स हियाना मन्ता ओन टाक्स हिम्ट, बोन महसुल हियाना मन्ता ओन महसुल हिम्ट, बोन वरियाना मन्ता ओन वरियाट बोना आदर कियाला पहाजे ओना आदर किम्ट।

निमाट वरोर दुसरोन मयाकिम्ट

8निमाट वरोर दुसरोनासंग बोदायि पोल्लोते करजदार आयमाट मति केवल मया कियानातिगा करजदार बनेमाम्ट। बोर दुसरोन मया किन्तोर ओरे परमेस्वरना सबोय नियमता पालन किन्तोर। 9बाक्याकि व्यभिचार केमाट, हव्कमाट, कलाना बुतो केमाट, लालुच इरमाट इदाम दुसरो सबोय नियम “बदाम आपुनतुन मया किन्दोम अदामे आपुना हेरेटोरकुन वने मया किम्ट” इन्जोर ओद आग्यातिगा कलयिन्ता#निर २०:१४; व्यव ५:१८; निर २०:१३; व्यव ५:१७; निर २०:१५; व्यव ५:१९; निर २०:१७; व्यव ५:२१; लेव्य १९:१८। 10दुसरोन मया किन्तोर ओर आपुना गोतियान खराब बसकेय केवोर। इन्जोर मया कियाना मन्जे परमेस्वरना सबोय नियमता पालन कियाना मन्ता।

11अनि माक बोद काळदे जिवेमायिला आतोराट अदेन पुन्ज नना मिकुन वेहता ओदे पोल्लो किसोर मन्ट। अनि बोर हुन्जताप मन्तोर ओरा तेदाना बेरा वाता बाक्याकि माक पुटता पिसाना पुरा आयाना ओद बेरा माक मसिनिगा विस्वास किता ओद बेराताल इदेक पकायि हेरे अवता। 12इदेक नरका मारार अनि दरोजता दियाता ओद वेळिचि पसियवाल मन्ता इन्जोर पापता अन्दकारतिगा लोकुरक बोद खराब बुतो किन्तोरक ओव सबोयतुन माक तासियाला पहाजे। अनि बदाम वरोर सयनिक हत्यार पयस तयार मन्तोर अदामे माक वने खराब बुतोता विरुद दियाता वेळिचितिगा सोबाय बुतो कियान साटि तयार मन्दिला पहाजे#इफि ६:११,१३; १ तिस ५:८। 13अनि लोकुरक दियाता वेळिचितिगा बदाम सोबाय बुतो किस जिवे मान्तोर अदामे माक वने सोबाय बुतो किस जिवेमायिला पहाजे। माकुन जेवेकियाना साटि केयानातिगा हन्जुन दाळंगो उन्जुन गलति रितिता गिरदाते मन्दाना आयो, अनि व्यभिचार किस खराब जिवन जिवे मायमाट। अनि माक दुसरोन हेवा किस वाहचमाट। 14मति बदाम प्रबु येसु मसिना जिवन मता अदामे जिवन निमाट वने जिवेमाम्ट। अनि आपुना मेन्दुलता पाप स्वभावता इच्चातुन पुरा कियाना कोसिस केमाट।

Currently Selected:

रोमि 13: fmu

Highlight

Copy

Compare