बुतोंग 28

समुद्र नडुमता माल्टा पोरोयता टापुतिगा पोलुस

1माक पिसियस समुद्र टकातिगा अवतोम असके ओद टापुता पोरोय माल्टा इन्जोर माक पुतोम#२८:१ क्रेता टापुताल नोव नुहक किलो मीटर लकताल जास्ति मता माल्टा टापु।। 2ओद टापुतिगा मन्वालोर लोकुरक दयाते पकाय पाहुन्चार कितुरक, बाक्याकि पिरता अनि पिनिता मोवसम मता इन्जोर ओरक किस पयटेकिस माक सबोयलोरकुन मन्दिला हितुरक। 3पोलुस कटियांगना मोरि तचुन किसतिगा इरतुर असके उन्दि पकाय जेहेरवाला तरास किसताल पसियस ओना कयदुन कसकुन वळंगस कित। 4असके अगा मन्वालोरक लोकुरक तरास ओना कयदुन कसकुन वळंगाना हुळस आपसते इतुरक: “खरोय येर मानेय हव्कवाल मन्तोर, येर समुद्रताल पिसतुर ते वने न्यायदेवता जितो मन्दिला हेवो।” 5असके पोलुस तरासतुन किसतिगा झटके किसितुर अनि ओन बाराय नुकसान आयो आतु। 6मति ओर तोयनुर या हुरहायने अरस हायनुर इन्जोर ओरक विचार किस पकाय बेरावनाह हुळसोर मतोरक मति ओना बाराय बिगळेमायो इन्जोर हुळतुरक असके आपुना विचार बदलेह किस इतुरक: “येर ते बोरे पेन आन्दुर।”

7ओद जागाता हेरे-गुरे ओद टापुतोर मुक्याल अदिकारि पुबलियोसना डन्ड मता। ओर माकुन आपुना लोन ओस मून्ड दियांग गोतियाल लेहका पाहुणचार कितुर। 8पुबलियुसनोर बाबो पिनि अनि गुला पोटा रेयाना बिमारिते मतोर। पोलुस ओना हेरे हन्जुन प्रार्थना कितुर अनि ओनागा कय इरस ओन सुदरे कितुर। 9इदाम आतु असके ओद टापुतोर पिसतोर बिमार लोकुरक वने वातुरक अनि पोलुस ओरकुन वने सुदरे किसोर मतोर। 10ओरक माकुन पकाय सम्मान हिस माकुन आदर कितुरक, अनि माक जहाजते हन्दिला साटि पसियतोम असके मावा साटि जरुरि मता सबोय चिज जहाजतिगा इरसितुरक।

पोलुस रोमि सहेरतिगा

11मून्ड महिनाना पजा पिनिमेन्ड रोमस मता उन्दि सिकन्दरिया सहेरता जहाजतिगा अन्ज माल्टा टापुताल पसियतोम। अनि ओद जहाजतिगा जेयुस पोरोयता पेनता मरकना चिन्हा मता। 12पजा माक सुरकुस सहेरतिगा#२८:१२ सुरकुस सिसिलि पोरोयता समुद्र नडुम मन्ता उन्दि टापुता सहेर मता अवतोम अगा माक मून्ड दियांग मतोम। 13अगडाल माक वलियस रेगियुस सहेरतिगा वातोम, अनि उन्दि दियाता पजा दक्षिण भागता वळिय वातु इन्जोर माक दुसरो दिया पुतियुलितिगा वातोम। 14अगा माकुन हुचुलोरक मसि तमोलोरक मिलेमास माक ओरागा सात दियांगवनाह मनकोम इन्जोर विनन्ति कितुरक। अनि पजा माक अगडाल रोमि सहेरतिके हतोम। 15माक अगा अवतोम इन्जोर रोमि सहेरता तमोलोरक केन्जतुरक अनि ओरक अप्पियुस नगरता हाटुम अनि मून्डटावान पोरोयता नगारवनाह#२८:१५ अप्पियुस नगर रोमि सहेरता ६९ किलोमिटर लक आस दक्षिण-पूर्व भागतिगा मता अनि मून्ड टावान नगर रोमि सहेरता ५३ किलोमिटर लक आस दक्षिण-पूर्व भागतिगा मता। माकुन मिलेमायान साटि रोमि सहेरताल पसियस वातुरक, ओरकुन हुळस पोलुस परमेस्वरना धन्यवाद किस हिमत पुटतु।

16माक रोमि सहेरतिगा अवतोम असके पोलुसिन केपसोर मतोर वरोर सयनिकनासंग बोदे लोतिगा मन्दिला परवांगि पुटतु।

रोमि सहेरता यहुदि अदिकारि लोकुरासंग पोलुस

17मून्ड दियाना पजा पोलुस यहुदितोर मुक्याल लोकुरकुन केयतुर। अनि ओरक जमा आतुर असके ओर इतुर: “हे तमोहलोरक, नना आपुना यहुदि लोकुरा या आजि-दादि लोकुरा व्यवहारता विरोदते बाताले केवोन, ते वने हुचुलोर यहुदिलोकुरक नाकुन बन्दि बनेहकिस येरुसलेमताल रोमिलोरा कयदे सोपे कितुरक। 18ओरक नावा चवकसि किस नावागा हायानाता योग्य बोदे दोष हिले आसि इन्जोर नाकुन तासियाना इच्चा कितुरक। 19मति यहुदिलोकुरक इदेना विरोद कितुरक इन्जोर नाकुन आपुना लोकुरकनिगा बोदे दोष लावे कियाना हिले आसि ते वने नना हजोर राजानिके न्याय तलकिला लागतान#बुतोंग २५:११। 20इद कारणते मिकुन मिलेमास वळकिका इन्जोर नना मिकुन केयतोना। बाक्याकि इस्रायेलना आशा मसिना विस्वासता कारणते नाकुन बन्दि बेनेहकितुरक।” 21ओरक ओन इतुर: “माकुन निया बारेते यहुदिताल चिटिंग पुटोंग, अनि तमोहनिगाडाल बोरे वासुन निया बारेते बाताले दोष वेहोर अनि बाताले खराब इनोर। 22मति इद अलग दरमता बारेते सबोय जागातिगा विरोदते लोकुरक वळकान्तोरक इन्जोर माक पुन्तोरोम इन्जोर निया विचार बाताल मन्ता अदेना बारेते माक नियाकेडाल केन्जाना इच्चा किन्तोरोम।”

23असके यहुदिलोकुरक उन्दि दिया ठहरे किस पकाय लोकुरक ओना लोन जमा आतुरक; अनि ओर परमेस्वरना राज्यता गवाहि हिसोर अनि मूसाना नियम अनि परमेस्वरना पोल्लो वेहवालोरा पुस्तकताल येसुना बारेते कोटतोर पोल्लो समजेह किस सकारताल नुलपेह बेरावनाह वर्णन किसोर मतोर। 24असके हुचुलोर लोकुरक ओव पोल्लोनुंग मानेमातुरक, अनि हुचुलोर लोकुरक विस्वास केवोर आतुरक। 25ओरक आपसते सहमत आयोर आस तेदचुन हन्दिला लागतुर, असके पोलुस ओरकुन उन्दि पोल्लो वेहतुर, 26“पवित्र आत्मा परमेस्वरना पोल्लो वेहवाल यशायाहना द्वारा मिवोर बाबो-दादिलोरकुन बराबर इतोर,

‘निमाट कविते केन्जकिट मति समजेमायो आयकिट,

अनि कोन्डांगते हुळसोर मनकिट मति मिकुन दिसो आयार।

ओरक बसकेय कोन्डाते हुळिर अनि कविते केन्जिर अनि मन्दे समजेमास पस्तेमायिर,

27अनि नना ओरकुन सुदरे किया परोन इन्जोर येर लोकुरा मन कटिन अनि ओरांग कविंग पुहतांग मन्ता;

अनि ओरा कोन्डांग बन्द कितोरक इदाम ओरा हेरे हन्ज वेहा#यश ६:९,१०’।

28इन्जोर परमेस्वर पिसानाता इद पोल्लो यहुदि आयोर लोकुरा हेरे लोहतोर; अनि ओरक केन्जानुरक इन्जोर निमाट पुन्ट।” 29पोलुस इद इतुर असके यहुदिलोकुरक पकाय होंग किस अगडाल हतुरक।

30पोलुस पुरा रन्ड वरसांग आपुना किरायाता लोतिगा मतोर। अनि पकाय लोकुरक ओना हेरे वान्दुरक अनि ओना हेरे वातोरक सबोय लोकुरासंग ओर मिलेमासोर मतोर। 31अनि पकाय हिमतते ओर परमेस्वरना राज्यता पोल्लोंग वेहचोर अनि प्रबु येसु मसिना पोल्लोंग करिहसोर मतोर। अनि बोरे ओन तकलिप केवोर आतुरक।

Currently Selected:

बुतोंग 28: fmu

Highlight

Copy