बुतोंग 21

पोलुस सूर सहेरतिगा

1माक सबोय लोकुरक इफुसुस सहेरता मसिलोकुरा सभाता मुक्य लोकुरकुन धन्यवाद किस जहाजतिगा उदितोम अनि मिलेतुस सहेरताल जहाजते सिदो हरिते विचोर समुद्र नडुम मन्ता कोस टापुतिगा वातोम, अनि दुसरो दिया समुद्र नडुमता रुदुस टापुतिगा वातोम अनि अगडाल पतरा सहेरतिगा वातोम। 2अगा उन्दि फिनिकेतिके हन्दाना जहाज पुटतु अनि ओद जहाजते मुने हतोम। 3सयिप्रस टापु दिसतु असके माक अदेन डावो कयबासाताल तासिस सिरिया प्रदेशतिके हन्दान्पा सूर सहेरतिगा रयतोम, बाक्याकि अगा ओद जहाजता सामान रेहाना मता। 4अगा मसिना हुचुलोर चेलालोरकुन मिलेमास ओरासंग सात दियांगवनाह मतोम। निमा येरुसलेमतिगा हनमा इन्जोर पवित्र आत्माता द्वारा ओरक पोलुसिन इतुर। 5ओरासंग मन्दाना दियांग पुरा आतुंग असके माक अगडाल येरुसलेम हन्दाना यात्रा सुरु कितोम, अनि सबोयलोर आसक अनि बालकसंग माकुन नाटेना बाहरोवनाह अविहतुरक अनि माक सबोय समुद्र टका हेरे मिन्डांग टेकेकिस प्रार्थना किस वरोर दुसरोनताल विदा कितुर। 6माक ते जहाजतिगा अन्जतोम मति ओरक आप-आपुना लोहक मलस हतुरक।

पोलुस येरुसलेमतिगा

7असके माक सूर सहेरताल जहाजते मुने विचोर पतुलेमयिस सहेरतिगा#२१:७ पतुलेमयिस सहेर सूर सहेरताल ४३ किलोमिटर लक दक्षिण भागतिगा मता। अनि कयसरिया सहेर पतुलेमयिस सहेरताल ५६ किलोमिटर लक दक्षिण भागतिगा मता। अवतोम, अनि अगा मसि तमोलोरकुन नमस्कार किस ओरासंग उन्दि दिया मतोम। 8जहाजते हन्दाना मावा यात्रा पतुलेमयिस सहेरतिगा वातोम असके पुरा आत। अनि दुसरो दिया माक पतुलेमयिस सहेरतिगाडाल पसियस कयसरियातिगा वातोम, अनि सुसमाचार प्रचार केवाल फिलिप्पुसना लोतिगा हन्जुन ओना लोतिगा मतोम। ओर येरुसलेम सहेरता मसिलोकुरा सभा निवळे किता सात सेवा केवालोरनिकेडाल वरोर मतोर#बुतोंग ६:५; ८:५ । 9ओना नालुंग कुवारिह पेकिह मतांग अवेहकुन परमेस्वरना पोल्लो वेहाना वरदान मता। 10माक कयसरिया सहेरतिगा पकाय दियांगवनाह मतोम असके अगबुस पोरोयतोर वरोर परमेस्वरना पोल्लो वेहवाल यहुदिया प्रदेशताल वातुर#बुतोंग ११:२८। 11ओर मावा हेरे वास पोलुसना नळितिगा दोहाना पट्टा येचुन ओर आपुनांग कय, काल्क दोहच इतुर, “नळितुन दोहाना इद पट्टाता मालकान येरुसलेमतिगा यहुदिलोर इदे रितिते दोहनुरक अनि यहुदि आयोर जातिता लोकुरा कयदे सोपेकियानुरक” इन्जोर पवित्र आत्मा इन्तोर इदाम इतुर। 12इव पोल्लोंग केन्जतोम असके माक अनि अगाडोर लोकुरक पोलुसिन येरुसलेम हनमाकिर इन्जोर विनन्ति कितुरक। 13मति पोलुस ओरकुन उत्तर हितुर: “निमाट किल्स नावा मन्दुन बाक्या दुःख किन्तोरिट? नना ते प्रबु येसुना पोरोय साटि केवल दोहान साटिय आयो मति येरुसलेमतिगा हायिला वने तयार मन्तोना” इन्जोर इतुर। 14ओर मानेमायोर ते माक “प्रबुना इच्चा पुरा आयि” इदाम इन्ज कमेक आतोम।

15अगा मन्दाना दियांग मारतु असके माक कयसरिया सहेरताल तयारि किस येरुसलेम हतोम। 16कयसरियाता चेलालोरकताल हुचुलोर लोकुरक मावासंग येरुसलेम सहेरतिगा वातुरक, अनि माकुन मनासोन पोरोयतोर वरोर मानेयनासंग येरुसलेमतिगा मन्दिला पहाजे इन्जोर ओन वने ओरासंगे ततुरक। मनासोन समुद्र नडुमता सयिप्रस टापुतोर मतोर। ओर पकाय मुनेटाले येसु मसिना चेला मतोर।

पोलुस याकुबिन मिलेमायाना

17माक येरुसलेमतिगा अवतोम असके तमोलोरक पकाय गिरदाते माकुन मिलेमातुरक। 18दुसरो दिया पोलुस मावासंग याकुबना हेरे हतुर, अगा मसिलोकुरा सभाता सबोय मुक्या लोकुरक जमा आस मतोरक। 19असके पोलुस ओरकुन नमस्कार किस, परमेस्वर ओना सेवाता द्वारा दुसरो जातितिगा बोद-बोद बुतो किस मतोर अदेन उन्दि-उन्दि किस ओरकुन सबोय वेहतुर। 20ओरक इद केन्जुन परमेस्वरना महिमा कितुरक, पजा ओरक पोलुसिन इतुरक, “हे तमो, यहुदिलोकुरक निगाडाल हजार-हजार लोकुरक विस्वास कितोरक इन्जोर निमा हुळा मति ओरक सबोयलोर मूसाना नियमतुन मानेमायाना पकायि महत्व मन्ता इदाम विचार किन्तोरक। 21मति मसि विस्वास येतितोर यहुदिलोकुरक आपुना पेकोरा कतना केमाट अनि मूसाना नियमते ताकमाट इदाम इन्जुन मूसान तासिमट इन्जोर यहुदि आयोर लोकुरकनिगा मन्वालोर यहुदिलोरकुन निमा करहान्तोन इन्जोर निया बारेते ओरक इतोर। 22निमा इगा वातोन इन्जोर यहुदिलोकुरक जरुर केन्जानुरक इन्जोर ओद पोल्लो खरोय या गलत मन्ता इदाम तोहान साटि माक बाताल कियाकाट? 23इन्जोर माक निकुन बाताल इन्तोरोम ओद किम। परमेस्वरना मुने खास शपथ येतितोर नालुरक मानेयक मावा हेरे मन्तोरक#गिन ६:१३-२१। 24येर लोकुरासंग हन्जुन ओरासंग निमा वने आपुनतुन शुद्ध किम। अनि ओरा तला टकल कियाना खर्चावने हिम। असके निमा वने आपुनास मूसाना नियमतुन मानेमास अदेना अनुसार ताकान्तोन अनि निया बारेते ओरक केन्जता पोल्लो खरोय आयो इन्जोर सबोयलोर पुन्दानुरक। 25मति मसिनिगा विस्वास किन्तोरक दुसरो जातितोर लोकुरा बारेते ओरक मूरतिता मुने बलि हिता हविंग तिनमा अनि नतुर उन्मा अनि गुळंगा आहच हव्कता जानवरता हविंग तिनमा अनि व्यभिचार केमाट इदाम माक निर्णय किस कोटस लोहतोम#बुतोंग १५:२९।” 26इदाम पोलुस ओरक मानेयकुन ओस दुसरो दिया ओरासंग शुद्ध आयाना बलिदानता कार्यक्रम पुराकिस येरुसलेम मन्दिरतिगा हतुर, अनि ओरागाडाल सबोयलोर साटि शुद्ध आयाना बलि हियानाता दियांग पुरा आयनुंग इन्जोर अगा वेहतुर।

प्रार्थना लोतिगा पोलुसिन यहुदिलोकुरक पयान्तोरक

27अनि ओरा शुद्ध आयाना अव सात दियांग पुरा आयवाल मतांग असके आसिया सहेरताल अगा वातोरक यहुदिलोरक पोलुसतुन येरुसलेम मन्दिरतिगा हुळस सबोय लोकुरकुन भळकेह किस ओरक ओन पयतुरक, 28“हे इस्रायेलोर मदत किम्ट, यहुदि लोकुरकुन अनि मूसाना नियमतुन अनि मन्दिरतुन विरोदते सबोय जागा सबोय लोकुरकुन करहान्तोर येर ओरे मानेय आन्दुर, इचोने आयो येर युनानिलोरकुन वने मन्दिरतिगा तचुन इद पवित्र जागातुन अपवित्र कितोर।” 29ओरक इदेना पहले इफिसुसतोर त्रुफिमुसिन पोलुसनासंग नाटेनिगा हुळस मतोर इन्जोर ओर त्रुफिमुसिन मन्दिरतिगा ततोर इदाम समजेमास मतोरक#बुतोंग २०:४। 30असके पुरा नाटेनिगा गळबड आतु, अनि लोकुरक उन्दि जागा जमा आतुरक अनि पोलुसतुन पयस मन्दिरताल पिळिंगसोर बाहरो ततुर, अनि सान्डेय कवाळक बन्द कितुरक। 31ओरक ओन हव्काना इच्चा किन्दुरक असके पुरा येरुसलेम सहेरतिगा गळबड आयिला आता इन्जोर सयनिक दलता मुक्य अदिकारिन सन्देश पुटतु। 32असके ओर सान्डेय सयनिक अनि सयनिक दलता अदिकारिहकुन पयस ओरा हेरे विचोर वातुरक, अनि यहुदिलोकुरक सयनिक दलता अदिकारिन अनि सयनिक लोकुरकुन हुळस पोलुसतुन हाहाना-पिटहाना बन्द कितुरक। 33असके सयनिक दलतोर मुक्या अदिकारि#२१:३३ सरदार हेरे वास पोलुसिन पयतुर रन्ड साकळिते दोहाना आग्या हितुर अनि ओर “येर बोर आन्दुर अनि येर बाताल कितोर?” इन्जोर पुच्चेमायिला लागतुर। 34मति भीळताल हुचुलोरक बाताले अनि दुसरो हुचुलोरक दुसरो बाताले जोरदे वळकसोर मतोरक। गळबडता कारण ओर खरोयतुन पुन्द परोर आतुर ते पोलुसिन किल्लातिगा ओयाना आग्या हितुर। 35ओर पायरिनिगा अवतुर असके “ओन हव्काट” इदाम भीळ जोरदे केयसोर ओना परके वातुरक। 36लोकुरा दबावता कारण सयनिक लोकुरक पोलुसिन ताहच ओयिला लागतुरक।

37किल्लाता हेरे अवतपा पोलुस सयनिक दलता मुक्या अदिकारिन#२१:३७ सरदार इतुर, “नियासंग नना हुचुक पोल्लोंग वळक परका बहे?” ओर इतुर, “बाताल निमा युनानि बोलि पुन्तोन बहे? 38ते इव दियांगना पहले विद्रोहि बनेहकिस नालुंग हजार हाहवालोर लोकुरकुन वारु पल्लातिगा ओस मतोर ओर मिस्रि देशतोर मानेय बाताल निमा आन्तोन बहे?” 39पोलुस ओन उत्तर हितुर: “नना ते किलिकिया प्रदेशता तरसुस सहेरतोर यहुदि मानेय आन्दान! नाकुन लोकुरासंग वळकिला हिम इन्जोर नना निकुन विनन्ति किन्तोना।” 40सयनिक दलता मुक्या अदिकारि पोलुसिन परवांगि हितुर असके पोलुस पायरिनिगा नितस लोकुरकुन कयदे इशारा कितुर। लोकुरक कमेक आतुर असके ओर इब्रानि बोलिते वळकिला लागतुर।

Currently Selected:

बुतोंग 21: fmu

Highlight

Copy