बुतोंग 16

तिमुथियुसिन पोलुस अनि सिलासिनासंग ओन्तोरक

1पजा ओर दिरबे अनि लुस्त्रा सहेरतिगा वने हतुर। अगा तिमुथियुस पोरोयतोर वरोर चेलाल मतोर, ओर वरोर यहुदि मसि विस्वासि आळदा मरि मतोर, मति ओनोर बाबो युनानि मतोर। 2ओर लुस्त्रा अनि इकुनिया सहेरता मसि तमोलोकुरकनिगा सोबाय स्वभावतोर मतोर। 3ओर आपुनासंग हनिर इन्जोर पोलुसना इच्चा मता अनि ओद नाटेनिगा यहुदिलोकुरक मतोरक इन्जोर ओरक तिमुथियुसिन मानेमायान साटि पोलुस ओना कतना कितुर, बाक्याकि ओनोर बाबो युनानि मतोर इन्जोर ओरक सबोयलोर पुन्दुर। 4अनि नाटे-नाटेनिगाडाल हन्जोर ओरक मसिलोकुरा खास चेला लोकुरक अनि येरुसलेमता मसिलोकुरा सभाता मुक्या लोकुरक ठहरेकिस मतोरक ओद नियमतुन मानेमायान साटि ओरकुन वेहतुरक। 5इदाम मसिलोकुरा सभा विस्वासते मजबुत आसोर हतु अनि विस्वासि लोकुरा संख्या वने दरोज विळसोर हतु।

पोलुसना दर्शन

6एशिया प्रदेशतिगा परमेस्वरना सोबाता पोल्लो वेहमाट इदाम पवित्र आत्मा ओरकुन इन्ज मतोर इन्जोर पोलुस, सिलास अनि तिमुति ओरक मुवुरास फ्रूगिया अनि गलातिया प्रदेश आसोर हतुरक। 7ओरक मूसिया प्रदेशता हेरे अवस, बितुनिया प्रदेशतिगा हन्दाना इच्चा कितुर, मति येसुना आत्मा ओरकुन हन्दिला हेवो आतु। 8आकरिते ओरक मूसिया प्रदेशताल आसोर त्रोवास सहेरतिगा वातुरक। 9ओरक नरका अगा मतुरक। अगा नरका पोलुस मकिदुनियातोर वरोर मानेय नितस “निमा मकिदुनियातिगा वाय अनि माकुन मदत किम” इदाम पोलुस उन्दि दर्शन हुळतुर। 10ओना इद दर्शन हुळतपा ओरकुन सोबाता पोल्लो वेहान साटि परमेस्वर माक केयतोर इदाम समजेमास माक#१६:१० पोलुस अनि सिलासना संग लूका वने मतोर इन्जोर “माक” शब्त उपयोग कितोर। बाक्याकि लूका इद पुस्तक कोटतोर। सान्डेय मकिदुनियातिगा हन्दाना विचार कितोम।

लुदिया पोरोयता आळ मसिन स्विकार किन्ता

11इन्जोर माक त्रोवासताल जहाजते सिदो सुमात्रा टापुतिके हतोम अनि दुसरो दिया नियापुलिस सहेरतिगा हतोम। अनि अगडाल माक फिलिप्पि सहेरतिगा अवतोम। 12ओद मकिदुनिया प्रदेशता मुक्य सहेर अनि रोमिलोरा बस्ति मन्ता अनि माक ओद सहेरतिगा हुचुक दियांगवनाह मतोम। 13यहुदि लोकुरा पवित्र दिया माक सहेरता टाटरा बाहरो नदिता टका हेरे हतोम। अगा प्रार्थना कियाना जागा मन्दार इन्जोर माक विचार कितोम। अनि माक नदिता टका हेरे उदस अगा जमा आस मतांग आसकनासंग येसुना बारेते वळकिला लागतोम। 14लुदिया पोरोयता तुयाथिरा सहेरता#तोह ३:१४ मान्जिन्ता सुति सन्दरांग मोमे उन्दि भक्ते आळ केन्जसोर मता। ओद मसिना बारेता पोलुसना पोल्लोतुन समजेमायान साटि प्रबु अदेना मन्दुन तरियतुर। 15ओद आपुना परिवारतासंग बपतिस्मा येतितु अनि पजा “निमाट नाकुन प्रबुना खरोय विस्वासि समजेमान्तोरिट ते नावा लोन वास मन्ट” इन्जोर माकुन विनन्ति किसोर माकुन मानेहकिस ओतु।

पोलुस भविष्य वेहे आळदा दुष्टात्मातुन पसहान्तोर

16माक प्रार्थना कियानाता जागातिके हन्जोर मतरोम असके माकुन उन्दि दासि मिलेमातु अदेनिगा भावि वेहाना दुष्टात्मा मता। ओद लोकुरा भावि वेहच आपुना स्वामिलोकुरक साटि पकाय डबुंग कमेहकिस ततिन्द। 17ओद आळ पोलुस अनि मावा परके वास, “येरक मानेयक परमप्रधान परमेस्वरनोर दास आन्दुर ओरक माकुन पिसानाता हरि वेहान्तोरक” इन्जोर ओद जोरदे केयिला लागतु। 18ओद पकाय दियांगवनाह इदामे इन्जोर मता मति इदेनते पोलुसिन तकलिप आतु, अनि परके मिळिच ओद आळतिगा मता दुष्टात्मातुन इतुर, “अदेनिगाडाल पसियस हन इन्जोर नना निकुन येसु मसिना पोरोयते आग्या हिन्तोना।” ओदे बेरा ओद दुष्टात्मा अदेनिगाडाल पसियस हतु।

पोलुस अनि सिलास जेहलतिगा

19अदेनोर स्वामिलोरक मावा कमायिता आशा हतु इन्जोर हुळतुर असके पोलुस अनि सिलासतुन पयस चोवकतिगा सहेरता अदिकारि लोकुरा हेरे पिळिंगसोर ओतुरक। 20अनि ओरकुन न्याय केवालोर रोमि अदिकारि लोकुरा हेरे ओतुरक अनि “येर लोकुरक यहुदि आन्दुरक, अनि मावा प्रदेशतिगा लोकुरकुन पकाय तकलिप हिस 21माक रोमि लोकुरकुन स्विकार कियाना या मानेमायाना बेस आयो रितितुन वेहिला आतोरक” इन्जोर इतुरक। 22असके भीळतोर लोकुरक ओरा विरोदते उन्दि आस वातुरक; अनि न्याय केवालोर ओरांग सन्दरांग हरिहच रेहतुरक अनि ओरकुन सोटाते हियाना आग्या हितुर। 23सोटाते पकाय हिस अदिकारि लोकुरक पोलुस अनि सिलासिन जेहलदिगा वाटसितुर अनि ओरकुन सोबाय बन्दोबस्ते इरिर इन्जोर जेहलतोर अदिकारिन आग्या हितुर। 24जेहलता अदिकारिन इदाम आग्या पुटतपा ओर पोलुस अनि सिलासिन जेहलता लोपाडा खोलितिगा इरस ओरांग काल्क गुटातिगा दोहचितुर।

जेहल केपवाल मसिन स्विकार किन्तोर

25अरदो नरका पोलुस अनि सिलास प्रार्थना किसोर परमेस्वरना भजन ओयिलातोरक अनि जेहलतोर कयदि लोकुरक ओरांग केन्जिन्दुरक। 26अचोने बेरा हुरहायने उन्दि हजोर भुकंप आतु, जेहलता पुरा पायवा होलेमातु, अनि सान्डेय सबोय कवाळ तरियतुंग अनि सबोय बन्दि लोकुरा दोहता साकळि लेंगतु। 27असके जेहलतोर अदिकारि तेदितुर, अनि जेहलता कवाळ तरियता हुळस कयदि लोकुरक वितितुरक इन्जोर समजेमास ओर तलवार टन्डस आपुनतुन हव्काना कोसिस कितुर। 28मति पोलुस जोरदे इतुर: “आपुनतुन बाताले तकलिप अविहमा, बाक्याकि माक सबोयलोर इगाय मन्तोरोम” इन्जोर जोरदे इतुर। 29असके जेहल केपवाल टिवरि ततान साटि सिपायि लोकुरकुन इतुर अनि पजा ओर लोपा वास कसिंगसोर पोलुस अनि सिलासना मुने अरतुर। 30अनि ओरकुन बाहरो ततुर, “हे सयबालोरक, पिसाना पुटहान साटि नना बाताल कियाका?” इन्जोर पुच्चेमातुर। 31ओरक इतुर, “प्रबु येसु मसिनिगा विस्वास कियाकि ते निया अनि निया परिवारता पिसाना आयार।” 32अनि ओरक ओन अनि ओना सबोय परिवारतुन प्रबुना पोल्लो वेहतुर। 33नरका ओदे बेरा ओर पोलुस अनि सिलासिन ओस ओरा मेन्दुलता घावकुन नोरतुर, अनि ओर आपुना सबोय लोकुरासंग सान्डेय बपतिस्मा येतितुर। 34असके ओर ओरकुन आपुना लोन ओस ओरकुन जेवन हितुर अनि सबोय परिवारतासंग परमेस्वरनिगा विस्वास किस इन्जोर गिरदा कितुरक।

रोम अदिकारि लोकुरक पोलुस अनि सिलासिन तासिन्तोरक

35पोळद पसियतु असके रोमि अदिकारिलोर ओर मानेयकुन तासिम्ट इन्जोर आग्या किस सिपायिलोरकुन लोहतुर। 36जेहलतुन केपवाल इव पोल्लोंग पोलुसिन इतुर: “मिकुन तासियान साटि न्याय केवालोर आग्या लोहतोरक इन्जोर इदेक निमाट पसियस गिरदाते हन्ट” इन्जोर इतुर। 37मति पोलुस ओन इतुर, “रोमि लोकुरक माकुन कोर्टतिगा न्याय केवाय लोकुरा मुने माकुन हाहतुर अनि जेहलतिगा वाटतुर। इदेक बाताल माकुन कमेक पसिहला आतोर? इदाम आयो, मति ओर आपुनास वास माकुन बाहरो पसिहविर” इन्जोर इतुर। 38सिपायिलोरक इद पोल्लो न्याय केवालोरकुन इतुरक असके पोलुस अनि सिलास रोमि लोकुरक आन्दुर इन्जोर केन्जचुन न्याय केवालोरक वरियतुरक। 39इन्जोर ओरक वास पोलुस अनि सिलासिन मापि तलकतुरक अनि ओरकुन बाहरो ओस आपुना सहेरताल हनिर इन्जोर विनन्ति कितुर। 40ओरक जेहलताल पसियस लुदियाना लोन हतुरक, अनि तमोहलोरकुन मिलेमास ओरकुन हिमत किहितुरक अनि ओरक फिलिप्पि सहेरताल हतुरक।

Currently Selected:

बुतोंग 16: fmu

Highlight

Copy