Ruma 4

Abrayam Tam Fagfaningan

1Setain taw Udyu at mangaguyang Abrayam nu katap te, matuyan? 2Abrayam ro e fagmafamatungudunun nu siginan di at fakamulun nu katap kata nu yud e asalanan. Dewa katanya, kanya we fagmafamatungudunun sis Dius at daga salubangan. 3Aroro katatuy at marirukan sis Dius at Longan te,

“Abrayam gafanud tua sas Dius, nu katanya, Dius natap anya kata nu yud e asalanan.”#4:3 Fakasigadan 15:6.

4At famayad sa sik tagfakamulun bunwa sik fon, nu bunway sik famayad tua sat nainlufuyan. 5Dius wa gtap nusnga sinu fag taw kata nu yud e asalanan siginan at nafakamulun. Nu bunway Dius gtap tua sik tagasalanan kata nu yud e asalanan siginan at fagafanudun. 6Katanya yangay fun Dabid at longan at masuad te, Mauseganan sik taw Dius at nafangayan te, yud e asalanan, nu bundi siginan kafag taw at fakamulun.

7“Mauseganan sik taw

Dius nu nafalyam tua at asalanan,

ay at fagmauriun nu ntabun tua.

8Mauseganan sik taw,

tam Fun nu ddi gamatangan ya at ngay asalanan.”#4:8 Alubad 32:1-2.

9O kanya fag fagmasineun sa way lang at ke fakatoglagan? Bundi. Anggan tua sat yud e fakatoglagan. Kata em longan te, “Abrayam antap kata nu yud e asalanan siginan at fagafanudun.” 10Ginain nu kafasludan sas Abrayam takatanya? O gina yud nafae fakatoglagan, o mannga gina nafae fakatoglagan? Anfasludan sa anya takatanya gina yud yay nafae fakatoglagan. 11Kanya nafae fakatoglagan sik famatuyan te, antap kata nu yud e asalanan siginan at fagafanudun gina yud yay e fakatoglagan. Nu katanya Abrayam wan fagayu tagafanud at mama, deyud e fakatoglagan, ay at kintap kata nu yud e asalanan siginans fagafanudun sas Dius. 12Kanya yangay at ke ngay fakatoglagan at mama, ay bundi lang nafae fakatoglagan, nu bunway gafanud yangay kata tam mangaguyang Abrayam nu gafanud, gina kanya yud yay nafae fakatoglagan.

Magbilug Dius at Fatuyanan siginans Fagafanudun

13Dius at fatuyanan sas Abrayam ay sat ngay kasugfunanan te, magbilug ban fagdaul daga, kanya bunwa siginan at nafaningan Muisis at Faugali, nu bunway antap tua te, kata nu yud e asalanan aroro siginan at fagafanudun. 14Sik taw nu nangagbilug Dius at fatuyanan nu siginan way at fagfaningun Muisis at Faugali, fagafanudun we tungkul, ay Dius at fatuyanan wa yangay e tungkul. 15Ay Muisis at Faugali nafae faurianan. Ay yaman e Faugali, wa ro e fakamaboun.

16Nu katanya, siginan tam fagafanudun, Dius mon antam at nafatuyanan, aroro at kamagalangan, sas Abrayam at kasugfunanan fagayu. At fatuyanan bundi lang sa sangay tagfaning Muisis at Faugali, nu bunway anggan tua sas fagayu tagafanud kata Abrayam. Aroro fagayu tam, tam mama Abrayam.

17Anriruk te,

“Nafili au emu laman ngayuk taw at mama.”#4:17 Fakasigadan 17:5.

Sis Dius at daga salubangan Abrayam wan tam mama, aroro Abrayam gafanud sa anya. Dius tagfaleleg at ngay kinbul, ay takawat nusnge wain siginan at yud kalag.

18Abrayam dewa yud e fagsegun ya te, ke sisian ban, kanya gafanud tua te, kanya ban ngayuk gaban taw at mama. Kata at longan sa anya te,

“Am ngay kasugfunanan ban kayu ngay galeme.”#4:18 Fakasigadan 15:5.

19Abrayam di nmomuy at fagafanudun dewa gamatangan te, kata wa nu nbul, aroro mafufuama wan; at banwa arvs sadi wak sandan, ay Sara wa gsisian, sarokta nlangfe wan nu gfangigusan. 20Kanya di naduanun Dius at fatuyanan, nu bunway ankaksvn tua at fagafanudun ay naseg Dius. 21Ay kanya gtuyan te, Dius mafafasludan at fatuyanan. 22Nu katanya, Dius natap anya kata nu yud e asalanan aroro siginan at fagafanudun. 23At longan te, “Dius natap anya kata nu yud e asalanan,” bundi lang Abrayam, 24nu bunway anggan tua itam. Antap yangay tam kata nu yud tam e asalanan, nu gafanud tua tam sas Dius, at nafadog nafaleleg Isus tam Fun siginan at fagmabulanan. 25Dius naylat nu e gfabul Isus aroro sa tam ngay asalanan, ay nafadog nafaleleg anya laman gtap antam kata nu yud tam e asalanan.

Currently Selected:

Ruma 4: OCCT

Highlight

Copy