Ruma 15

Fauseganani Tua Tam Faduksay

1Itam at mabitsug tam fagafanudun, agwantani tua fabitsugi tam ngay faduksay at mamomuy at fagafanudun. Lag tam gfauseganan tam sadili, 2nu bunway fauseganani tua tam ngay iba laman at fagafanudun kaksvn yangay. 3Dius at nafili fag Fun wa narvbvy at sadili fakaylatun, nu bunway kata at Rirukan te,

“Tagfalingun emu, at fagfalingunun au wan.”#15:3 Alubad 69:9.

4Aroro fagayu at kinriruk sis Dius at Longan ebi taguna, anriruk laman gfoyung antam, laman maksvn tua tam ay gfon antam fagsegun.

5Dius, tagfon fagmagwantaun ay fagmasunun, kanya nangus ggubuk ayu laman gugali tuam manabayan sas galay am at sadi, nu gfaning am tam Fun Isus, 6laman ay amatanganan ay ay longan masadi tuam fia gseg tam Dius, tam Fun Isus at Mama.

At Masine fag Barita sas Yud Udyu fag ngay Taw

7Kata tam Fun Isus nu guseganan kaylat ayu, katanyai yangay ay fakamulun sas galay am at sadi, laman gfauseganan tuam tam Dius. 8Glong au ayu te, tam Fun Isus ansik fagsuguan sa sangay taw Udyu laman gfasaful te, Dius gfafasludan at ngay fatuyanan sat ngay mangaguyang, 9ay kanya ndasug yangay laman ban at yud Udyu fag ngay taw gseg tua Dius aroro sat fakafanyun. Kata at Rirukan te,

“Gfauseganan au emu sis salubangan yud Udyu fag ngay taw,

ay galubad au sa emu.”#15:9 2 Samwel 22:50; Alubad 18:49.

10Nafoyung yangay te,

“Am at yud Udyu fag ngay taw,

useganani gasfuan Dius at ngay taw.”#15:10 Deuterunumyu 32:43.

11Ay nafoyung yangay te,

“Segi tam Fun, am at yud Udyu fag ngay taw.

Ay fagayu taw alubadi segi anya.”#15:11 Alubad 17:1.

12Isayas gfoyung yangay te,

“Ese ban at Baguama kadasug,

laman nanfunan fagayu taw,

ay laman ban yud Udyu fag ngay taw e fagsegun sa anya.”#15:12 Isayas 11:10.

13Dius wan tagfon fagsegun, ay ku darangin te, kanya yangay nangus tagfon ayu fagusegananun ay fagmanabayanun aroro gafanud tuam sa anya, laman maksvn tua ay fagsegun siginan at Masine fag Falad at fagmabalyananun.

Pablu at Fagnarirukun

14Ku ngay faduksay, gafanud au te, mapnu am fagmasineun ay fagsafulun ay saful tuam gfodfoyungan. 15Dewa katanya, kwa naduanun griruk sa ayu tibak foyungan laman gfamatang au sa ayu. Aroro sas Dius at fagmagalangun, 16sik fagsuguan au fia aroro siginans Isus tam Fun laman sa sangay yud Udyu fag ngay taw. Kata au sik tagfon fanggalangun gina au kamoyung Dius at Masine fag Barita, laman at yud Udyu fag ngay taw umsik maylat fag fanggalangun sas Dius, aroro at Masine fag Falad nafayud tua e malong anya fagayu.

17Nu katanya, masine kway kamatungudun fagayu ku nafakamulun laman sas Dius siginan ku fagmasadiun sa tam Fun Isus. 18Aroro kwa gfakamulun nusnga setaw nu nanfamatungudun kway, nu bunway ku fagfakamulunun tam Fun Isus tua at fakamulun, laman siginan ku foyungan ay ku fakamulun at yud Udyu fag ngay taw gfaning tua Dius. 19Siginan at ngay madulo ay at mabalyanan fag ngay fakamulun tagsiginan at Masine fag Falad at fagmabalyananun, nafamoyung kwan at Masine fag Barita sabaliwa tam Fun Isus sas fagayu talun siginans Erusalem sitsigons talun Iliriku. 20Ku algan kaylat au namoyung at Masine fag Barita sat yud yay batang gdungug fag talun at ngay taw sabaliwa tam Fun Isus, laman kwa namoyung sa tibak taw at batang wa e nanfamoyung. 21Nu bunway kata at Rirukan te,

“Sat yud batang e gbarita sabaliwa anya, lumag ban anya,

ay at yud yay batang gdungug sabaliwa anya, tumogdungug ban.”#15:21 Isayas 52:15.

Pablu at Algan nu Nansibo sas Furuan Ruma

22Aroro kamoyung au ste fag ngay furuan, kya batang kadasug sa ayu. 23Ay katsi antabu wan ku fakamulun ste fag talun. Dakngani ngaduge wan nu kaylat au nansibo ayu, 24ku algan nansibo kban ayu gina kban sas talun Espanya. Ay gina kban nabanwan sirut sanya, guseganan kban nu naladlagan tam dewa sik buknga sirut, ku fagsegun te, ggubuk tua ban am angku nu gtaglayun au glao. 25Ay katsi sa kyays Erusalem laman namuba fanggubukun sa tam ngay faduksay sanya. 26Aroro tam ngay faduksay sis talun Masidunya ay talun Akaya, maksvn nu guseganan gfaful at fanggubukun sa tam ngay faduksay at yud e kwa sis Erusalem. 27Kanya fagayu maksvn nu guseganan gfon aroro katanya wan at matuyan, aroro kanya e bedan sa tam ngay faduksay sis Erusalem. At yud Udyu fag ngay taw e kwa wan sas fanfalad baliwa, siginan sangay taw Udyu. Nu katanya, at masine at yud Udyu fag ngay taw nu ggubuk yangay anya fagayu siginan takalag fag famonun. 28Ay gina kban nanamuba ku nalong ayu fag fanggubukun sa tam ngay faduksay sis Erusalem, gdalan kban sa ayu gina au sas talun Espanya. 29Nasaful au te, nu ndasug kban sa ayu, gfon au sa ayu tagsiginan tam Fun Isus at famonun at yud e kurang.

30Ku ngay faduksay, siginans Isus tam Fun ay siginan at Masine fag Falad at fon fag fakesugun, maksvn nu get au sa ayu te, gubuki angku siginan nu gdarangin am sas Dius laman sa angku. 31Darangini laman umlangfe au siginan at yud gafanud fag ngay taw sis talun Udea. Ay darangini yangay laman tam ngay faduksay sis Erusalem kaylat tua ku fakamulun. 32Nu katanya tua, Dius nu kaylat, guseganan ktua nu nangadasug sa ayu, ay nantungkud au magamut si ayu. 33Dius, tagfon fagmanabayanun sumawa nangus fia ayu fagayu. Anud.

Currently Selected:

Ruma 15: OCCT

Highlight

Copy