Tap 3
3
Lebi at ngay Kasugfunanan
1Kayu tuy Arun ay Muisis at kasugfunanan at rirukan ebi gina Yawi nafakamatoan Muisis sis Buksul Sinay:
2Arun at ngay baguama Nadab, Abyu, Elyasar ay Itamar. Nadab wan tiba kaka. 3Nafili anya fagayu laman sik ngay tagfon fanggalangun. 4Dewa katanya, Nadab ay Abyu anbul sis Yawi at daga salubangan gina kanya fag dua nabul singsing afuy yud siginans fagirugan fanggalangun laman sas Yawi gina sis Buksul Sinay fag talun yud e taw. Kanya fag dua anbul ay wa nke sisian. Nu katanya, Elyasar ay Itamar way lang at sawad tagfakamulun laman sik tagfon fanggalangun kaduge Arun gleleg.
5Yawi nalong sas Muisis te, 6“Fauroi Lebi at ngay kasugfunanan ay tabani sas Arun fag fun tagfon fanggalangun laman ggubuk anya. 7Kanya ban fagayu ggubuk Arun ay fagayu taw Israel gina gfakamulun sis Yawi at bale, at ngayan yangay te, Bale Fagnangablanganan. 8Kanya yangay fagayu tagalaga Yawi at bale ay fagayu at ngay fagagbilugun sanya, ay kanya fagayu gfakamulun laman sa sangay taw Israel. 9Nafili Lebi at ngay kasugfunanan laman ggubuk Arun talamean. 10Filii Arun talamean laman sik ngay tagfon fanggalangun. Nusnga sinu fag taw at nafakamulun sik tagfon fanggalangun at ngay fakamulun si ku bale, kanya nu dway siginans Lebi at ngay kasugfunanan, fabuli wan anya.”
11Yawi nalong yangay sas Muisis te, 12“Nafili kwan Lebi at ngay kasugfunanan laman fantubus Israel at ngay baguama tiba kaka. Aroro au wan tagagbilug Lebi at ngay kasugfunanan, 13ay anggan fagayu at ngay baguama tiba kaka. Ay ebi gina au nafamin ngay taw Igiptu at ngay baguama tiba kaka, nafasaman kwan laman sa angku Israel at ngay baguama tiba kaka, dewa taw ay fagbaugun. Nu katanya, kanya fagayu ku fagagbilugun wan. Au Yawi.”
14Gina Muisis sis Buksul Sinay, Yawi nalong anya te, 15“Tapi Lebi at ngay kasugfunanan fag ngay mangama, siginans tagsadik magdanun sat tungud baliwa, sas galay sik gaban ay talanan.” 16Nu katanya, Muisis natap Lebi at ngay kasugfunanan fag ngay baguama kata Yawi at suguan anya.
17Kayu tuy Lebi at ngay baguama: Gersun, Kuat ay Merari. 18Gersun at ngay baguama, Libni ay Simei. 19Kuat at ngay baguama Amram, Isar, Kebrun ay Usyel. 20Merari at ngay baguama Makli ay Musi.
Kanya Lebi at ngay gaban, galay sik talanan.
21Gersun at ngay kasugfunanan siginans Libni ay Simei at ngay gaban. 22Ngay mangama siginan tagsik magdanun sat tungud baliwa nu fagayu wan fituk libu limak sandan. 23Ay kanya fag ngay taw nu kawat at ngay bale ramit, sis day guyuy Fagnansegan fag bale ramit sas fakayabian baliwa. 24Ay tagfangguna anya fagayu Elyasaf, Lael at baguama. 25Nafatigwanan wan sa anya fagayu ngay fakamulun laman galaga Yawi at bale at ngay fagagbilugun: ngay fanuklub, ngay ramit faningding at sakbawan, 26ngay ramit famalanib sis bale ay sis fagirugan at basad alad, ay faningding sakbawan alad fag ramit, ay anggan ngay fansiuk. Kanya yangay fagayu at ke fakamulun sa kafag ngay fagagbilugun.
27Kuat at ngay kasugfunanan, Amram, Isar, Kebrun ay Usyel at ngay gaban. 28Fagayu at ngay mangama siginan tagsadik magdanun sat tungud baliwa nu fagayu wan waluk libu unumk sandan. Nafatigwanan kyangay sa anya fagayu ngay fakamulun sis Yawi at bale. 29Ay kanya fag ngay taw nu kawat at ngay bale ramit, sis Fagnansegan fag bale ramit at fasiunan fag alvngvdan baliwa. 30Ay tagfangguna kanya fag ngay taw, Elisafan, Usyel at baguama. 31Kanya fagayu tagalaga Fagsuadan Nasadian, fagfatungkudan tinapay, fagfatungkudan salung, fagirugan, ngay tagfon fanggalangun at ngay fagagbilugun gina gfakamulun ay anggan famalabag fag ramit. Kanya yangay fagayu at ke fakamulun sa kafag ngay fagagbilugun. 32Elyasar, Arun at baguama, fag fun tagfon fanggalangun, tagfangguna Lebi at ngay kasugfunanan. Kanya yangay tagfangguna ngay tagfakamulun sis Yawi at bale.
33Merari at ngay kasugfunanan, Makli ay Musi at ngay gaban. 34At ngay mangama siginans tagsadik magdanun sat tungud baliwa nu fagayu wan unumk libu duak sandan. 35Suriel, Abyail at baguama, tagfangguna anya fagayu. Ay kafag ngay taw nu kawat at ngay bale ramit, sis Fagnansegan fag bale ramit tagsabaliwas fawalan fag alvngvdan. 36Kanya fagayu at ke fanambagun tagalaga ngay fagaloan nu kawat bale ramit, ngay famakvd, ngay turuk ay ngay fagfatungkudan. Ay kanya yangay fagayu at ke fakamulun sa kafag ngay fagagbilugun. 37Kanya yangay fagayu at fagfatigwanan tagalaga ngay turuk alad ay ngay fagfatungkudan, anggan ngay fagtabingan ay at ngay fansiuk.
38Muisis ay Arun talamean at fagbalean sis salubangan Yawi at bale, sis fakamenitan baliwa. Nafatigwanan wa sa anya fagayu at fakamulun laman gdiri ngay tagfakamulun sis Yawi at bale laman sa sangay taw Israel. Nusnga sinu fag taw at nafakamulun laman sik tagfon fanggalangun sis Yawi at bale, kanya nu dway siginans Lebi at ngay kasugfunanan, fabuli wan.
39Lebi at ngay kasugfunanan, siginan tagsadik magdanun sat tungud baliwa, nu fagayu wan, duak safuluk libu. Muisis ay Arun natap anya fagayu, kata Yawi at suguan sa anya fag dua.
40Yawi nalong sas Muisis te, “Tapi ngay taw Israel at ngay baguama tiba kaka, ay riruki at ngay ngayan siginans tagsadik magdanun sat tungud baliwa. 41Fatigwanani sa angku Lebi at ngay kasugfunanan famangsi ngay taw Israel at ngay baguama tiba kaka. Foni yangay sa angku Lebi at ngay kasugfunanan at ngay fagbaugun, famangsi ngay taw Israel at ngay fagbaugun. Au Yawi.”
42-43Nu katanya, Muisis natap ngay taw Israel at mangama tiba kaka tagsadik magdanun sat tungud baliwa, kata Yawi at suguan sa anya. Ay nu fagayu wan duak safulu e duak libu duak sandan fituk safulu e tulu.
44Yawi nalong sas Muisis te, 45Fatigwanani sa angku Lebi at ngay kasugfunanan famangsi ngay taw Israel at ngay baguama tiba kaka. Foni yangay sa angku Lebi at ngay kasugfunanan at ngay fagbaugun, famangsi ngay taw Israel at ngay fagbaugun. Au Yawi. 46Aroro ngay taw Israel at baguama tiba kaka ayu yap tua ngay taw Lebi at ngay kasugfunanan, at nalabi duak sandan fituk safulu e tulu. At masine bayadi yap kanya fag duak sandan fituk safulu e tulu fag ngay baguama tiba kaka. 47Galay sik mangama nu kabayad limak salapi kabyat ngay tagfon fanggalangun nu gfabudbungguan sanbung salapi. 48Foni sas Arun talamean salapi famayad at nasawe fag ngay mangama tiba kaka.
49Nu katanya, Muisis nafaful salapi laman famayad sa sangay taw Israel at ngay mangama tiba kaka at nalabi, siginan ngay taw Lebi at ngay kasugfunanan at kayuan. 50Ay at nafaful fag salapi sadik libu tuluk sandan unumk safulu e lima, kabyat ngay tagfon fanggalangun nu gfabudbungguan salapi. 51Ay kata Yawi at suguan, Muisis nafon sas Arun talamean kanya fag ngay salapi.
Currently Selected:
Tap 3: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
