Tap 24
24
1Ay Balaam namatangan te, Yawi kaylat gfadante Israel, ay kanya wa kaylat glong at mauri kata ebi at fakamulun. Nu bunway, kanya nasalubang sas talun at yud e taw, 2ay kanya nabanawan ngay taw Israel nu gbanwan manabayan sas galay sik kasugfunanan. Sanya ginan, Dius at Falad antayuk sa anya, 3ay Balaam nalong te,
“Au Balaam, Beur at baguama,
ay gamatangan ktua gugat at masine.
4Nadungug kwan Dius at longan
ay nalag kwan sik taginfan siginan at mabalyanan fag Dius.
Gfababaun au ku sadili sa anya
ay kanya gfoyung sik longan sa angku.
Katatuy at longan:
5Masine tua ngay taw Israel, Akub at ngay kasugfunanan at ngay fagbanwanan.
6Kata sik tanuman at masine sis tigyangan liskung,
ay kata yangay sikya Yawi at natanum,
ay ngay tagbia fag ngay fun kayu tagsis day lino.
7Gsawe wan ngay mamam sat ngay fagsuadan,
ay kanya fagayu gtanum ngay bvtang sa sangay tanuman at kinrugme.
Ay at fun amabalyanan yap tua Agag, Amalek at fun,
ay at fagfagtainanan umsik takadungug.
8Dius nafaduksun anya fagayu siginans talun Igiptu,
ay kanya kata sik mabitsug fag baka tama laman sa anya fagayu.
Ay kanya gfamin fagayu at ngay fawayan;
ay gsuluy sat matares fag tulag ay grufa at ngay bini.
9Ay kanya fagayu kata ngay liun,
nu natiug wan we mananfulo ya.
Gfadante ban nangus at nafadante anya fagayu,
ay nanlong ban nangus at mauri sas nusnga sinu at nalong at mauri sa anya fagayu.”
10Siginan takatanya, Balak andotama maksvn Balaam. Ay kanya natalaptap daul ay nalong te, “Nafauro au emu laman nanlong o at mauri sa ku ngay fawayan, dewa katanya, nafadante way o anya fagayu tulu ginan. 11Loi wan! Nafatuyanan koma te, gfon au sa emu famayad, dewa katanya, Yawi wa kaylat nu gbul o ku famayad.”
12Balaam nabalus Balak te, “Nalong kwan sa am ngay fagsuguan te, 13dewa ban o gfon sa angku am bale at mapnu sanbung salapi ay gintu, kwa mafafakamulun ku sadili fakaylatun, at masine ay at mauri. Ay nu nataw Yawi at foyungan sa angku, kanya way ku fagnanlongun sa emu. 14Guli kwan katsi sa ku kaiban. Dewa katanya, gina au galoun, gfararang au sa emu ngay taw Israel at fagnamakamulunun ban sa am ngay taw.”
Balaam at Faufatk Longan
15Sanya ginan, Balaam nalong te,
“Au Balaam, Beur at baguama,
ay matuyan tua gugat ku amatanganan.
16Nadungug kwan Tiba Tungud fag Dius at longan
ay nalag kwan sik taginfan siginan at mabalyanan fag Dius.
Kamababaun au sa anya ay kanya nafoyung sa angku sik longan te,
17Nalag au si ku taginfan at yud yay anfasludan.
Sik fun ban tagsiginans Akub at kasugfunanan namagtainan sas Israel.
Ay kanya ban gfamin ngay taw Muab ay Set at ngay kasugfunanan fagayu.
18Ay kanya ban nangagbilug talun Edum, at ngayan yangay te, Seir,
ay Israel ban kaugat yay nu mabalyanan.
19Sik fun ban namangguna Israel,
ay kanya ban namamin at ngay sawad tagleleg sis Muab at furuan.”
Balaam at Longan Taguyan
20Sanya ginan, Balaam nalag sit taginfan ngay taw Amalek ay nalong te,
“Ebi taguna, ngay taw Amalek oma tagfangguna sa sangay talun,
dewa katanya, kanya fagayu umrasras.”
21Sanya ginan, Balaam nalag yangay sit taginfan ngay taw Ken ay nalong te,
“Mogat tua am fagbanwanan, aroro gang tua at fagfatungkudan,
22dewa katanya, umkamin ban am gina ban ngay taw Asirya gtaban ayu.”
23Ay Balaam nalong yangay te,
“Afanyuan am! Sinu ban at magwanta gina Dius gfakamulun takatatuy?
24Ngay taw ban kadasug siginans Sipre#24:24 Sipre: sas Ebreu, Kitim. gsakay sit ngay sakayan lino,
ay kanya ban fagayu nangagbilug ngay taw Asirya ay taw Eber,
dewa katanya, Kitim ban umrasras.”
25Sanya ginan, Balaam ay Balak guli wan sat mesa furuan.
Currently Selected:
Tap 24: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
