Tap 17
17
Arun at Tulag
1Yawi nalong sas Muisis 2laman nanlong sa sangay taw Israel te, “Galay sik tagfangguna sat galay kasugfunanan gfon sa emu sik tulag, ay riruki ngay taw at ngayan sanya. Fagayu at tulag, labi dua. 3Sas Lebi at tulag, riruki Arun at ngayan, aroro masine nu e sik tulag sas galay tagfangguna at ngay kasugfunanan. 4Folii kanya fagayu sa ku basad Bale, sis Fagsuadan Nasadian at daga salubangan nu inda nu gfalag au ku sadili sa emu ay sas Arun. 5Ay si ban ku nafili fag taw at tulag sik don gtugbung, ay siginan takatanya, umragang ban ngay taw Israel nu kamayud sa emu ay sas Arun.”
6Nu katanya, Muisis nafoyung takatanya fagayu sa sangay taw Israel, ay galay sik tagfangguna sas galay sik kasugfunanan nafon anya tulag. Fagayu at tulag, labi dua anggan yangay Arun at tulag. 7Muisis nafoli fagayu at ngay tulag sis Yawi at daga salubangan sanya sas Fagsuadan Nasadian at bale.
8Balabag di, Muisis nasakbo sas bale ramit nu inda Fagsuadan Nasadian nu mafasakboan ay nalag Arun at tulag, tagfamatang Lebi at kasugfunanan, bundi lang anke don nu bunway anke barugwak ay narawvg sik almendru#17:8 almendru: at barugwak malaksi ay at rawvg kata sik pili. malesanan. 9Sanya ginan, Muisis nafaduksun fagayu at tulag ay nafalag sa sangay taw Israel. Ngay taw nalag kafag ngay tulag, ay galay sik tagfangguna sis galay kasugfunanan nabul at tulag.
10Yawi nalong sas Muisis te, “Folii Arun at tulag sas Fagsuadan Nasadian at daga salubangan laman kanya wan at famararang sa sangay takamabo te, kanya fagayu umbul nu dway yud gfaragang nu kamabo sa angku.” 11Ay Muisis nafakamulun Yawi at suguan sa anya.
12Ngay taw Israel nalong sas Muisis te, “Umbul waban ami ste! 13Aroro nusnga sinu takakbang sas Yawi at bale umbul. O umbul yaban ami fagayu?”
Currently Selected:
Tap 17: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
