Tap 11
11
Ngay Taw Israel Nafamayud Muisis
1Ngay taw Israel nafamayud Muisis, aroro kanya fagayu anke fagidapun maksvn. Ay Yawi nu nadungug ngay taw nu kamayud, kanya andotama ay nafadasug afuy sa tibak fungfung talun si sangay taw Israel at fagmafulan. 2Aroro sa at kindasug, ngay taw Israel naet gubuk sas Muisis, ay Muisis nadarangin sas Yawi, ay afuy anrabung wan. 3Nu katanya, nafangayan kafag talun te, Tabera,#11:3 Tabera: at masuad, Girug. aroro sanya Yawi nu gfadasug afuy sa sangay taw Israel.
4E sik ngay gaban taw nanangalo ngay taw Israel laman nanrvbvy at fakaylatun fag ngay fakonun. Nu katanya, ngay taw Israel nafamayud yangay ay glong te, “Nu e yamas di long tam gugat. 5Gina long tam sis talun Igiptu, kon tua tam gugat ngay albon, ay ngay unduy, ay ngay milun, ay ngay sibuyas ay ngay bawang, wa fagbayadun. 6Dewa katanya ste, wa tam kaylat ya gfangon, aroro mana way lang tam fakonun.”
7Kafag mana kata sik ngay bvtang ayu sirut malaksi. 8-9Galay balabag, ngay taw Israel gfuyut mana siginans daga ay nanlubuk. Sanya ginan, kanya fagayu gfatama sat ngay tikung ay kawat laman sik ngay tinapay at mayangfis. Kafag mana nu kaon kata sik tinapay at nafatama sas langis ulibu.
10Muisis nadungug ngay talanan nu kamayud sit ngay mesa sakbawan. Nu katanya, Yawi andotama maksvn sa sangay taw Israel, ay Muisis anke amatanganan maksvn. 11Ay Muisis nainto sas Yawi te, “Wain am fagnafadasugun sa angku at maksvn fag fagidapun? Ay nataw nunda ku nafakamulun at mauri sa emu, am fagnafabayanun sa angku ngay taw Israel at ngay fagidapun? 12Ay wain o nunda kanya fagayu ku ngay sisian? Ay o nunda au kanya fag ngay taw at mama? Wain am fagnalongun sa angku te, ‘Amatoi anya fagayu, kata sik fangkamato nu gsalilian at fakamatoun,’ ay nalong yangay o te, ‘Tabani anya fagayu sa ku nafatuyanan sa am ngay mangaguyang fag talun?’ 13Ay dada ro nunda nu namul au yamas laman sa sangay taw? Aroro kanya fagayu gfataglayun nu kamayud te, ‘Foni emi yamas laman em fakonun.’ 14Kwa makatu ya galaga anya fagayu. Gidapan kwan. 15Nu kata way lang tuy nu gdama o angku, fabuli wan angku. Ay nu kaylat yay o angku, lag yap gfabayan nu gidapan au.”
16Nu katanya, Yawi nalong sas Muisis te, “Fafuli fituk safuluk fagtainan sis Israel, am nasaful fia siginan ebi tagfangguna gugat ngay taw, ay fasakboi anya fagayu sa ku bale ay falindugi anya fagayu sanya gasfuan emu. 17Ay kadasug kban sanya laman namakamatoan au emu, ay namul kban siginan emu tiba ku fagmabalyananun#11:17 fagmabalyananun: ay mannga, Falad. ay namon kban sa kafag ngay tagfangguna, laman magubuk emu, ay laman bundi o sesadi tagfangguna ngay taw.
18“Sanya ginan, longi sa sangay taw te, ‘Igusi,#11:18 Igusi: at masuad, faningi at faugali nu gfatigwanan at sadili sas Dius. aroro balabag ban kanya fagayu e fakonun wan yamas.’ Ay longi yangay te, ‘Nadungug kwan nu kamayud am get yamas laman ay fakonun. Nalong am te, amanabayan yap tua nu gbanwan am sis talun Igiptu. Nu katanya, balabag ban sbalabag, gfon kban sa ayu yamas laman ay fakonun. 19Bundi ban sik menit, ay duak menit, ay limak menit, ay safuluk menit ay duak safuluk menit, 20nu bunway sik magdanun tua, yakmay ban kanya fagayu napsug ay ansuya. Aroro kanya fagayu nafamayud angku am tagalaga, siginan nu glong te, Wami nangus nalao siginans talun Igiptu.’ ”
21Dewa katanya, Muisis nalong sas Yawi te, “Ku fagfanggunaun fag ngay taw, unumk sandank libu, ay glong o te, gfon ban o anya fagayu yamas, at fakonun kaduge sik magdanun? 22Dewa ban mi nafabul fagayu em ngay fagbaugun: tupa, baka, ay dewa ban mi nananggamat fagayu albon sas dagat ya kasakan laman sa sangay taw.”
23Ay Yawi nalong sas Muisis te, “O nunda ku fagmabalyananun e fakatabuan way? Katsi ro lumag o te, o anud ku ngay longan kafasludan o ay mannga duan.”
24Nu katanya, Muisis nalao sa sangay taw ay nalong Yawi at longan. Kanya nafaful fituk safuluk fagtainan ay nafalindug maligung sis bale ramit. 25Sanya ginan, Yawi ndaga gfasfuan linyabu ay nafakamatoan Muisis. Ay kanya nabul siginans Muisis tiba at fagmabalyananun ay nafon sa kafag fituk safuluk tagfangguna. Ay kanya fagayu nu nke fagmabalyananun wan, naringang kata ngay taglong nu garingang, dewa katanya, ginanya way lang nu maringang takatanya.
26Eldad ay Medad, fagtainan at dua siginans fituk safulu, anfamato sis fagmafulan, ay wa nasas bale ramit. Dewa katanya, kanya fag dua anke fagmakatuun yangay ay naringang kata ngay taglong nu garingang. 27Ay e sik baguama gtarung nangakbang sas Muisis ay nalong te, “Eldad ay Medad garingang sis fagmafulan kata ngay taglong nu garingang.”
28Ay Uswe, Nun at baguama, siginan ngay nu masisian ggubuk Muisis. Kanya nalong sas Muisis te, “Ku fun, faragangi wan kanya fag dua nu garingang kata sik ngay taglong.”
29Ay Muisis nabalus anya te, “Ay wain, o kauri wo daul takatatuy nu gfangguna au? Ngap karo nu au di at mafaning, kaylat kwa ro Yawi nu gfae fagmabalyananun at ngay taw fagayu, laman mafoyung kata sik ngay taglong.” 30Sanya ginan, Muisis ay at nafili fag ngay fagtainan anfoli wan sa sangay taw Israel at fagmafulan.
31Ay Yawi nafadasug tagmara siginans dagat gbuba ngay fugu. Ay kanya fag ngay fugu glayugan sis day fagmafulan, tuluk darafa gsugfunan at kadamvlan siginans tungud lutuk, ay kafag ngay fugu at kayuan siginans fagmafulan kayayu sik taw nu glao sik menit. 32Nu katanya, ginanya fag menit ay fag yabi anggan at fadogan fag menit ay fag yabi ngay taw ggamat way gugat ngay fugu. Galay sik taw at nagamat tuluk safuluk saku ay natimrang sasad baksak sis day fagmafulan. 33Dewa katanya, kaduge kanya fagayu yud yay nangvp kafag ngay yamas, Yawi andotama anya fagayu ay nafadasug sik maksvn fag faurianan. 34Ay sanya fag talun nafangayan te, Kibrut-Ataaba,#11:34 Kibrut-Ataaba: at masuad, Tagfangkumon at ngay fagfolian. aroro sanya wan nu gfoli tagfangkumon fag ngay taw.
35Siginans Kibrut-Ataaba, ngay taw Israel nalao sas Aserut ay nabanwan sanya.
Currently Selected:
Tap 11: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
