Nemyas 8

Esra Natap Dius at Faugali

Ngay taw Israel nu gbanwan sit ngay mesa furuan nu fitu wak magdanun, 1kanya fagayu anful sas Erusalem at fagaweanan tagsalubang sas Mamam fag Sakbawan. Ay kanya fagayu nalong sas Esra te, “Buli ay tapi Muisis at nariruk fag ngay Faugali, Yawi at suguan sa sangay taw Israel laman at fagnangugaliun ban.”

2-3Nu katanya, gina taguna fag menit sis fafituk magdanun, Esra nabuba kafag Faugali sa sangay taw ay tagsaful gtogdungug at daga salubangan. Ay sis fagaweanan tagsis salubangan Mamam fag Sakbawan, kanya natap siginans balabag sitsigons wabilug menit, ay gbia nu gtap. Ay fagayu taw gdungugan mandi Dius at Faugali. 4Ay Esra namalindug sit nafalganan fag faglindugan. Ay Matitya, Sema, Anaya, Uryas, Kilkya ay Maaseya, malindug si baliwa at siun. Ay sit wala baliwa, Pedaya, Misael, Malkya, Kasum, Kasbadana, Sakaryas ay Mesulam.

5Ay fagayu taw glag tua anya, aroro ngabat at fagmalindugan, ay kanya nu nalunggab at fagtapan, fagayu taw namalindug. 6Esra nafauseganan Yawi, Dius at mabalyanan. Ay ngay taw gfabat at ngay take ay nabalus te, “Anud, Anud!” Ay sanya ginan, namalub ay naseg Yawi.

7Ay fagayu taw nu nlindug wan, e nafoyung sa anya fagayu Dius at Faugali. Ay at nafoyung, ngay taw Lebi. At ngay ngayan: Eswa, Bani, Serebya, Amin, Akub, Sabetay, Udya, Maaseya, Kelita, Asarya, Usabad, Kanan, ay Pelaya. 8Kanya fagayu natap Dius at Faugali ay nafayamag at masuad laman mayamag sa sangay taw.

9Kaduge ngay taw gdungugan nu e gfayamag kafag Faugali, kanya fagayu gwayway. Nemyas fag fun sirut, ay Esra fag tagfon fanggalangun ay tagfoyung Dius at Faugali, ay ngay taw Lebi tagfayamag kafag Faugali, nalong te, “Katsi fag menit sik nafasaman sa ay Dius Yawi, nu katanya, lag am gwayway.”

10Ay Nemyas nalong yangay te, “Useganani, oni at mataba fag ngay fakonun, ay inumi at mayayum fag ngay fanginum. Ay foni fakonun sat yud e fakonun, aroro tuy fag menit sik nafalganan sa tam Fun. Lag am gafanawa, aroro Yawi at nafon sa ayu fag fagusegananun, tagfaksvn tua ayu.”

11Ngay taw Lebi nalong yangay te, “Maragangani! Lag am gafanawa, aroro tuy fag menit sik nafasaman sas Yawi.” 12Nu katanya, fagayu taw noli wan laman nanfangon ay nanginum, ay namon fakonun sat yud e kwa. Kanya fagayu naseg ay nauseganan, aroro anyamag at natap sa anya Dius at longan.

Fagmafulun sabaliwa nu Kawat ngay Fayag

13Gina sis faduak menit ginanya fag magdanun, tagfangguna ngay talanan, ngay tagfon fanggalangun, ay ngay taw Lebi, anful sas Esra at salubangan laman gdog yay nangadal sabaliwas Yawi at Faugali. 14Ay kanya fagayu nasaful Yawi at Faugali siginans Muisis te, ngay taw Israel masine nu gbanwan sit ngay fayag galay e fagmafulun sis fafituk magdanun. 15Ay kanya nangus fagayu gfasaful yangay kafag faugali sas fagdaul Erusalem ay sa tiba yak furuan te, “Loi sa sangay buksul ay namul am ngay sanga ulibu, bulsu, fawa, ay tibak kayu at marabung, laman fangawat fayag, kata at marirukan sis Yawi at ngay faugali.”

16Nu katanya, ngay taw nanamul ngay kayu at sanga ay nawat sik ngay bale fayag sit ngay mesa tungud bale, ay sit day bale, ay sis Dius at bale at ngay fagaweanan, ay sis fagaweanan tagsalubang sas Mamam fag Sakbawan, ay sis aturunan Efraim fag Sakbawan. 17Fagayu at kinfoli siginan at fagatabananan nawat sik ngay fayag, ay sanya wan nu gbanwan ay nu guseganan. Siginan Uswe, Nun at baguama, nu gfangguna, anggan ginanya fag menit, ya batang e nafakamulun takatanya, ay kanya fagayu maksvn nu guseganan. 18Kayu menit, Esra gtap Dius at Faugali sa sangay taw, siginan taguna sitsigon taguyan fag menit at fagmafulun, ay nu siwas fawaluk menit, kanya fagayu anful laman gseg Dius, gfaning faugali.

Currently Selected:

Nemyas 8: OCCT

Highlight

Copy

Compare