Lebitiku 24
24
Ngay Salung ay Tinapay tagsis Yawi at Bale
Gln 27:20-21
1Yawi nalong sas Muisis te, 2“Sugui sa sangay taw Israel te, namubai sa emu langis ulibu laman ngay salung gigang tua gugat. 3-4Ay Arun ban tagalaga kafag ngay salung tagsis fagfatungkudan at mawatan siginans gintu, si ku bale, sis day ramit faningding Fagsuadan Nasadian, laman ban gigang tua gugat si ku daga salubangan siginan nu bagu kayabi sitsigons balabag. Tuy fag faugali ay fagaloan ban kabavn, anggan ay ngay kasugfunanan.
Ngay Fanggalangun fag ngay Tinapay laman sas Dius
5“Fatamai labi duak tinapay, ay galay at sadi at fangawat ufatk fabudbungguan ay at fangawat at masinei tua. 6Ay kafag ngay tinapay folii sas fagfatungkudan at mawatan siginans gintu sis Yawi at daga salubangan. Ay fataladi kafag ngay tinapay sas duak talad, ay galay sik talad, tagunumk tinapay. 7Ay folii at yud e suglat fag famaebebanglu sa kafag duak talad tinapay at mesa tigyangan. Kafag famaebebanglu sik fanggalangun laman gamatang tuam gugat Yawi. Kanya tua at fagnangirugun fag famaebebanglu at fanggalangun sas Yawi abat ngate kafag tinapay. 8Folii kanya fag ngay tinapay sis Yawi at daga salubangan gina Famiangalay fag Menit. Ngay taw Israel, fakamuluni ban takatanya kabavn. 9Kanya fag ngay tinapay at mafalganan fag afud laman sas Arun ay sat ngay kasugfunanan. Ay kanya fagayu kon kanya fag ngay tinapay sis Yawi at bale at basad alad, aroro kanya wan at mafasamanan fag afud fanggalangun at mafataman laman sas Yawi, ay sa sangay tagfon fanggalangun.”
Faurianan sat Nafalingun Dius ay at Nafauri at Iba
10-11Ebi, e sik taw, ay kanya at mama sik taw Igiptu ay at mina sik taw Israel. (At mina at ngayan Selumit, Dibri at baguina siginans Dan at kasugfunanan.) Kanya fag taw nafawayan sik taw Israel sit fagmafulan ay kanya nafalingun Yawi at ngayan. Ay kanya fag ngay taw nataban kafag taw sas Muisis, 12ay naubung yakmay nainsaful sas Yawi te tain ro at fakamulun sanya fag taw.
13Ay Yawi nalong sas Muisis te, 14“Tabani at nafalingun angku fag taw sas day fagmafulan. Ay nusnga sinu at nadungug nu kamalingun, namoli at ngay daluap sa kafag taw at tungud alfuyu laman gfatuyan te, kanya e asalanan, ay sanya ginan ngay taw fanai anya ngay gang yakmay kanya anbul. 15-16Ay longi sa sangay taw Israel ay sa sangay taw tagbanwan magamut si ayu te, ‘Nusnga sinu at nafalingun ku ngayan, kanya e asalanan. Ay ngay taw fanai anya ngay gang yakmay anbul.
17“ ‘Nusnga sinu at nafabul sik taw, fabuli yangay anya. 18Ay sik taw nu nafabul way at ibama at fagbaugun, kanya masine nu gtubus kafag fagbaugun. Ay at fantubus fasik taglelegi tua. 19-20Nusnga sinu fag taw at nafaidapan at ibama, faidapani yangay anya kata at nafakamulun. Kanya nu nalifung at ibama at bini, lifungi yangay at bini. Ay nu nagulad way at ibama at mata, guladi yangay at mata. Ay nu narabas at ibama at bagang, rabasi yangay at bagang. 21Sik taw nu nafabul at ibama at fagbaugun, kanya fag taw bangsii yangay sik fagbaugun, ay at nafamabul fag taw, fabuli yangay. 22Kanya fag ngay faugali laman sa ayu ngay taw Israel ay anggan tagsiginans tibak talun fag ngay taw tagbanwan si ayu. Au wan ay Dius Yawi.’ ”
23Muisis nu nalong wan takatanya sa sangay taw Israel, ngay taw nataban kafag taw at nafalingun Dius sat day fagmafulan ay nafana anya ngay gang kata Yawi at suguan sas Muisis.
Currently Selected:
Lebitiku 24: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
