Lebitiku 22
22
Ngay Fanggalangun sas Yawi
1Yawi nasugu Muisis 2laman nanlong sas Arun talamean te,
“Lag gfae fakaplaun ku ngayan. Aylati fia ngay taw Israel at ngay fanggalangun laman sa angku. Au Yawi.
3“At sadi si ayu ay dewa ban at sadi ay kasugfunanan at ke asalanan ay nated fanggalangun laman sa angku, kanya wa masine ya gfakamulun laman sik tagfon fanggalangun. Au Yawi.
4-7“Nusnga sinu si ayu wa masine kon sik fanggalangun kanya nu e bangbang#22:4-7 bangbang: sik fakasaitun sas balat tagfatoglag te, kafag taw wa masine ya magamut sas fagngayuan. way, ay at yud kafaragang nu gtifus ay at nated nusnge wain at masuya aroro natayuk sa sik mabulan, ay at naduksun at famafafion, ay at nated at mabulan fag fagbaugun ay natuyan te, masuya. Ay kanya nu naigus tua, masine way kon ngay fanggalangun. Dewa katanya, kanya gfanya yay menit nu kafalyu, laman manangon ngay tagfon fanggalangun at afud fag ngay fanggalangun.
8“Lag am kon fagbaugun at kinbul, ay tibak mangilafang at nafabul fag fagbaugun at yamas, aroro nu naon way ban am takatanya fag ngay fagbaugun, umke fagmauriun am. Au Yawi.
9“Faningi ku ngay suguan ayu laman diam kae asalanan ay diam kabul. Au Yawi at nafili ayu laman sa angku.
10“Am way lang fag ngay tagfon fanggalangun ay ay ngay talanan at masine kon at mafalganan fag afud fanggalangun. Ay ngay betaw ay anggan ay ngay fagsuguan wa masine kon. 11Dewa katanya, ay nabayad fag fagsuguan ay sik fagsuguan at kinsalug si ay bale, kanya masine way kon kafag fanggalangun. 12Sik tagfon fanggalangun at baguina at kindadwa sa sik yud tagfon fanggalangun kanya wa yangay masine kon. 13Dewa katanya, kanya nu nsik fagbubayun wan ay mannga nasaruayan wan at mangama yud e sisian, ay gdog namanwan sat mama, kanya masine wa kon at mafalganan fag afud fanggalangun laman sat mama.
“Amatangi te, am way lang fag ngay tagfon fanggalangun ay ay ngay talanan at masine kon at mafalganan fag afud fanggalangun laman sa ayu. 14Sik taw yud siginan ay kalongan nu naon way kanya fag afud fanggalangun kanya fag taw masine nu gtubus duak kayu at naon.
15“Ngay tagfon fanggalangun, dirii fia ngay taw Israel at fon sa angku fag ngay fanggalangun, 16laman ban nu naon am kanya fag fanggalangun diam kae asalanan ay kae mamalong sa angku. Au Yawi at nafili ayu laman sa angku.”
Ngay Faugali sabaliwa nu Gfili Fagbaugun laman sik Fanggalangun
17Yawi nasugu Muisis 18laman nanlong sas Arun talamean, ay sa sangay taw Israel anggan sa tagsiginan tibak talun fag ngay taw tagbanwan sanya te,
“Nu gfon am fagirugun fag fanggalangun, laman sik fanggalangun sa nu gfafasludan am ay fatuyanan, ay sik mafalganan fia fag fanggalangun, 19foni sik tama baka ay mannga sik tama tupa ay sik yud e kalong fag kambing laman kaylat ktua. 20Lag am gfon sa angku at yud maugali fag fagbaugun laman sik fanggalangun, aroro kwa kaylat takatanya. 21Ay sik fanggalangun laman sas fagmanabayanun, nu nafon way laman sik fanggalangun sa nu gfafasludan at fatuyanan ay at nafalganan fag fanggalangun, masine kanya fag fanggalangun nu sik baka, sik tupa ay sik kambing at yud e kalong laman kaylat ktua. 22Lag gfon sa angku fagbaugun yud glag, tagalbi, ay tagabangbang. Lag girug takatanya sas fagirugan laman sik fagirugun fag fanggalangun. 23Dewa katanya, masine wayam gfon laman ay fanggalangun sik baka, ay sik fagbaugun yud maugali sik afud at bilug laman at nafalganan fia fag fanggalangun, ay wa masine nu gfon kanya fag fanggalangun laman famafasludan sa sik fatuyanan. 24Lag gfon sa angku sik fagbaugun at mabulan at fuluy ay at yud maugali at fuluy. Lag am gfakamulun takatanya si ay ngay furuan. 25Lag yangay gbayad takatanya fag ngay fagbaugun siginan tibak talun laman ay fanggalangun sa angku, aroro kwa kaylat takatanya.
26-27“Sik riangan baka, tupa ay kambing, masine nu gfasi yay at mina kaduge fituk menit. Dewa katanya, sis fawaluk menit, masine wan gfon kanya fag riangan laman sik fagirugun fag fanggalangun. 28Sik menit lag am gfasfuan gfon laman ay fanggalangun sik baka, tupa, ay kambing gasfuan at ngay riangan.
29“Nu gfon am sa angku ay famauseganan fag fanggalangun, fakamuluni kata at matuyan laman kaylat ktua. 30Ay ginanya yangay fag menit gina am gfon oni wan kanya fag fanggalangun ay lag gfasawad ya laman ban sat fadogan fag menit. Au Yawi.
31“Faningi fia fagayu ku suguan sa ayu. Au Yawi. 32Suyui tua ku ngayan, ay asafuli te, kdi e malong. Au Yawi at nafili ayu laman sa angku. 33Au wan ay Dius at nafalfas ayu siginans talun Igiptu. Au Yawi.”
Currently Selected:
Lebitiku 22: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
