Ub 1
1
Ub at Ugali Matuyan
1E sik mangama tagbanwan sis talun Us at ngayan Ub. At ugali matuyan ay kalimu tua Dius, ay gsaruy tua at mauri. 2At sisian fituk mangama ay tuluk mangena. 3Ay e fituk libuk tupa ay e tuluk libuk kamelyu ay e limak sandank dadwa baka, ay e limak sandank asnu tina ay ngayu at fagsuguan, ay kanya wan at maramraman sas fakamenitan baliwa fag talun.
4Ay kayu menit, at ngay baguama at fakamulun gungbusan gfalganan sik ngay fakonun sit mesa bale, ay kanya fagayu gtaban gugat at faduksay fag tuluk mangena. 5Ay galay antabu at fagmafulun, Ub gfon sas Dius sik fanggalangun, laman sat ngay sisian. Kanya masurip nu kafulo ay gfon sas Dius sik fagirugun fag fanggalangun laman sat ngay sisian aroro gamatangan te, ay at ngay sisian manga anke asalanan way, ay e nalong mauri sas Dius. Ub gfakamulun gugat takatanya galay at ngay sisian at fagmafulun antabu.
Taguna fag Famaskud sas Ub
6Sik menit, Yawi at ngay tagbarita#1:6 tagbarita: sas Ebreu, baguama. maful sit daga salubangan, ay sanya yangay Satanas. 7Ay Yawi nainto sas Satanas te, “Daginan o?”
Ay Satanas gbalus te, “Gfoyfolian au stae ay sas fagdaul daga.”
8Ay Yawi ginto sas Satanas te, “O nalag o ku fagsuguan Ub? Fagayu taw sas fagdaul daga we kaksvn anya, aroro at ugali masine tua ay matuyan, ay gfaning tua angku ay gsaruy fagmauriun.”
9Ay Satanas gbalus te, “Anud, Ub gfaning emu aroro nafon o sa anya nusnga setaw. 10Nadiri o anya ay anggan at talnayan, anggan at ngay ramraman, ay nafadante o fagayu at fakamulun, nu katanya, at ngay fagbaugun kafamut. 11Ay agvd! Faskudi buli fagayu tagsi anya. O wa ro ankuri emu?”
12Yawi nalong sas Satanas te, “Agvd, fakamuluni takatanya sa anya, dewa katanya, lag o gfabul.” Ay Satanas nalao wan siginans Yawi at daga salubangan.
13Sik menit gina Ub at ngay sisian maful guseganan sit kaka at bale, 14sik fagsuguan andasug sas Ub ay nalong te, “Kaduge ami gfafakamulun am ngay baka laman kali tam fagtanuman ay gina ami gfafangon am ngay asnu sit dayu, 15ngay taw Syeba masakit andasug ay nataban wan fagayu am ngay fagbaugun ay nafabul yangay ku ngay fadgaloan, ay au way lang at nalagyu laman nanlong sa emu.”
16Ay kaduge kafag fagsuguan garingang, sik fagsuguan andasug yangay ay glong te, “Sik limbad nairug wan am ngay tupa gasfuan ngay tagulit, ay au way lang at nalagyu laman nanlong sa emu.”
17Ay gina kafag fagsuguan garingang, andasug yay fia at fatuluk fagsuguan ay glong te, “Tuluk gaban taw Kaldea andasug sa emi ay nataban wan fagayu am kamelyu ay nafabul wan ku ibama, ay au way lang at nalagyu laman nanlong sa emu.”
18Ay gina kafag fagsuguan garingang, andasug yay fia at faufatk fagsuguan ay glong te, “Am ngay sisian gina maful guseganan sit kaka at bale, 19sik maksvn fag tagmara masakit andasug siginans talun at yud e taw, ay at fagmafulan fag bale ankiklas, ay kanya fagayu anbul wan, ay au way lang at nalagyu laman nanlong sa emu.”
20Ay Ub anlindug ay nagirat at lanbung aroro maksvn nu kabalu. Ay naufo at buk ay namalub sas daga laman gseg Yawi. 21Ay kanya glong te, “Gina au kasalug kwe buba, ay kwa yangay ban e buba gina au kabul. Yawi wan at nafon sa angku fagayu nusnga setaw ay Yawi yangay ban tagbul. Segi Yawi.” 22Ub dewa nadalan takatanya fagayu, kanya di nasalanan ay di nafayud Dius.
Currently Selected:
Ub 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
