Tagfangguna 6
6
Gidyun
1Ngay taw Israel nadog yay fia nafakamulun at mauri sis Yawi at daga salubangan, nu katanya, Yawi nafagbilug anya fagayu sa sangay taw Midyan kaduge fituk banwa. 2Ay kafag ngay taw Midyan maksvn nu gfaurianan ngay taw Israel, nu katanya, taw Israel nalagyu ay nanuksuan sa sangay buksul, ay sa sangay luib, ay sa tiba yak fagsuksuanan at masariu. 3Galay ngay taw Israel gtanum fag buknga, ngay taw Midyan, ngay taw Amalek, ay tiba yak taw tagsiginans fakamenitan baliwa namawayan ngay taw Israel. 4Kafag ngay taw namaful sa sangay taw Israel at talun ay namauri ngay taw Israel at ngay fananumun sitsigons Gasa, ay nabul wan at ngay tupa, ngay baka, ay anggan at ngay asnu. 5Ay kafag ngay taw nu namawayan, gbuba wan at ngay bale ramit ay gtaban wan at ngay fagbaugun, at kayuan kayu sik ngay liung. Ay wa yangay e mafatap anggan at ngay kamelyu. Ay kanya fagayu nafauri ngay taw Israel at talun. 6Aroro siginans taw Midyan at nafakamulun, ngay taw Israel ansik ngay afanyuan. Nu katanya, ngay taw Israel naet gubuk sas Yawi.
7Gina kanya fagayu naet gubuk sas Yawi, 8Yawi nasugu sik taglong, at nanlong sa anya fagayu te, “Katatuy Yawi, taw Israel at Dius at longan: Nafaduksun au ayu siginans talun Igiptu nu inda nu gafagsuguanan am. 9Nafalangfe au ayu siginan sangay taw Igiptu ay siginan sangay tagfaidapan ayu. Nafababo au ayu sa ay ngay fawayan ay nafon au sa ayu at ngay daga. 10Nalong au ayu te, ‘Au ay Dius Yawi. Lag am gseg ngay taw Amur at ngay fagsegan, dewa am gbanwan sit talun.’ Dewa katanya, wam nafaning angku.”
11Sanya ginan, Yawi at tagbarita andasug sas Ufra ay namalunggung sis fun kayu daul sis Uas at talun. Uas siginans Abieser at kasugfunanan. Ginanya, Gidyun, Uas at baguama, gruyus trigu sis fagturisan ubas at rawvg laman ngay taw Midyan wa glag at ngay trigu. 12Yawi at tagbarita ansure sas Gidyun ay nalong te, “Maseganama o ay at mabitsug fag taw, Yawi ggubuk emu.”
13Gidyun gbalus te, “Yawi nangus nu si tua emi, wain fakatatuyun em kayaunanan? Wain kanya at fagyudun gfakamulun at madulo kata ebi at nafakamulun gina gfalangfe em ngay mangaguyang siginans talun Igiptu? Katsi Yawi nafabayan wan emi ay nafon sa sangay taw Midyan.”
14Ay Yawi nalong sas Gidyun te, “Loi wan ay agbilugi am fagmabitsugun laman namalangfe ngay taw Israel siginan sangay taw Midyan. Au tagsugu emu.”
15Ay Gidyun nabalus te, “Tain ro nu mafalangfe au ngay taw Israel? Ay ami wan fag talanan at mamomuy sis Manase at kasugfunanan, ay si emi fag talanan au wan tagafalingunan.”
16Ay Yawi nabalus te, “Ggubuk kro emu, ay namabul o ngay taw Midyan kata nu gfawayan o sadik taw.”
17Ay Gidyun nalong te, “Yawi, nu anud sik mauseganan au sa emu, falagi sa angku sik fakatoglagan te, o wan at nasugu angku. 18Lag yap o glao. Namul kyay ku fanggalangun sa emu.”
Ay Yawi nabalus te, “Kin, gfanya kyay emu.”
19Ay Gidyun noli yay laman namatama sik kambing tumad ay anggan tinapay at yud e famabia. At kayuan at fangawat, sik wabilug saku. Sanya ginan, kanya nasuad sa sik bang at ba yamas ay at sabo natalin sa sik bisu, ay nabuba sas Yawi at tagbarita at malunggung sis daga fun kayu daul.
20Yawi at tagbarita nalong anya te, “Folii kafag yamas ay kafag tinapay ste stungud gang, ay ugwagi sanya kafag sabo.” Ay Gidyun nafaning anya. 21Ay Yawi at tagbarita nafatayuk at bitbitan fag tulag sanya fag fakonun, ay nke igang sanya stungud gang ay nairug kafag fakonun. Ay Yawi at tagbarita nalyam masakit.
22Ay Gidyun nu natuyan te, Yawi wa fia at tagbarita at nalag, nalong te, “Yawi, ku Fun, nalag kwa fia ay nafasalubangan am tagbarita!”
23Dewa katanya, Yawi nabalus anya te, “Lag o gamatangan ay kalimu. Wa ro wo kabul.”
24Ay Gidyun nawat sanya sik fagirugan ay nafangayan te, “Yawi tagfon fagmanabayanun.” Dasug katsi, kanya fag fagirugan si yay gugats Ufra, sis Abieser at ngay kasugfunanan at talun.
25Ginanya yangay fag yabi, Yawi nalong sas Gidyun te, “Namul o am mama at baka at mataglu yangay tagfituk banwa. Sanya ginan, nanrufa o at nawat fag fagirugan laman sas Baal, ay fuani yangay kafag turuk fagtoglagan Asera fag fagsegan tagsis day fagirugan. 26Sanya ginan, nangawat o sik fagirugan sas tungud buksul laman sa angku, Yawi am Dius. Ay foni angku am ba baka laman sik fanggalangun fag fagirugun. Ay am famaygang am nalifungi wan fag turuk.” 27Ay Gidyun nataban at fagsuguan fag safulu ay nafakamulun kata Yawi at suguan sa anya. Ay nu gfakamulun si way sad yabi, aroro kalimu at ngay kalongan ay at ngay kaiban.
28Balabag di, ngay taw nalag Baal at fagirugan nu marufan, ay Asera at turuk nu magatvngan, ay kanya wan at famaygang sat fanggalangun fag baka sa at bagu fag fagirugan. 29Ngay taw gidgintoan te, “Sinu at nafakamulun takatatuy?”
Ay kanya fagayu nu nainsaful, ansaful te, Gidyun, Uas at baguama at nafakamulun.
30Nu katanya, kanya fagayu nalong sas Uas te, “Faduksuni am baguama! Fabuli anya! Aroro kanya narufa Baal at fagirugan ay nalifung kafag turuk fakatoglagan Asera fag fagsegan.”
31Ay Uas nabalus kafag ngay taw takauri ay at maligung anya te, “O gfabadbaboan am angku aroro sas Baal? O ggubuk am anya? Nusnga sinu tagfadiuganan anya, kanya way nangus at fagfabulun katsi sbalabag. Baal nu sik matuyan tua fag dius, kanya mafalangfe tua nangus at sadili ay mafauri at narufa at fagirugan.” 32Siginan ginanya, ngay taw nafangayan Gidyun te, “Erubaal,” at masuad te, “Fabayani wan Baal tagfalangfe at sadili,” aroro Gidyun narufa wan Baal at fagirugan.
33Ginanya, ngay taw Midyan, taw Amalek, ay anggan tibak taw tagsiginans fakamenitan baliwa ansadi laman namawayan ngay taw Israel. Kanya fagayu nadife Liskung Urdan ay anful sis datag Esreel. 34Yawi at Falad nagubuk Gidyun, ay Gidyun nauyup at budyung laman guro Abyeser at ngay kasugfunanan laman galo anya. 35Gidyun nasugu yangay sik ngay tagfosuk longan laman nanlong sas Manase, Aser, Sebulun, ay Naftali at ngay kasugfunanan laman namawayan yangay. Ay kanya fagayu nanangalo Gidyun.
36Ay sanya ginan, Gidyun nalong sas Dius te, “Nu anud fia te, ggubuk o angku laman namalangfe ngay taw Israel, 37katsi namoli au sigyu tupa si em fagruyusan trigu. Ay damug ro nu nafabasa tua kafag sigyu tupa ay lutuk ngap matat way, saful au te, gagbilug o angku laman namalangfe ngay taw Israel kata am longan.” 38Ay katanya wa fia at kinfasludan. Ay balabag di, Gidyun masurip nu kafulo ay nabul kafag sigyu tupa ay nagimpvs, ay at mamam ankapnu sik taya.
39Sanya ginan, Gidyun nalong sas Dius te, “Lag yap o kadotama angku. Sadi yak fakatoglagan ku fagetun sa emu. Katsi ro, lutuk man at mabasa siginans damug, dewa katanya, kafag sigyu tupa matat.” 40Ay ginanya fag yabi Yawi nafakamulun takatanya. Ay kafag sigyu tupa matat way fia, dewa katanya, lutuk ngap mabasa way.
Currently Selected:
Tagfangguna 6: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
