Esra 1
1
Fun Sirus Nafafoli ngay Taw Udyu sat Talun
2Kr 36:22-23
1Gina taguna fag banwa fun Sirus nu gfunan sis Persya, Yawi nafafasludan at longan at nalong sat taglong Eremyas. Ay kanya nafamatanganan Sirus laman kawat sik foyungan. Ay fun Sirus nariruk kafag foyungan, ay nafabuba sas fagdaul at fagfagtainanan:
2Katatuy fun Sirus, talun Persya at fun, at longan:
Yawi, banwa at Dius, nafatigwanan wan sa angku fagayu fagfagtainanan sas fagdaul daga, ay nafatigwanan yangay sa angku laman nangawat at bale sis Erusalem tagsis talun Uda. 3Dius at ngay taw, afolii wan sas Erusalem ay nandog am nangawat sanya ay Dius Yawi at bale, kanya gbanwan sanya. Ay kanya ban nangus gufud ayu. 4Ay at sawad fag ngay taw tagbanwan sas nusnga nday fag talun gumubuk ayu gina am glao. Ay gfon yay nangus ayu ngay sanbung salapi, gintu, ay fagayu ay fagayudanun, ay at ngay fagbaugun, ay at yud fabulunan fag ngay fanggubukun laman sas Dius at bale sis Erusalem.
5Yawi nafamatangan tibak taw Israel laman kafoli sas Erusalem. Nu katanya, kanya fagayu nafalganan laman nangawat Yawi at bale. Ay galo yangay sanya Uda ay Benamin at ngay kasugfunanan, anggan ngay tagfon fanggalangun, ay ngay taw Lebi. 6Tibak taw nagubuk anya fagayu siginan nu gfon ngay fagagbilugun at mawatan salapi ay gintu, ay at fagayudanun fag ngay fagagbilugun, ngay fagbaugun, ay tiba yak mafanud fag ngay fagagbilugun, ay at yud fabulunan fag ngay fanggalangun.
7Ay fun Sirus nafafoli yangay ngay fagagbilugun sas Yawi at bale, fun Nabukudunusur at nabul siginans Erusalem ay at nafasakbo sat fagsegan at bale. 8Ay Sirus nafatigwanan kanya fag ngay fagagbilugun sas Mitredat, tagalaga at ngay fagagbilugun. Sanya ginan, Mitredat natap ay nafon at rirukan sas Sesbasar, sik fun sirut si sik afud talun Uda.
9-10Kayu tuy kanya fag ngay fagagbilugun:
| ngay fagsuadan at mawatan siginans gintu | 30 |
| ngay fagsuadan at mawatan siginans sanbung salapi | 1,000 |
| ngay fiso ayu sirut matares | 29 |
| ngay taya at mawatan siginans gintu | 30 |
| ay ngay taya at mawatan siginans sanbung salapi | 410 |
| ay tiba yak fagagbilugun | 1,000 |
11Ay nu fagayu wan, kanya fag ngay fagagbilugun limak libu ufatk sandan ay fagayu at fangawat siginans gintu ay salapi. Ay Sesbasar nabuba kafag ngay fagagbilugun gina kafoli sas Erusalem siginans Babilunya gadgaloan tiba yak natabanan.
Currently Selected:
Esra 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
