Nu Galin 40

Nu Kawat Yawi at Bale

1Yawi nalong sas Muisis te, 2“Fawati sik bale fagnansegan angku (at ngayan yangay te, Bale Fagnangablanganan#40:2 fagnansegan… Fagnangablanganan: katanya sas Ebreu nu gfangayan Yawi at bale. Anggan sas t.6, 29. ), gina taguna fag menit sis fasadik magdanun. 3Ay fasakboi sanya Fagsuadan Nasadian, ay rabingi yangay at famalabag fag ramit. 4Fasakboi fagfatungkudan tinapay sasad bale ay fasinei at ngay fagagbilugun sanya. Fasakboi yangay fagfatungkudan salung ay fasanyai ngay salung. 5Ay fagirugan famaebebanglu fasais salubangan Fagsuadan Nasadian, ay rabingi ramit faningding sakbawan bale ramit.

6“Fagirugan fanggalangun fasais Fagnansegan fag Bale Ramit at sakbawan. 7Fasai ku bale#40:7 ku bale: sas Ebreu, Bale Fagnangablanganan. Anggan t.12, 22, 24, 30, 32, 34, 35. ay fagirugan at wabilug fagfegusan ay faemamami. 8Rabingi ngay ramit si sangaba ligung alad ay anggan sis sakbawan alad.

9“Sanya ginan, buli sik langis ay faramsigi sas bale ay fagayu at fagagbilugun ay fatigwanani sa angku, laman mafasamanan sa angku. 10Faramsigi yangay fagirugan fanggalangun ay fagayu at fagagbilugun sanya, laman mafasamanan fia sa angku. 11Faramsigi yangay anggan fagfegusan ay kanya fasamani yangay sa angku.

12“Tabani Arun talamean sa ku sakbawan bale ay faigusi. 13Sanya ginan, faelanbungi Arun at mafasamanan fag lanbung ay rarusi anya langis laman sik tagfon fanggalangun sa angku. 14Tabani yangay at ngay baguama ay fasuluni tagtayuk at bilug fag lanbung sa anya fagayu. 15Ay rarusi yangay sa anya fagayu langis kata am nafakamulun sat mama laman sik ngay tagfon fanggalangun sa angku. Nu katanya, at ngay kasugfunanan ban sik ngay tagfon yangay fanggalangun kabavn.” 16Nu katanya, Muisis nafakamulun Yawi at ngay suguan.

17Nu katanya, kanya nafawat Fagnansegan fag Bale Ramit gina taguna fag menit sis fasadik magdanun, gina at faduak banwa siginan nu glao siginans talun Igiptu. 18Katatuy Muisis nu gfawat bale ramit. Kanya nafae fagfatungkudan turuk, ay nafalindug ngay turuk, ay nabakban, ay nafatungkud yangay ngay turuk alad. 19Ay nafasas tungud bale ramit laman at fangugun ay nafasanya yangay sik famalanib, kata Yawi at suguan sa anya.

20Sanya ginan, Muisis nasuad sas Fagsuadan Nasadian kafag duak dalifi fagrirukan Dius at ngay suguan, ay nafasas buksung ngay famuba, ay nasuklub. 21Ay Muisis nafasakbo kafag fagsuadan sas Fagnansegan fag Bale Ramit, ay narabing famalabag fag ramit, kata Yawi at suguan.

22Ay nafasakbo yangay fagfatungkudan tinapay sas Yawi at bale si baliwas wala fag alvngvdan sis day guyuy famalabag fag ramit. 23Ay kanya nafasanya ngay fanggalangun fag tinapay sis Yawi at daga salubangan, kata Yawi at suguan.

24Ay nafasakbo yangay sas Yawi at bale fagfatungkudan salung sis salubangan fagfatungkudan tinapay sabaliwas fasiunan fag alvngvdan. 25Ay nafoli ngay salung sis Yawi at daga salubangan, kata Yawi at suguan anya.

26Ay nafasanya yangay fagirugan famaebebanglu at mawatan siginans gintu munakbang sis famalabag fag ramit. 27Ay nairug sas fagirugan sik famaebebanglu fag langis, kata Yawi at suguan anya.

28Kanya narabing sik ramit sas bale ramit at sakbawan, 29ay nafoli fagirugan fanggalangun munakbang sis sakbawan. Sanya ginan, kanya nairug sas fagirugan ngay fagirugun fag fanggalangun ay famauseganan Yawi fag ngay fanggalangun, kata Yawi at suguan sa anya.

30Ay fagfegusan nafasas wabilug Yawi at bale ay fagirugan. 31Sanya ginan, Muisis ay anggan Arun talamean nafegus at ngay daluap ay at ngay darafa. 32Kanya fagayu galay nanakbo sas Yawi at bale ay galay nangakbang sas fagirugan, namegus yay at ngay daluap ay at ngay darafa, kata Yawi at suguan.

33Sanya ginan, Muisis nafae alad bale ramit ay fagirugan fanggalangun at ligung, ay narabing faningding sakbawan fag ramit. Ay Muisis nafatabu fagayu at ngay fakamulun.

Yawi at Fagmasineun

Tap 9:15-23

34Sanya ginan, linyabu nasuklub Yawi at bale, ay Yawi at fagmasineun ankapnu sanya fag basad bale. 35Muisis wa masakbo sasad bale aroro linyabu gragangan sanya, ay Yawi at fagmasineun ankapnu kafag bale.

36Galay linyabu ankabat siginans bale ramit, ngay taw Israel gfataglayun nu glao siginan at fagmafulan. 37Linyabu nu dway ankabat, kanya fagayu wa yangay glelegan. 38Kayu menit, Yawi at linyabu sis tungud bale ramit, ay sad yabi kasik afuy, laman ngay taw Israel glag tua kaduge glao.

Currently Selected:

Nu Galin 40: OCCT

Highlight

Copy

Compare