Ester 9
9
Ngay taw Udyu Nababo at ngay Fawayan
1Gina sis falabi tuluk menit sis falabi duak magdanun, Adar fag magdanun, fun Akasuerus nafafasludan at suguan. Ginanya fag menit, ngay taw Udyu at ngay fawayan nu glong, mafamin way anya fagayu. Ay wa nfasludan kata at algan aroro mangaro ngay taw Udyu way at nafabul anya fagayu. 2Ginanya fag menit, ngay taw Udyu anful sat ngay furuan ayu daul ay sa sangay afud talun sis fun Akasuerus at fagfagtainanan laman namabul nusnga sinu at ke algan namawayan anya fagayu. Dewa katanya, we nafaskud aroro kanya fagayu kalimu ngay taw Udyu. 3Ngay afud talun at ngay tagfangguna, ngay tagfagtainan, ngay fun ayu sirut ay tiba yak tagfakamulun nagubuk ngay taw Udyu aroro kanya fagayu kalimu Mardukyu. 4Aroro kanya mabalyanan sit fun at bale ay kadungug sas fagdaul at fagfagtainanan, ay ankugat yay at fagmabalyananun.
5Ngay taw Udyu nafabul at ngay fawayan ginanya fag menit siginans fiso tagsumbalian at uyup. Ay nafakamulun at naylatan sas fagayu takadotama anya fagayu. 6Si yay lang sfuruan daul Susa, kafag ngay taw at nafabul limak sandank mangama. 7Kanya fagayu nafabul yangay Aman at ngay baguama fag safulu at ngay ngayan: Parsandata, Dalfun, Aspata, 8Purata, Adalya, Aridata, 9Parmasta, Arisay, Ariday, ay Baisata. 10Dewa katanya, ngay taw Udyu wa nabul at ngay fawayan at ramraman.
11Ginanya yangay fag menit, fun nainsaful te, seyu at kinbul sis furuan daul Susa. 12Ay fun nalong sas Ester te, “Sis Susa yay lang limak sandank mangama ngay taw Udyu at nafabul ay nafabul yangay Aman at baguama fag safulu. Nataw manga at kinfasludan sa tibak afud talun? Ay nataw ya am fagetun aroro gfon kwa ban fia emu.”
13Ay Ester nalong te, “Mesug fag fun, nu kaylat tuo, aylati ngay taw Udyu tagbanwan ste sis furuan Susa nu namafasludan am suguan balabag, kata at nafakamulun katsi. Ay farabingi Aman at baguama fag safulu at ngay bilug at mabulan.”
14Nu katanya, fun nasugu te, “Fakamuluni Ester at fagetun.” Ay nafasaful sa sangay taw Susa fun at suguan, ay narabing Aman at baguama fag safulu at bilug. 15Balabag di sis falabi ufatk menit gina Adar fag magdanun, ngay taw Udyu tagsis furuan Susa gdog yay maful ay nafabul tuluk sandank mangama. Dewa katanya, wa nabul kafag ngay taw at ngay ramraman.
16Sis falabi tuluk menit, gina Adar fag magdanun, ngay taw Udyu gdog yay anful sat ngay mesa furuan ayu daul laman gfalganan sabaliwa nu gfalangfe at ngay sadili siginan at ngay fawayan. Ay kanya fagayu nafabul fituk safulu e limak libuk taw, dewa katanya, wa nabul at ngay ramraman. 17Ay balabag di, sis falabi ufatk menit ginanya yangay fag magdanun, kanya fagayu gtungkud ay guseganan sit nafalganan fag fagmafulun.
18Dewa katanya, sis furuan Susa, ngay taw Udyu gfataglayun yay nu gfabul at ngay fawayan. Ay sis falabi limak menit gina Adar fag magdanun kanya fagayu gtungkud ay guseganan. 19Kanya wan ngay taw Udyu tagsi tibak afud talun at fagmafulun galay sis falabi ufatk menit Adar fag magdanun. Ginanya fag menit, nu gfodfonan at ngay mesa famonun.
Purim fag Fagmafulun
20Mardukyu nariruk fagayu at kinfasludan. Ay kanya nafabuba sik rirukan sas fagayu taw Udyu sas nusnga nday fag afud talun sis fun Akasuerus at fagfagtainanan. 21Ay sanya fag rirukan Mardukyu nalong sa sangay taw Udyu te, “Amatangani tua gugat sis falabi ufat ay sis falabi limak menit, galay Adar fag magdanun,” 22laman kanya fagayu gamatang tua te, ginanya fag menit nu kalangfe siginan at ngay fawayan, at fakabaluun ansik fagmanabayanun, ay at fagwaywayun ansik fagusegananun. Nu katanya, kanya fag rirukan famamatang sa anya fagayu te, e fagmafuluni ay useganani ginanya fag menit, ay galay am at sadi fodfonani ay ngay famonun, ay foni yangay sat yud e kwa. 23Ay ngay taw Udyu nafaning Mardukyu at suguan, ay kanya fagayu galay banwa e fagmafulun takatanya.
Kata tuy at Faginke Fagmafulun Purim
24Aman, Amedata at baguama fag taw Agag, ngay taw Udyu at fawayan, anke algan laman namabul ngay taw Udyu, nu katanya, kanya fagayu nainsaful nu ginain nu namabul. (Kafag fanginsaful nafangayan te, “pur.”) 25Ay fun nu nasaful kafag algan siginan at mangena Ester, kanya nafariruk sik suguan te, “Fakamuluni sas Aman talamean kata at algan mauri sa sangay taw Udyu.” Ay katanya wa fia at kinfasludan. 26Kanya at masuad at fagnafangayanun kafag fagmafulun te, “Purim.” Kafag longan siginans “pur,” at masuad te, gfafidfilian. Siginans Mardukyu at rirukan ay kata yangay ngay taw at nafafasludan, 27ngay taw Udyu ansadi nu guseganan kaduge duak menit kayu banwa kata Mardukyu at nariruk, ay kanya fagayu namatangan yangay sa ban at ngay kasugfunanan ay fagayu at kintaip sas taw Udyu. 28Galay talanan ay galay kasugfunanan amatangi tua kafag duak menit, ay useganani ginanya sas fagayu furuan ayu daul ay sas fagayu afud talun. Ngay taw Udyu ay at ngay kasugfunanan ban nangus lag kalyam nangaful laman nanguseganan gina Purim fag fagmafulun fag ngay menit.
29Ester, fun at mangena, Abyail at baguina, nariruk yangay laman gfaksvn kafag faduak rirukan sabaliwas Purim. Mardukyu sanya yangay gina griruk. 30Ay Mardukyu nafabuba kanya fag rirukan sas sandan duak safulu e fituk afud talun sis fun Akasuerus at fagfagtainanan. Kafag rirukan nafae fagmasunun ay fagmanabayanun, 31laman gfafasludan gugat Purim fag fagmafulun kata Mardukyu ay Ester at suguan, kata kanya fagayu ay at ngay kasugfunanan nu gfaning ngay faugali sabaliwa nu yud gfangon laman gdarangin. 32Ay Ester at rirukan nafaksvn nu gfafasludan Purim fag fagmafulun ay anriruk tua sas fansulitan fag fafil.
Currently Selected:
Ester 9: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
