Ester 6
6
Nafauseganan Mardukyu
1Ginanya fag yabi, fun Akasuerus wa katiug, nu katanya, nasugu te, “Buli fansulitan sabaliwas fagfunanun.” Ay kanya nafatap at rirukan kaduge gdungugan. 2Natap sanya sik afud at fansulitan sabaliwa Mardukyu nu gsaful Bigtana ay Teres at algan laman gfabul fun Akasuerus. Bigtana ay Teres, fun at ngay fagsuguan, ay kanya fag dua ebi tagulit fun at fagtiugan at sakbawan.
3Siginan at natap, fun nainto te, “Nataw tam famangsi ay famauseganan sas Mardukyu aroro sat nafakamulun?”
Fun at ngay fagsuguan nalong te, “Mesug fag fun, duan.”
4Ginanya yangay, Aman nasakbo laman nanlong sas fun sabaliwa nu grabing Mardukyu sat nafawat fag fagrabingan. Ay fun ginto te, “Sinu in at masakboan?”
5Ay fun at fagsuguan nabalus anya te, “Aman.”
Ay fun nalong te, “Tabani anya stie.”
6Ay Aman nu sanya wan, fun ginto anya te, “Nataw at masine sa sik taw fun at fakaylatun gfauseganan?”
Aman nu glong, anya fun at fagnamausegananun. 7Nu katanya, kanya nalong anya te, “Mesug fag fun, fakatatuyi am fakamulun. 8Sugui te, buli at sadi am lanbung kata sik fun at fagsulunun, gasfuan at sadi am sakayan kabayu, at ke fun at famatoglag sit alfuyu. 9Sanya ginan, sugui sam tiba tungud fag tagfangguna at sadi te, fasuluni fun at lanbung sam fakaylatun gfauseganan fag taw ay fasakayi sas fun at kabayu ay fatungluani sas fagdaul furuan, ay at ngay ufud fagayu uroi te, ‘Katatuy at fakamulun sas fun at fakaylatun gfauseganan fag taw.’ ”
10Fun nalong sas Aman te, “Agvd, namul o at sadi ku lanbung ay ku kabayu, ay namakamulun o fagayu am nalong sas Mardukyu, kanya fag taw Udyu at malunggung si ku day sakbawan bale. Tuyani fia te, umfasludan fagayu am ngay nalong.”
11Nu katanya, Aman nanamul fun at lanbung ay nafasulun sas Mardukyu ay nafasakay sat fun at kabayu ay nafatungluan sas fagdaul furuan kaduge kanya guro te, “Katatuy at fakamulun sas fun at fagfausegananun fag taw.”
12Sanya ginan, Mardukyu anfoli sas day sakbawan fun at bale. Ay Aman gabanganan guli maumutan at alfuyu aroro maksvn nu kapla. 13Kanya nu ndasug sat bale, nafansulit sat mangena Seres ay sat ngay fagadgalangan, fagayu at kinfasludan sa anya. At mangena ay at ngay fagadgalangan ay ngay tagfalu longan, nalong anya te, “Mardukyu gababoun wa emu. Wa ban o mababo ya anya aroro kanya sik taw Udyu. Matuyan wan gababawan wo.” 14Kanya fagayu kaduge kamatoan, fun at fagsuguan masakit nu gtaban Aman sas Ester at nafalganan fag yafun.
Currently Selected:
Ester 6: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
