Fakamulun 25

Pablu sis Salubangan Fun Festu

1Ay Festu andasug sas Udea laman nanfunan. Nu nlangfe tuluk menit, kanya naundaud sa Erusalem siginans Sesaria. 2Ay ngay fun tagfon fanggalangun ay taw Udyu at ngay tagfangguna gfoyung sa anya at fantabugan sas Pablu. 3Kafag ngay taw get gfainfanyuan sas Feliks te, “Fafolii Pablu sas Erusalem, dewa katanya, kanya fagayu at algan namalabag way Pablu sasad dalan, laman namabul.”

4Ay Festu gbalus te, “Pablu maubungan sis Sesaria, ay kwa ban glugo ste; kafoli kway vtv sanya. 5Faaloi wa sa angku tiba at ke fanambagun siginan ayu ay sanyai waban nu gfoyung am nu matuyan way te, Pablu e nafakamulun mauri.”

6Festu nu sis Erusalem malgau walu ay mannga safuluk menit, ay sanya ginan, anfoli wan sas Sesaria. Balabag di, nasakbo sas fagfasinean mamalong ay nasugu te, “Tabani stae Pablu.” 7Pablu nu ndasug, ngay taw Udyu siginans Erusalem naligung anya, ay gfoyung ngayuk mauri at fantabugan sa anya, ay kafag ngay taw we famatuyan.

8Pablu gfoyung at sadili te, “Kwe nafamabo taw Udyu at faugali, ay kwe nafakamulun nusnga setaw at mauri sas Dius at bale, ay sas talun Ruma at fun.”

9Aroro Festu kaylat gfauseganan ngay taw Udyu, kanya ginto sas Pablu te, “O kaylat o glo sas Erusalem laman sanya nu gdungugan au ngay taw at fanlonganan sa baliwa emu?”

10Ay Pablu gbalus anya te, “Katsi ste au malindug sis Ruma at fun at bale fagfasinean ngay mamalong, ay stei wan nu ginsaful am te, o e asalanan au. Kwe nafakamulun ngay asalanan sas taw Udyu, gtuyan au te, saful way ro wo. 11Ay dewa katanya, nu e nafakamulun kway asalanan sak gfaurianan fakabulun, kaylat kway at faurianan sa angku. Dewa katanya, nu dway matuyan at fantabugan sa baliwa angku, wa masine nu e gfon angku sanya fag ngay taw, nu katanya, get kway te, nangakbang kway sas talun Ruma at fun laman ggubuk angku.”

12Festu nu nanamakamatoan wa vtv at ngay tagfalu aringang, ay kanya nalong sas Pablu te, “Aroro kaylat o nangakbang sas Ruma at fun, agvd nangakbang wo sa anya.”

Nataban Pablu sas Fun Agripa ay sas Birinisi

13Ay nu nlangfe nu seyuk menit, fun Agripa ay Bernisi andasug sas furuan Sesaria laman nansibo Festu. 14Ay ngayuk menit kanya nu sanya, ay Festu gfayamag sas fun Agripa Pablu at malong. Kanya nalong te, “Iste e maubungan, Feliks at yud nafalfas siginans fagubungan. 15Ay gina au sis Erusalem, ngay fun tagfon fanggalangun ay taw Udyu at ngay fagtainan nafoyung sa angku at fantabugan sabaliwa kanya fag taw, aroro kaylat nu gfaurianan au anya sas fakabulun.

16“Ay glong au sanya fag ngay taw te, ‘Taw Ruma we ugali tagfaurianan sik taw nu dyakmay nanamasalubang kafag taw sa sangay tagfantabugan sa anya, ay kafag taw nu dyakmay nafoyung at sadili.’ 17Nu katanya, kanya fagayu nanangalo angku staes Sesaria. Kwa nafangulan ya ku buknga, nu katanya, balabag di, nananmalunggung au sas fagfawabiluganan ngay mamalong, ay nafauro au kafag taw. 18Ay tagfantabugan anya fag ngay taw nu gsalubangan wa ngayu, at foyungan sabaliwa Pablu wa kata ku amatanganan. 19At ngay fagbadbaboanun mangaro sa way baliwa at ngay fagafanudun ay sabaliwa sik taw at ngayan Isus, ay kanya nbul wan ay Pablu gfoyung te, kanya gleleg yay. 20Ay kwa saful ku fakamulun, nu katanya, nainto au Pablu te, ‘O kaylat o nu sas Erusalem nu e ginsaful te, o e asalanan o?’ 21Dewa katanya, Pablu nalong te, ‘Nangakbang au sas talun Ruma at fun laman kanya gdungugan angku.’ Nu katanya, nasugu au te, ‘Uliti anya nu dyakmay au namataban anya sas Ruma at fun.’ ”

22Ay fun Agripa glong sas Festu te, “Kaylat kyangay gdungugan kanya fag taw.”

Ay Festu gbalus anya te, “Balabag ban dungugani anya.”

23Balabag di, fun Agripa ay Bernisi andasug gadgaloan at tagfawayan at tiba tungud fag ngay fun, ay sis furuan at ngay ke fanambagun fag ngay taw, ay nasakbo sas fagmafulan fag suluk ay sanya fag ngay taw gfauseganan anya. Ay Festu gsugu te, “Fasakboi Pablu.” 24Ay Festu glong te, “Fun Agripa ay fagayu am tagste, glag wam tuy fag taw. Fagayu taw Udyu sis Erusalem ay sis Sesaria gudguroan get sa angku te, ‘Wami kaylat ya tuy fag taw nu gleleg.’ 25Ay kwe nalag at asalanan sak gfaurianan anya sas fakabulun. Ay aroro kanya naet te, ‘Nangakbang au sas talun Ruma at fun,’ ku algan te, namalo kwa ban anya sas furuan daul Ruma. 26Baliwan kya saful ku rirukan ban sas Ruma at fun sabaliwa tuy fag taw. Nu katanya, nataban kyay anya say daga salubangan kyay sa ayu fagayu, kaugat wan sa emu, fun Agripa, laman e fagmarirukun kban nu ntabu tam ginto anya. 27Aroro ku amatanganan ya masine at nantaban sas Ruma at fun sik kinkubung nu dyay nafayamag at ngay fawayan at fantabugan mauri sa anya.”

Currently Selected:

Fakamulun 25: OCCT

Highlight

Copy