Fakamulun 20

Pablu Nalo sas Masidunya ay Gresya

1Nu ntabu wan kafag fagbadbaboanun, Pablu nafaful ngay tagafanud ay nafabitsug at ngay amatanganan, ay nu nalong wan katanya, nalao wan, ay nataglayun sas Masidunya. 2Ay kanya nanansibo sanya fag ngay furuan ay kamoyung, ay ngay tagafanud at ngay amatanganan anbitsug. Sanya ginan, nataglayun wan sas Gresya, 3ay nabanwan sanya tuluk magdanun. Ay nu galoun wan sas Sirya, nasaful te, ngay taw Udyu e algan namabul anya. Nu katanya, namatangan te, kafoli way, ay sa way bans Masidunya nu glao. 4Ay nu galoun wan, Supater, Pirus at baguama fag taw Berea, nanangalo ay anggan Aristarku ay Sekundu fag ngay taw Tesalunika, ay Gayu ay Timuteu ay anggan Tikiku ay Trufimu fag ngay taw Asya. 5Ay kanya fagayu naguna emi ay gfanya sis Truas. 6Ay nasakay ami sas sakayan lino siginans Filipus nu nlangfe fagmafulun sabaliwa Tinapay at yud e Famabia. Ay nu nlangfe limak menit andasug ami sas Truas, ay nasanya yaymi fituk menit.

Sis Truas, Nafaleleg sik Baguama Mabulan

7Ay gina Sabadu sad yabi maful ami laman kon tam Fun at Yafun, ay Pablu nu gfoyung sa sangay taw anggan swabilug yabi aroro at amatanganan glo waban sbalabag. 8Ay si em fagmafulan sit tungud fag salug, ngayu at salung. 9Ay sik baguama at ngayan Eutiku malunggung sis fagbanawanan. Ay aroro ngaduge Pablu nu gfoyung, kanya natiugun, nu katanya, kanya natiug ngabasad ay antong siginan at fatuluk salug, ay ngay taw nu namangkad wan, anbul wan. 10Ay Pablu naduksun ay namalub sit tungud ungdan ay nasafung, ay nalong sa sangay taw te, “Lag am kalimu, kanya gleleg yay.” 11Ay Pablu gdog yay nasakbo laman nanlungud tinapay ay nangon. Sanya ginan, gdog yay kamoyung sitsigons daga kamenit. Sanya ginan, nalao wan. 12Ay tagsanya fag ngay taw nu gfauli kafag baguama, gleleg wan, ay kanya fagayu maksvn nu guseganan.

Pablu ay at Ufud Andasug sas Furuan Miletu

13Sanya ginan, nasakay wami sas sakayan lino tagsas furuan Asus, aroro sanya nu nangablangan ami Pablu, ay sia ro glao way nu nangadasug sanya. 14Ay nu naladlagan ami sis furuan Asus, nafasakay ami anya ay nataglayun ami sas Mitilene. 15Ay sanya ginan andasug ami sas day furu Kiyu ay balabag di nadife ami sas Samus, ay nu nlangfe sik menit, andasug ami sas furuan Miletu. 16Wami nadalan ya furuan Efesu, aroro Pablu wa kaylat gfangulan at buknga sis talun Asya. Aroro kanya at fakaylatun si was nangus Erusalem gina yud andasug fagmafulun Pentekustes.

Pablu nu Gfakamatoan Taguyan Furuan Efesu at ngay Fagtainan

17Gina sis Miletu, Pablu nafaful ngay tagafanud at ngay fagtainan siginans furuan Efesu. 18Ay at ngay fagtainan nu ndasug wan, Pablu nalong sa anya fagayu te, “Nasaful wam ku ugali gina au gugat si ayu, siginan taguna fag menit nu kadasug au sas talun Asya. 19Gfababaun au fia galiasun nu gfaning au tam Fun, dewa au nadalan at maksvn fag fagidapun aroro ngay taw Udyu at algan namauri angku. 20Ay nasaful yangay am te, kwa gadgaragun gfoyung sa ayu nusnge wain at mafagubuk ayu ay gfoyung au ayu sasad fagngayuan ay say ngay bale. 21Ay nafoyung au sas taw Udyu ay sas taw Gresya sabaliwa nu gubun at ngay asalanan ay nu gfaning Dius, ay nu gafanud sa tam Fun Isus.

22“Ay katsi glo kwan sas Erusalem, kata at Masine fag Falad at fakaylatun, ay kwa nasaful takadasug ban sa angku. 23Ku fagsafulun te, at Masine fag Falad nafoyung wa sa angku ku fagnandalanan sas fagayu furuan te, tagfanya ban angku fakaubungun ay fagidapun. 24Dewa katanya, wa mafanud sa angku ku leleg, at mafanud nu namatabu au ku fanambagun tam Fun Isus at nafatigwanan sa angku fag fakamulun, siginan nu gfoyung at Masine fag Barita sabaliwa tam Dius at fagmagalangun.

25“Ay saful kwa te, gina au kamoyung, nafoyung kwa sa ayu sabaliwa Dius nu gfagtainan, ay katsi glong au sa ayu te, siginan ban katsi, wa ban tam gdog ya gladlagan. 26Matuyan ku foyungan sa ayu te, bunwa ku asalanan ya dewa am anfaurianan, 27aroro kwa nadgaragun gfoyung sa ayu Dius at ngay algan. 28Dirii ay sadili, ay fagayu tagafanud at Masine fag Falad at nafatigwanan sa ayu laman galaga Dius at furuan, at nabayad siginan at sadili taguk. 29Saful kwa te, nu nalo kwa ban, e kadasug ban sa ayu sik tagfangagat fag idu talun, ay gugatan namabul ay fagalagaun fag ngay tupa. 30Siginan yangay ban ayu takamuagan fag ngay takamoyung, kanya ban fagayu, namalyam ngay tagafanud sas Isus at ngay fagafanudun, at fakaylatun te, laman namaning am anya. 31Nu katanya, mataganani, ay amatangani te, kaduge tuluk banwa gfoyung kwa gugat ayu, at kaksvnan gwayway au kayu menit ay yabi.

32“Ay katsi gfatigwanan au ayu sas Dius ay sat longan sabaliwa at fagmagalangun. Kanya wan tagfaksvn ayu ay gfagbilug at mafalganan sa ayu ay sas fagayu at ngay nafili. 33Kwa nanuran nusnga sinu fag taw at ramraman ay at lanbung. 34Saful wam te, nafakamulun kyangay laman grvbvy ku fagayudanun ay anggan ku ngay ibama at fagayudanun. 35Sas fagayu ku nainlufuyan nafalag au ayu te, masine nu ggubuk at ngay mamomuy, ay gamatangan tam Fun Isus at longan te, ‘Amauseganan yap tagfon nu gamut tagbul.’ ”

36Ay nu ntabu wan nu garingang, Pablu gtudan ay gdarangin gasfuan sanya fag ngay taw. 37Fagayu taw maksvn nu gwayway ay naugwan ay nayuk Pablu. 38Ay maksvn nu kabalu aroro Pablu at nalongan te, “Wa ban am gdog ya lumag angku.” Sanya ginan, nanangufud wan sas sakayan lino.

Currently Selected:

Fakamulun 20: OCCT

Highlight

Copy