Fakamulun 15

Ngay Nasugu ay Ngay Fagtainan Anful

1Ginanya, e ngay taw siginans talun Udea andasug sas furuan Antiukya, ay kanya fagayu nafoyung sas yud Udyu fag ngay tagafanud te, “Nu dway am nafae fakatoglagan, kata Muisis at Faugali, wa ban am umlangfe.” 2Nu katanya, Pablu ay Bernabe gfabadbaboan kanya fag ngay taw tagsiginans Udea. Ay ngay tagafanud sis Antiukya nafili Pablu ay Bernabe laman glao sas Erusalem gadgaloan tibak tagafanud ay namakamatoan sanya fag ngay nasugu ay fag ngay fagtainan sabaliwa nu gfae fakatoglagan. 3Nu katanya, ngay tagafanud sis furuan Antiukya nasugu duama ay tiba yak tagafanud. Ay kanya fagayu gina gdalan sas talun Fenisya ay Samarya, nafasaful te, e ngay yud Udyu tagafanud wan sas Isus. Ay sanya fag ngay tagafanud maksvn nu guseganan. 4Ay kanya fagayu nu ndasug sas Erusalem, sanya fag ngay tagafanud, ngay nasugu ay at ngay fagtainan, guseganan gfasakbo anya fagayu. Sanya ginan, Pablu ay Bernabe nafoyung sabaliwa Dius at ngay nafakamulun.

5Ay tibak taw Fariseu tagafanud anlindug ay nalong te, “At yud Udyu fag ngay taw masine nu e fakatoglagan yangay ay nu gfaning Muisis at Faugali.”

6Nu katanya, Isus at ngay nasugu ay at ngay fagtainan anful laman gkamatoan sabaliwa takatanya. 7Ay nu ngaduge wan nu gkamatoan, Pedru anlindug ay nalong te, “Em ngay faduksay, nasaful wam te, Dius nafili angku siginan ayu laman namoyung au at Masine fag Barita sas yud Udyu fag ngay taw laman kanya fagayu dumungug yangay ay gafanud sas Dius. 8Dius saful way fagayu taw at amatanganan. Ay kanya nafalag te, kaylat yangay anggan yud Udyu fag ngay taw siginan nu gfon sa anya fagayu at Masine fag Falad, kata at nafon sa antam. 9Dius nu gdama yud Udyu ay antam fag ngay taw Udyu, gsud way, aroro Dius nafasine yangay yud Udyu at ngay amatanganan gina kanya fagayu anke fagafanudun. 10Katsi nafaskud am Dius ay nafafasanan am sa sangay yud Udyu fag ngay tagafanud at mabyat, tam fagyudun makatu gfasanan ay anggan tam ngay mangaguyang at fagyudun makatu gfasanan. 11Gafanud tam te, umlangfe tam anggan yud Udyu fag ngay tagafanud, aroro siginan tam Fun Isus at fagmagalangun.”

12Ay fagayu tagsanya nu nadungug takatanya, namaragangan way lang. Ay kanya fagayu nadungugan Pablu ay Bernabe nu gfansulitan sabaliwas Dius at nafakamulun sa anya fagayu gina duama magamut sis yud Udyu fag ngay taw. Duama nafakamulun at ngay madulo ay at mabalyanan tagfatuyan te, Dius si anya. 13Ay duama nu ntabu wan nu gfoyung, Santiagu nalong yangay sa sangay tagafanud te, “Ku ngay faduksay dungugani angku.” 14Simun nafoyung sa antam sabaliwa tam Dius nu guro at yud Udyu fag ngay taw laman kanya fagayu Dius yangay at ngay taw. 15Katanya yangay ebi fag ngay taglong at rirukan te,

16“ ‘Nu ntabu ban takatanya kafoli kwan, ay nandog kban namawat Dabid at fagbanwanan at kinrasras, ay nandog kban namalindug kafag bale at kinkarit,

17laman ban tibak taw grvbvy tam Fun, anggan ku nafili fag ngay taw yud Udyu laman ku ngay taw.

Katanya tam Fun at longan.

18Ay nu gfoyung kafag longan siginan wa ebi.’#15:18 Amus 9:11-12.

19Nu katanya, nu sa angku, lag tam gfaidapan ya at yud Udyu fag ngay taw nu nangakbang sas Dius. 20Nu bunway namoyung way tam sa anya fagayu te, ‘Lag kon nusnge wain fag fanggalangun at nafon sa sangay taw at nawat fag fagsegan, ay lag gfanugtug, ay lag namatugtug, ay lag kon yamas fagbaugun at yud nafataguk ay anggan taguk.’ 21Aroro siginan ebi, e gfoyung wan Muisis at Faugali sas fagayu furuan, ay e gtap kafag longan sa sangay taw Udyu at ngay bale fakafulan galay Famiangalay fag Menit.”

At Rirukan sas Yud Udyu fag ngay Tagafanud

22Nu katanya, Isus at ngay nasugu ay ngay fagtainan, anggan fagayu tagafanud namatangan te, Masine nu gfili tam siginan antam nu seyuk mangama laman at nangalo Pablu ay Bernabe sas furuan Antiukya. Ay kanya fagayu nafili Silas ay Udas at ngayan yangay te, Barsabas. Ay kanya fag dua tagfangguna ngay tagafanud. 23Katatuy at nalong sit ba rirukan:

Ami fag ngay nasugu ay fag ngay fagtainan, nariruk ami sa ayu em ngay faduksay, yud Udyu fag ngay tagafanud tagbanwan si sangay furuan Antiukya ay Sirya ay Silisya te, O manabayan tuam? 24Nadungug ami te, tibak taw ste ginan emi deyud em suguan, gfaduanun ayu siginan at ngay foyungan. 25Nu katanya, nafili ami sik ngay mangama, ay nasugu ami sa ayu laman nangalo tam fakesugun fag duak faduksay Bernabe ay Pablu. 26Ay duama nafalganan at leleg sas fagidapun laman gfaning tam Fun Isus. 27Ay nasugu ami Udas ay Silas laman gfoyung yangay sa ayu em ngay nalong sit buba fag rirukan. 28Siginan at Masine fag Falad at gubuk, ansadi ami te, wami nangus gfamut ya ay fagfaningun sas day takatatuy: 29lag am kon fakonun at nafon fag fanggalangun sa sangay fagsegan, ay lag gfanugtug, ay lag namatugtug, ay lag kon taguk, ay fagbaugun at faknul nu dway e nafataguk. Ayayui siginan takatanya fag faugali. Kata kanya em foyungan.

30Sanya ginan, nasugu wan Udas ay Silas sas Antiukya. Ay nu ndasug wan, duama nafaful ngay tagafanud ay nafon at ba rirukan ay sanya ginan, natap. 31Ay nu natap wan, sanya fag ngay taw guseganan ay ansun at ngay amatanganan. 32Ay Udas ay Silas, Dius yangay at taglong, ngayu yangay at foyungan sa sangay tagafanud tagfaksvn at ngay amatanganan ay at fagafanudun. 33Kafag dua gbanwan yay sanya ngayuk menit. Ay sanya ginan, duama gina galoun laman kafoli sat nasugu anya, sanya fag ngay tagafanud gdarangin anya laman manabayan nu glao. 34(Dewa katanya, Silas at algan kafamato yay sanya.) 35Ay Pablu ay Bernabe gbanwan yay sis Antiukya ay gfoyung ay gfayamag tam Fun at longan magamut yangay tibak takamoyung.

Pablu ay Bernabe nu Gsaruayan

36Ay nu nlangfe ngayuk menit, Pablu nalong sas Bernabe te, “Kafoli wata sangay furuan ay nansibo sanya fag ngay tagafanud, sa ta fagfoyungan tam Fun at longan, laman nanlag ta te, setain kanya fag ngay taw at fagafanudun.” 37Ay Bernabe kaylat gtaban Uan at ngayan yangay te, Markus. 38Ay Pablu wa kaylat ya gtaban Markus aroro ebi kanya naubun duama gina sis talun Panfilia, ay wa nafataglayun at fakamulun. 39Pablu ay Bernabe ankugat yay nu gbadbaboan, ay duama nasaruayan. Nu katanya, Bernabe nataban Markus ay duama nasakay sas sakayan lino tagsas furu Sipre. 40Ay Pablu nataban Silas, ay sanya fag ngay tagafanud nadarangin duama laman tam Fun gdiri, ay sanya ginan duama nalao wan. 41Ay duama nadalan sas talun Sirya ay sas Silisya laman gfaksvn sanya fag ngay tagafanud at ngay fagafanudun.

Currently Selected:

Fakamulun 15: OCCT

Highlight

Copy