2 Fun 25
25
1Sis fasafuluk menit, sis fasafuluk magdanun sis fasiamk banwa fun Sedekya nu gfunan talun Uda, Nabukudunusur talun Babilunya at fun ay fagayu at ngay tagfawayan anful sis day furuan Erusalem ay nafabungsud lutuk sis fun alad laman at fagsakboan. 2Ay kanya fagayu maligung sis furuan Erusalem sitsigons falabi sadik banwa Sedekya nu gfunan. 3Ay sis fasiamk menit sis faufatk magdanun ginanya yangay fag banwa, anke fanlunus maksvn sis Erusalem, ay ngay taw tagbanwan sanya we fakonun ya. 4Ngay taw Babilunya naiklas wan sik afud Erusalem at alad, ay kanya fagayu dewa maligung wan, Sedekya ay at ngay tagfawayan naduksun gina mayabi sas sakbawan tagsis wabilug duak alad munakbang sis fun at tanuman, ay nalagyu sas Liskung Urdan. 5Ay talun Babilunya at ngay tagfawayan nafafalo fun Sedekya ay nasud sis datag tagsis furuan Eriku. Sedekya at ngay tagfawayan ansaruayan siginan anya. 6Ay Babilunya at ngay tagfawayan nagamat fun Sedekya ay nataban sas fun Nabukudunusur sas furuan Ribla. Ay sanya wan fun Nabukudunusur nu gtuyan te, fabuli wan Sedekya. 7Ay sis Sedekya at daga salubangan, kanya fagayu nafabul at ngay baguama. Sanya ginan Babilunya at fun nasugu yangay te, “Guladi Sedekya at ngay mata, ay siuki anya salambitan.” Ay sanya ginan nataban anya sas talun Babilunya.
Naiklas Yawi at Bale
Ere 52:12-27
8Ay sis fafituk menit sis falimak magdanun, ay sis falabi siamk banwa Nabukudunusur nu gfunan sis talun Babilunya, Nebusaradan fag tagfangguna ngay tagulit at fun, andasug sas Erusalem. 9Ay kanya nairug Yawi at bale, ay fun at bale, ay fagayu bale tagsis Erusalem, ay anggan at mafanud fag ngay taw at ngay bale. 10Kanya nafangguna talun Babilunya at ngay tagfawayan, ay naiklas Erusalem at alad. 11Ay kanya fagayu nataban at sawad fag ngay taw sanya ginan fag furuan, anggan at yud e kwa fag ngay taw ay ngay taw tagfadiuganan Babilunya at fun. 12Dewa katanya, kanya nafasawad yay sanya tibak taw at yud e kwa laman galaga ngay tanuman ubas ay ngay gamasun.
13Ngay taw Babilunya narasras wan nusnge wain sis Yawi at bale: at ngay turuk mawatan tansu, ay famuba mamam fag ngay faguyudan, ay tagbia fag fagfegusan at nafangayan te, Dagat. Ay kanya fagayu nabuba sas talun Babilunya kafag ngay tansu. 14Kanya fagayu nabul yangay ngay awali, ay tagbia fag ngay saruk, ay famagud salung at fagigangan, ay ngay tikung, ay tiba yak fagagbilugun mawatan tansu, ngay tagfon fanggalangun at fagagbilugun. 15Nebusaradan nabuba ngay famanus famaebebanglu, ay ngay taya fagsuadan famaramsig fag taguk, at mawatan siginan at yud e suglat fag gintu ay sanbung salapi. 16Wa kafabudbungguan ya at kabyatan fagayu tansu tagsiginan kafag duak turuk ay fagfegusan at nafangayan te, Dagat, ay famuba mamam fag ngay faguyudan, fun Sulumun at nafawat laman sas Yawi at bale. 17Galay sik turuk at kabatan labi waluk siu. Galay si sik tungud turuk e kata sik alfuyu, at kabatan tuluk siu, ay mafaligungan ngay salambitan ay takata sik ngay pumigranata at rawvg.
18Ay Nebusaradan nataban yangay Seraya fag fun tagfon fanggalangun, ay Sefanyas at faduak fun tagfon fanggalangun ay anggan fagtulu tagalaga sis Yawi at sakbawan bale. 19Ay nataban yangay sanya ginan fag furuan, fun tagfawayan, fun at fagsuguan fag lima, ay ngay tagfawayan at fun tagtaban ay tagfananad ngay taw laman sik ngay tagfawayan, ay unumk safuluk taw tagbanwan sanya. 20Nebusaradan nataban kanya fagayu sas talun Babilunya at fun sis furuan Ribla, 21sis Amat fag talun. Ay sanya wan nu gfabul anya fagayu. Ay ngay taw Uda natabanan sa tangayayu fag talun.
Gedalya nu Gfunan Talun Uda
Ere 40:7-9, 41:1-3
22Nabukudunusur, Babilunya at fun, nafili Gedalya, Akikam at baguama Safan at fufu, laman sik fun sirut sat kinsawad fag ngay taw sis Uda. 23Uda at ngay fun tagfawayan ay at ngay tagfawayan nu nadungug te, Gedalya ansik fun sirut, kafag ngay fun tagfawayan nalao sa anya sas Mispa. Kafag ngay fun tagfawayan Ismael, Netanya at baguama, Ukanan, Kareak at baguama, Seraya, Tankumet at baguama fag taw Netufa, ay Aasanya fag taw Maaka, gadgaloan at ngay tagfawayan. 24Ay Gedalya gfatuyanan sa kafag ngay fun tagfawayan ay sat ngay tagfawayan at daga salubangan te, “Lag am kalimu talun Babilunya at ngay tagfangguna. Nu bunway banwani yap ste, ay fakamuluni sas Babilunya at fun ay wa ban e kadasug at mauri sa ayu.”
25Dewa katanya, sis fafituk magdanun ginanya fag banwa, Ismael, Netanya at baguama, Elisama at fufu tagsiginans fun at kalongan, nalao sas Mispa, gadgaloan safuluk taw. Kanya fagayu nafabul Gedalya ay at ngay fadgaloan fag ngay taw Uda ay fag ngay taw Babilunya. 26Sanya ginan, fagayu taw takadungug anggan at yud kadungug, ay fun tagfawayan nalagyu sas talun Igiptu aroro maksvn nu kalimu taw Babilunya.
Nafalfas Yuyakin
Ere 52:31-34
27Ay gina sis fatuluk safulu e fituk banwa, Yuyakin, Uda at fun, nu maubungan, Ebil-Merudak ansik fun sis Babilunya. Ay kanya nafalfas Yuyakin sis faduak safulu e fituk menit sis falabi duak magdanun ginanya fag banwa. 28Kanya malukme sas Yuyakin ay nafauseganan anya gtungud yay sa tibak fun at natabanan sas Babilunya. 29Yuyakin wa gsulun ya at lanbung kata at maubungan fag taw at lanbung, ay gfangon tua gasfuan at fun sat fagfangonan. 30Ay kayu menit ay kaduge kanya gleleg, fun gfon sa anya at ngay fagayudanun.
Currently Selected:
2 Fun 25: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
