2 Fun 20
20
Esekyas anke Fakasaitun
2Kr 32:24-26; Isa 38:1-8, 21, 22
1Ginanya, Esekyas anke fakasaitun ay arvs anbul wan. Ay Dius at taglong Isayas, Amus at baguama, nananlag anya ay nalong te, “Yawi nalong wa te, ‘Fadantei yap am ngay kalongan aroro wa kafia ya am fakasaitun ay umbul wo.’ ”
2Ay Esekyas nu nadungug katanya, kanya nasalubang sas dingding ay gdarangin sas Yawi te, 3“Yawi, amatangani tua ku ngay nafakamulun at matuyan ay nasaful wo te, fagdaul ku amatanganan nafaning ktua emu, ay fagdaul ku nafakamulun masine tua sa emu.” Ay kanya gwayway maksvn.
4Ay Isayas gina sis Yawi at bale at fagaweanan, Yawi nalong anya te, 5“Afolii sas Esekyas, ku ngay taw at fun, ay longi anya te, ‘Katatuy am mangaguyang Dabid at Dius Yawi at longan: Nadungug au am darangin ay nalag au am liasun. Nu katanya, namafia au emu. Si bans fatuluk menit, makabangkad tuo, ay malao sas Yawi at bale. 6Ay namamut kyay am leleg labi lima yak banwa. Namalangfe au emu gasfuan am furuan siginans Asirya at fun, ay nanggubuk au tuy fag furuan, laman sa ku fagmasineun ay aroro sa ku fagsuguan Dabid.’ ”
7Ay Isayas nalong sas fun Esekyas at ngay fagsuguan te, “Dafuti sik nafalumak fag rawvg igus sat yapvs laman umfia wan.” Kanya fagayu nafakamulun takatanya ay kanya anfia.
8Gina fun Esekyas yud anfia nainto sas Isayas te, “Tain ro sik fagsafulan famatuyan te, umfia au ay malao kyay ban sas Yawi at bale sis fatuluk menit siginan katsi?”
9Ay Isayas nabalus te, “Katatuy Yawi at famatoglag te, namafasludan fagayu at fatuyanan. Fafidfiliani tuy fagdua: menit at aninu nansugudan safuluk talangtang sis fanginsaful buknga, ay o mannga kafoli safuluk talangtang?”
10Esekyas nabalus te, “Amasakit yap nansugudan safuluk talangtang menit at aninu, nu katanya, fafolii way aninu safuluk talangtang!”
11Nu katanya, Isayas nadarangin sas Yawi, ay Yawi nafafoli safuluk talangtang menit at aninu at fagfafoliun tagsis Akas at nawat fag fanginsaful alinan menit.
Ngay Takamoyung siginans Babilunya
12Ginanya, Merudak-Baladan, Baladan at baguama, Babilunya at fun, nadungug te, Esekyas at fakasaitun anfia wan. Ay nu katanya kanya nasugu ngay fagsuguan ay nafabuba sas Esekyas sik ngay rirukan ay sik famonun. 13Ay Esekyas naylat kanya fag ngay fagsuguan at nadasugan, ay nafalag sa anya at fagfungsuan nusnge wain fag ramraman sanbung salapi ay gintu, ay famaenamnam fakonun, ay at mafilian fag langis, ay nusnge wain fag famawayan, ay tiba yak ramraman. Kanya nafalag wan fagayu nusnge wain sit bale daul ay sit fagfagtainanan.
14Ay Isayas fag taglong nalao sas fun Esekyas ay nainto te, “Daginan kanya fag ngay taw ay nataw at algan?”
Ay Esekyas nabalus te, “Kanya andasug siginans tangayayu fag talun, siginans Babilunya.”
15Ay Isayas gdog yay nainto te, “Nataw at nalag sim bale?”
Ay Esekyas nabalus te, “Kanya nalag wan fagayu nusnge wain si ku bale daul. Kwe nasuksuk fagayu ku fagmaramramanun; nafalag kwan.”
16Ay Isayas nalong sas Esekyas te, “Dungugani Yawi at longan: 17Umdasug ban sik buknga e namuba wan sas Babilunya fagayu am ramraman sim bale, gasfuan am ngay mangaguyang at nafaful fag ngay ramraman dasug katsi. Yawi glong te, wa ban e sawad. 18Ay at fadogan ban am kasugfunanan gatabanan ay nangasik fagsuguan sas Babilunya at fun at bale.”
19Ay Esekyas namatangan te, “Kaduge kban gleleg, e fagmanabayanun tua ay wa ban e mdasug at mauri.” Ay kanya nalong sas Isayas te, “Masine am nalong sa angku fag foyungan tagsiginans Yawi.”
Fakatabuan Esekyas nu Gfunan
2Kr 32:32,33
20Ay tiba ya at kinfasludan kaduge Esekyas gfunan ay fagayu at nafakamulun, anggan yangay at nawat fag fagfungsuan mamam ay at faglimusanan sas furuan anriruk sis fafil fagrirukan sabaliwas Uda at ngay fun.
21Esekyas nu nbul wan at baguama Manase at natubus anya laman sik fun.
Currently Selected:
2 Fun 20: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
