2 Kurintu. 3

Ngay Tagfakamulun sat Bagu fag Nasadian

1O gamatangan am te, kamatungudun ami sa em sadili? O em fakaylatun gbuba ami tibak taw at rirukan laman tagfatuyan te, at matuyan ami fag takamoyung, kata tibak taw at fakamulun? Duan. 2Am wan em tagfatuyan fag rirukan at marirukan si em amatanganan. Aroro siginan ay ugali, fagayu taw sumaful te, Dius tuami at nasugu. 3Mayamag te, sik rirukan am tagsiginan tam Fun Isus at nafabuba sa emi. Ay at fanriruk kafag rirukan bunwa fanriruk, nu bunway tagleleg tua fag Dius at Falad. Ay nu griruk wa sas dalifi, sa tuas taw at amatanganan.

4Mafafalong ami katanya aroro gafanud tuami sas Dius siginan tam Fun Isus. 5Nu em sadili way, wami malong te, e fagmakatuun ami. Em fagmakatuun siginan tuas Dius. 6Kanya wan at nafon emi fagmakatuun laman tagfakamulun sat bagu fag nasadian, bundi takata at kinriruk sis Muisis at Faugali, nu bunway siginan tua at Masine fag Falad. Aroro kafag faugali at fungfung fakabulun way, ay at Masine fag Falad at fon leleg tua.

7Muisis at Faugali at kinriruk sas dalifi, dewa guli way sas fakabulun, e fagmabalyananun yangay. Ay gina Dius gfon sas Muisis kafag Faugali, ngay taw Israel wa madama Muisis at mata at kaksvnan nu masulo, ay kafag masulo nalyam way. 8Nu katanya, gtungud yay at Masine fag Falad at foyungan nu e fagmasineun. 9Taguna fag nasadian tagfosuk way sas fakabulun, nu e fagmasineun tua, kaugat wan at bagu fag nasadian nu e fagmasineun, at natap antam te, kata nu yud tam e asalanan. 10Nu katanya, malong tam te, at dan fag fagmasineun nalyam wan, aroro tam Fun Isus gtungud yay kafag fagmasineun. 11Kafag nasadian at kinkalyam wan nu e fagmasineun tua, kaugat wan at yud kalyam fag nasadian nu e fagmasineun.

12Ay aroro e fagsegun tuami takatanya, mabitsug tua em amatanganan nu gfakamulun ami. 13Ay dimi kata Muisis, at natabun at mata laman ngay taw Israel wa nalag kafag masulo at nalyam way vtv. 14Nu katanya, ngay taw Israel kamaogatun yay gugat, aroro dasug katsi kata yay gugat nu e fantabun sit ngay amatanganan kaduge gtap Muisis at Faugali. Ay dewa katanya sik taw nu nsadi tua sa tam Fun Isus, umkalyam wan tagtabun at amatanganan. 15Ay dasug katsi e gtabun yay at amatanganan kaduge gtap Muisis at rirukan. 16Ay dewa katanya, kanya ban fag ngay taw nu nfoli tua sa tam Fun, umkalyam wan kafag fantabun. 17Ay tam Fun, kanya wan at Masine fag Falad. Ay nusnga nday tam Fun at Masine fag Falad, sanya yangay fagmalangfeun. 18Ay tam Fun, kanya wan at Masine fag Falad, kanya gfasine antam laman kaksvn tua nu gfaning tam anya.

Currently Selected:

2 Kurintu. 3: OCCT

Highlight

Copy