2 Krunika 5
5
1Sulumun gina ntabu gfawat Yawi at bale, kanya nafasakbo sas fagfungsuan tagsis Dius at bale ngay fagagbilugun kata sanbung salapi ay gintu ay tiba ya. Kanya at mama Dabid at nafasaman laman sas Yawi.
Nabuba Fagsuadan Nasadian sas Yawi at Bale
1Fn 8:1-9
2Sulumun nafaful sas Erusalem taw Israel at ngay fagtainan, tagfangguna ngay kasugfunanan, laman namul Fagsuadan Yawi at Nasadian siginans Dabid at furuan, at masuad te, Siun. 3Kanya fagayu nalao sas fun Sulumun gina e fagmafulun#5:3 fagmafulun: gina Kawat ngay Fayag. sis fafituk magdanun.
4-5Gina ngay taw Israel at ngay fagtainan andasug, ngay tagfon fanggalangun ay ngay taw Lebi nanamul Fagsuadan Nasadian ay anggan Fagnansegan fag Bale ramit, ay fagayu tagsanya fag ngay fagagbilugun at yud e malong. 6Ay fun Sulumun ay fagayu taw Israel nanamon at ngay fanggalangun sis salubangan Fagsuadan Nasadian, ngayuk tupa ay baka, at kayuan wa katap ya.
7Sanya ginan, ngay tagfon fanggalangun nafasakbo Fagsuadan Nasadian sas Yawi at bale sat Mafasamanan Fia fag Suluk, si sangay tagleleg fag ngay awatan at ngay daga fakfak. 8Kafag ngay awatan at ngay fakfak marafadan, ay gtabun Fagsuadan Nasadian ay anggan at ngay famuba. 9Kanya fag ngay famuba ngaba, at fungfung sas day Fagsuadan Nasadian kalag siginan at Mafasamanan fag Suluk, dewa katanya, kanya wa kalag sis day bale. Ay dasug katsi, sanya yay gugat. 10Fagsuadan Nasadian we bilug sangay kafag duak dalifi Muisis at nasuad gina sis Buksul Kureb. Sanya Yawi nu gfon at nasadian sa sangay taw Israel gina kanya fagayu nalao siginans talun Igiptu.
11Sanya ginan, ngay tagfon fanggalangun gduksun wan siginan at Mafasamanan fag Suluk. Fagayu tagsanya fag ngay tagfon fanggalangun gfasine at sadili laman di e malong nu gfakamulun. 12Kayu tuy ngay taw Lebi tagfawang ngay fagfawangun: Asaf, Eman, Edutun ay at ngay sisian ay fagayu at kalongan malindug sabaliwas fakamenitan fag fagirugan. Kanya fagayu galanbungan mawatan siginan at masine fag ramit, ay gfawang fagfadkalinganun, ay fagfawangun ke ngay bakyang. Sadik sandan duak safuluk tagfon fanggalangun galo anya fagayu gfawang budyung. 13Ngay tagfawang budyung ay tagalubad magamut nu gfauseganan Yawi gina e gfawang budyung ay fagfadkalinganun, ay tiba yak fagfawangun. Katatuy kanya fagayu at alubad:
“Yawi matuyan, ay nu kesug di e fakatabuan.”
Sanya ginan, linyabu nasifig Yawi at bale.
14Nu katanya, ngay tagfon fanggalangun wa mafataglayun ya at fakamulun aroro maksvn nu glinyabu, ay Yawi at kamasuloan ankapnu sat bale.
Currently Selected:
2 Krunika 5: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
