2 Krunika 33
33
Manase nu Gfunan Talun Uda
2Fn 21:1-18
1Manase at banwa labi dua gina gfasigad gfunan. Ay kanya gbanwan sis Erusalem ay nu gfunan limak safulu e limak banwa. 2Ay kanya mauri way at nafakamulun sis Yawi at daga salubangan. Kanya nafaning way Yawi at naiyan fag ngay taw at ngay fagmauriun. Yawi nafababawan anya fagayu sa sangay taw Israel. 3Kanya nafadog yay nafawat ngay bale fagnansegan sa tangabat fag ngay buknga at mama Esekyas at naiklas. Kanya nawat yangay ngay fagirugan laman sas Baal, ay nawat turuk fagtoglagan Asera fag fagsegan mangena. Ay kanya naseg fagayu nusnge wain tagsis banwa. 4Ay nawat yangay ngay fagirugan fanggalangun sis Yawi at bale, ay Yawi nalong sabaliwa at bale te, “Sis Erusalem e gfauseganan tua ban angku kabavn.” 5Ay kanya nafatungkud kafag ngay fagirugan fanggalangun sis Yawi at bale at duak fagaweanan, laman kanya nanseg fagayu tagsis banwa. 6Ay sis datag Ben-Inum, kanya nairug at ngay sisian laman at fanggalangun. Ay kanya nafakamulun kata ngay taginsaful ay tagfangufit, ay nainto sa sangay tagfakamatoan sat ngay kinbul at falad. At ngay fakamulun maksvn nu mauri, ay gfadotama Yawi.
7Ay kanya nafasakbo sas Dius at bale at nafawat fag fagsegan, nu inda Dius at nalong sas Dabid ay sat baguama Sulumun te, “Ste si ku bale ay sis Erusalem, ku nafili laman sas fagayu taw Israel at ngay kasugfunanan at fagnamauseganan angku kabavn. 8Ngay taw Israel ban nu gfaning tua fagayu ku ngay suguan ay ku faugali, Muisis at nalong sa anya fagayu, kwa ban gdog ya gaiyan anya fagayu ste ginan fag talun ku nafon sat ngay mangaguyang.” 9Dewa katanya, Manase nafaylat ngay taw Uda ay Erusalem, laman gfakamulun at mauri, ay kanya fagayu at nafakamulun mauri gtungud yap tua tibak gaban taw at nafakamulun mauri. Yawi nafamin kafag ngay taw si sangay taw Israel at daga salubangan.
10Yawi dewa nafararang sas Manase ay sat ngay taw, kanya fagayu wa nafandungug anya. 11Nu katanya, Yawi naylat Asirya at ngay tagfawayan nu gfawayan anya fagayu. Ay kanya fag ngay tagfawayan nataban Manase ay nafae sanggit at dungus ay nasiuk anya salambitan ay nataban sas Babilunya. 12Ay kanya gina gidapan, nafamababaun ay nafainfanyuan sat Dius Yawi, at ngay mangaguyang yangay at Dius. 13Ay kanya gina nadarangin Yawi nadungug anya. Ay Yawi anfanyu anya gina kanya nafainfanyuan. Ay nafafoli anya sas Erusalem sat fagfagtainanan. Ay Manase natuyan te, Yawi wan Dius.
14Siginan ginanya, Manase nafasine Dabid at furuan daul at famalanib fag alad, siginans bulbug Gikun at fakayabian fag datag ay sitsigons sakbawan at nafangayan te, Albon, ay nafabaraud sa sangay buksul tagsis Ufel. 15Ay kanya nafaduksun siginans Yawi at bale at nafawat fag ngay fagsegan ay anggan tibak talun at ngay fagsegan, ay nabul yangay fagayu fagirugan at nafawat sis Yawi at bale fag buksul ay sis Erusalem, ay naukas sas day furuan. 16Ay sanya ginan, kanya nafasine fagirugan fanggalangun laman sas Yawi, ay nafon sanya at ngay fanggalangun laman sas fagmanabayanun, ay famauseganan fag ngay fanggalangun. Ay kanya nalong sa sangay taw Uda te, “Faningi Yawi, ngay taw Israel at Dius.”
17Dewa katanya, ngay taw nanangirug yay gugat at ngay fanggalangun sa sangay bale fagnansegan sa tangabat fag ngay buknga. Dewa katanya, at fagfonan at ngay fanggalangun sa tuas Yawi. 18Ay tiba ya at kinfasludan kaduge Manase gfunan, ay at darangin sas Dius, ay ngay taglong at longan sa anya sas Yawi, Israel at Dius at ngayan, anriruk sis fafil fagrirukan sabaliwas Uda at ngay fun. 19Ay marirukan si sangay taglong at fagrirukan, Manase at darangin, ay Yawi at famalus anya, ay fagayu at asalanan ay nu kamabo Yawi. Ay marirukan yangay sanya nu inda nu kawat ngay fagnansegan, ngay turuk fagtoglagan Asera fag fagsegan, ay tiba yak fagsegan, gina kanya yud nafamababaun sas Dius. 20Ay Manase nu nbul wan nanamoli anya sit bale daul. Ay at baguama Amun at natubus anya laman sik fun.
Amun nu Gfunan Talun Uda
2Fn 21:19-26
21Amun at banwa duak safulu e dua gina gfasigad gfunan. Ay kanya nabanwan sis Erusalem, ay nu gfunan duak banwa. 22Ay kanya mauri way at nafakamulun sis Yawi at daga salubangan, kata at mama Manase at nafakamulun. Amun naseg Manase at nawat fag ngay fagsegan ay nafon anya ngay fanggalangun. 23Ay kanya wa nafaning at mama at nafamababaun sas Yawi. Sarokta kanya nafamut yay at asalanan.
24Ay Amun at ngay fagsuguan anke algan mauri sa anya, ay kanya fagayu nafabul anya sit bale. 25Dewa katanya, ngay taw Uda nafabul fagayu at nafabul Amun. Ay kanya fagayu nafili at baguama Usyas at fantubus anya laman sik fun.
Currently Selected:
2 Krunika 33: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
