2 Krunika 28
28
Akas nu Gfunan Talun Uda
2Fn 16:1-4
1Akas gina gfasigad gfunan, at banwa duak safulu. Ay kanya gbanwan sis Erusalem, ay nu gfunan labi unumk banwa. Ay kanya nafakamulun at mauri sis Yawi at daga salubangan, ay wa nafaning at mangaguyang Dabid at nafakamulun. 2Kanya nafaning way Israel at ngay fun, ay nafawat ngay fagsegan famamatang ngay Baal. 3Ay kanya girug gugat at ngay famaebebanglu fag lune sis datag Ben-Inum, ay girug yangay at ngay baguama laman at fanggalangun. Kanya nafaning tibak gaban taw at maksvn nu mauri, Yawi at naiyan siginan sangay taw Israel. 4Kanya gfon gugat at ngay fanggalangun, ay girug gugat at ngay famaebebanglu fag lune sa sangay fagnansegan tagsi tangabat fag ngay buknga, si sangay tungud buksul ay si sangay fun kayu at marabung at lanbung.
5Nu katanya, at Dius Yawi nafon anya sas fun Aram. Ay ngay taw Aram nababo anya, ay ngayu at ngay taw at natabanan sas furuan Damasku. Ay nafon yangay anya sas Israel at fun ay nafabul tangayu at ngay taw. 6Sik menit way, Peka, Israel at fun, nafabul sadik sandan duak safuluk libuk tagfawayan sis talun Uda, aroro ngay taw Uda natalyuyan Yawi, at mangaguyang at Dius. 7Ay Sikri, sik tagfawayan at maseganama tagsiginans Israel,#28:7 Israel: sas Ebreu, Efraim. nafabul Maaseya, fun Akas at baguama, ay Asrikam fag tagulit fun at bale, ay Elkana, tagsit daga vtv fag fun. 8Ay ngay taw Israel nataban at kalongan fag ngay taw Uda, duak sandank libuk mangena ay ngay sisian. Ay kanya fagayu nabul yangay ngay taw Uda at ngay fagagbilugun ay nabuba sas Samarya.
9Ay kafag ngay tagfawayan nu ndasug wan sas Samarya, Uded, Yawi at taglong, nalong sa anya fagayu te, “Yawi kauri ngay taw Uda, nu katanya kanya nafon sa ayu kanya fag ngay taw. Dewa kanya, maksvn wan ay nafakamulun sa anya fagayu, wam anfanyu ya gfabul, ay sit fagbanwanan sis banwa Yawi nasaful takatanya ay nafakamulun. 10Ay katsi kaylat am nanfagsuguan ngay mangama ay ngay mangena tagsiginans Erusalem ay tagsiginan tibak furuan tagsis talun Uda. Ay o nunda anke asalanan yangay am sa ay Dius Yawi? 11Dungugani angku! Yawi maksvn nu kadotama ayu. Nu katanya, faulii wan ay ngay kalongan ay nataban.”
12Ay katanya yangay tibak tagfangguna at ngay longan sa sangay tagfawayan tagsiginans fagawayanan. Kafag ngay tagfangguna: Asarya, Eukanan at baguama, ay Berekya, Mesilemut at baguama, ay Ekiskya, Salum at baguama, ay Amasa, Kadlay at baguama. 13Ay kanya fag ngay tagfangguna nalong sa kafag ngay tagfawayan te, “Lag am gtaban stae ay ngay nagamat aroro Yawi gfaurianan antam. O namamut yayam tam asalanan? Ngayu wan tam asalanan, ay Yawi maksvn wan nu kauri Israel.”
14Nu katanya, ngay tagfawayan nafalfas wan at ngay nataban ay nafafoli yay at ngay fagagbilugun, si sangay tagfangguna ay ngay taw at daga salubangan. 15Sanya ginan, kafag ufatk tagfangguna ankakbang sa kafag ngay natabanan, ay nafalanbungan at ngay malulasan siginan sangay tagfawayan at nabul fag ngay lanbung. Ay kanya fagayu nafon sa kafag ngay natabanan: ngay lanbung, ngay lapak, ngay fakonun ay mamam, ay ngay famafia. Ay kanya fagayu nafasakay sat ngay asnu fagayu at momuy, ay nafauli kanya fag ngay natabanan sat ngay mesa kalongan sas furuan Eriku.#28:15 furuan Eriku: sas Ebreu, furuan at ke ngayuk fun kayu takata layag. Ay kanya fag ngay tagfawayan anfoli wan sas Samarya.
Akas Naet Gubuk sas Talun Asirya
2Fn 16:7-9
16Ay ginanya fun Akas naet gubuk sas Asirya at fun. 17Aroro ngay taw Edum nadog yay nanamawayan talun Uda ay nataban tibak taw tagbanwan sanya. 18Ay anggan ngay taw Filistia nanamawayan yangay sas talun Uda fag ngay furuan, tagsi sangay buksul, ay tagsis Negeb. Ay kanya fagayu nagbilug ngay furuan Bet-Semes, Ayalun, Gederut, Suku, Timna, ay furuan Gimsu, ay anggan fagayu furuan at munakbang sanya, ay kanya fagayu nabanwan sanya. 19Yawi nafaurianan talun Uda, aroro fun Akas nataban at fagfunanun fag ngay taw laman gfakamulun at mauri, ay kanya wa nafaning Yawi. 20Nu katanya, Tiglat-Pileser, Asirya at fun, abat ngate nagubuk fun Akas, nafae fagidapun way. 21Akas nanamul ngay fagagbilugun siginans Yawi at bale, ay siginan at sadili bale, ay siginan sangay tagfakamulun at ngay bale, ay nafon sas talun Asirya at fun. Dewa katanya, wa nke fanambagun sa anya takatanya.
22Ay dewa fun Akas gidapan, kanya gfataglayun yay nu kamabo Yawi. 23Ay kanya nafon at ngay fanggalangun sa sangay taw Damasku at nababo anya at ngay fagsegan. Aroro kanya gamatangan te, “Aram at ngay fun at ngay fagsegan ggubuk tua anya fagayu. Nu katanya, gfon kyangay ku ngay fanggalangun sa kafag ngay fagsegan laman ggubuk yangay angku.” Dewa katanya, kanya wan at nafaurianan anya ay ngay taw Israel.
24Akas nabul ngay fagagbilugun siginans Dius at bale, ay narufa. Ay kanya nadingding wan Yawi at ngay sakbawan bale, ay kanya nafawat ngay fagirugan sis Erusalem at ngay sagbatan dalan. 25Ay kanya nafawat yangay fag ngay fagnansegan sa tangabat fag ngay buknga sas fagayu furuan tagsis talun Uda, laman kanya fagayu manamon at ngay fanggalangun sat yud matuyan fag ngay fagsegan. Ay takatanya at nafakamulun maksvn nu gfadotama at ngay mangaguyang at Dius Yawi.
26Ay tiba ya at kinfasludan kaduge Akas gfunan ay fagayu at nafakamulun siginan nu gfasigad sitsigons fakatabuan, anriruk sis fafil fagrirukan sabaliwas Israel ay Uda at ngay fun. 27Ay Akas nu nbul wan, nanamoli anya sis furuan Erusalem, dewa katanya, wa nafasas fagfolian Israel at ngay fun. Ay at baguama Esekyas at natubus anya laman sik fun.
Currently Selected:
2 Krunika 28: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
