2 Krunika 26
26
Usya nu Gfunan Talun Uda
2Fn 14:21-22, 15:1-7
1Ay ngay taw Uda nafili Usya#26:1 Usya: at ngayan yangay te, Asarya. (2 Fun 15.) laman sik fun gina labi unumk banwa, laman fantubus at mama Amasya fag fun. 2Ay Usya nabul furuan daul Elat ay at mama nu nbul wan kanya gdog yay nafawat kanya fag furuan. 3Usya labi unumk banwa gina gfasigad gfunan. Ay kanya nabanwan sis Erusalem, ay nu gfunan limak safulu e duak banwa. At mina Ekulya sik taw Erusalem. 4Ay Usya matuyan tua at nafakamulun sis Yawi at daga salubangan, kata at mama Amasya at nafakamulun. 5Usya kakbang tua gugat sas Dius kaduge Sakaryas gleleg, aroro kanya wan at nafoyung anya laman gfaning Dius. Ay kaduge kanya gfaning Yawi, e fagmanabayanun tua gugat.
6Ay Usya nanamawayan ngay taw Filistia, ay kanya naiklas furuan Gat, Abne, ay Asdud at ngay alad gang. Ay kanya nafawat sik ngay furuan munakbang sis furuan Asdud, ay sa tiba ya ngay taw Filistia at ngay furuan. 7Ay Dius nagubuk anya gina gfawayan ngay taw Filistia, ay ngay taw Arabya, ay ngay taw Meun tagbanwan sis Gur-Baal. 8Ay ngay taw Amun gfon sa anya at ngay famayad, ay kanya ansik takadungug yangay anggan sas talun Igiptu, aroro kanya anke fagmabalyananun.
9Usya nafaogat furuan Erusalem siginan nu gfawat ngay bale tangabat fagulitan sa sangay sakbawan tagsis fugungan alad gang, ay sis sakbawan tagsalubang sas datag, ay sis fakabaraudan alad. 10Ay anggan sis talun at yud e taw, kanya nafawat yangay ngay bale ngabat ay nafaali ngay bubun laman fagfungsuan mamam, aroro ngayu at ngay fagbaugun sa sangay buksul tagsibaliwas fakayabian, ay tagsi sangay datag. Kanya e ngay fagsuguan laman galaga at gamasun, at ngay tanum ubas, tagsi sangay buksul ay tagsisad datag, aroro kanya kaylat gfananumun.
11Ay Usya e ngay tagfawayan at mafananadan at mafalganan gugat sas awayan. Ay at nafili kanya fag ngay tagfawayan, Eyel fag tagriruk, ay Maaseya fag tagfangguna, ay Kananya, fun at tagfangguna at fagfanggunaun. 12Tagfangguna kanya fag ngay tagfawayan at maseganama, tagfangguna wan ngay talanan ay kanya fag ngay tagfawayan, duak libu unumk sandan. 13Ay kanya fag ngay tagfawayan, tuluk sandan fituk libu, limak sandan. Kanya fagayu mafananadan sas awayan, ay nafalganan gugat ggubuk at fun galay namawayan at ngay fawayan. 14Ay Usya nafafafud sa kafag ngay tagfawayan: ngay famalabag, ngay bangko, ngay famalabag fangalfuyu, ngay famalabag fag lanbung, ngay banyas, ay ngay aruranggut. 15Ay kanya nafawat yangay sa tagsaful kawat ngay mafanud fag fagagbilugun sa nu namawayan laman fangukas banyas ay ngay gang siginans Erusalem at ngay bale ngabat fagulitan ay siginan at alad gang at ngay fugungan. Ay Usya ansik takadungug nusnga nday aroro Yawi ggubuk tua anya, ay kanya ansik mabalyanan.
16Ay aroro kanya mabalyanan, kanya nafamatungudun. Nu katanya, kanya wan at nafalyam nu sik takadungug. Kanya nafamabo at Dius Yawi, siginan nu gsakbo sas Yawi at bale, ay nanangirug famaebebanglu sas fagirugan. 17Ay Asarya fag fun tagfon fanggalangun gadgaloan Yawi at ngay tagfon fanggalangun fag waluk safulu at maseganama, nananlag anya, 18ay nasalag. Kanya fagayu nalong sas fun Usya te, “Wo nangus nangirug famaebebanglu fag lune laman sas Yawi. Tagfakamulun takatanya Arun way lang at ngay kasugfunanan. Kanya way lang fagayu Yawi at nafili laman at nangirug famaebebanglu fag lune. Duksuni wan siginans Yawi at bale aroro nafamabo o anya. Am Dius ban wa gfon emu nusnga setaw, aroro sam nafakamulun takatanya.”
19Ay Usya andotama maksvn sa kafag ngay tagfon fanggalangun. Ay gina kanya gbibitan famanus famaebebanglu fag lune sis day fagirugan fanggalangun, sis Yawi at bale, kanya anke bangbang sit dangasan. 20Sanya ginan, Asarya ay at fadgaloan fag ngay taglong nu nalag te, Usya anke bangbang sit dangasan, kanya fagayu masakit nafaduksun anya. Ay kanya wa nafanlonganan ya aroro nasaful te, Yawi gfaurianan anya.
21Ay Usya e maksvn fag fakasaitun sit balat sitsigon fag menit nu kabul. Kanya gbanwan gsadilian si sik bale ay wa masine nansakbo sas Yawi at bale. Ay at baguama Utam tagfangguna fun at bale, ay sa sangay taw Uda. 22Ay tiba ya at kinfasludan kaduge Usya gfunan siginan nu gfasigad sitsigons fakatabuan, Isayas fag taglong Amus at baguama, nariruk. 23Ay Usya nu nbul wan, nanamoli anya munakbang sit mangaguyang at fagfolian, si sangay fun at fagagbilugun fag gamasun. Wa nafagamut anya sat ngay mangaguyang aroro kanya e bangbang. Ay at baguama Utam at natubus anya laman sik fun.
Currently Selected:
2 Krunika 26: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
