2 Krunika 22
22
Aasya nu Gfunan Talun Uda
2Fn 8:25-29, 9:21-28
1Ay ngay taw Erusalem nafili Aasya, Euram at ngenge laman at fun, aroro ngay taw Arabya gina nanamawayan sas Uda nafabul wan Euram tiba at baguama. Nu katanya, Aasya at nafunan talun Uda. 2Aasya nu gfasigad gfunan, at banwa duak safulu e dua. Ay kanya gbanwan sis Erusalem ay nu gfunan sadik banwa. At mina Atalya ay at fufuama Umri.
3Ay Aasya nafaning Akab fag talanan at ugali, aroro at mina nafoyung anya laman gfakamulun at mauri. 4Ay kanya nafakamulun at mauri sis Yawi at daga salubangan, kata Akab fag talanan at nafakamulun, aroro gina at mama anbul, at tagfangatulun Akab at ngay kalongan. 5Nu katanya, kanya nafaning kanya fag talanan at fangatulun anya, ay nanangalo Uram, Akab at baguama, talun Israel at fun, laman namawayan Kasael, talun Aram at fun. Ay kanya fagayu nawayan sis Ramut-Gilyad ay Uram natayukan. 6Nu katanya, kanya noli yay sas furuan Esreel laman namafia at natayukan, ay kaduge sanya, Aasya, Uda at fun gsibo anya.
7Aasya nu gsibo Uram, kanya wan Dius at balyawvtan laman gfabul Aasya. Gina Aasya sis Esreel, kanya nanangalo Euram laman gfawayan Yeu, Nimsi at baguama. Yeu wan Yawi at nafili laman namabul Akab at kalongan.
8Ay gina Yeu gfabul Akab at kalongan, kanya nalag Uda at ngay tagfangguna ay Aasya at ngay kalongan at ngay baguama at nanangalo Aasya. Ay kanya nafabul anya fagayu. 9Sanya ginan, Yeu nasugu sat ngay tagfawayan laman nanrvbvy Aasya. Ay kanya fagayu nalag Aasya sis Samarya fag furuan, ay nataban anya sas Yeu ay nafabul. Ay sanya ginan nanamoli at bilug, aroro nalong te, “At fufuama Eusafat nadarangin sas Yawi sas fagdaul at amatanganan.” Ay Aasya we kalongan ya at makatu gfunan.
Atalya ay Uas
2Fn 11:1-16
10Atalya nu nasaful te, at baguama Aasya anbul wan, kanya anke algan namabul Uda at fun at ngay kalongan fagayu. 11Dewa katanya, Euseba nafalangfe Uas, Aasya at baguama, gina e ganamabulun kafag duksayan. Euseba, fun Euram at baguina ay Aasya at arian, ay Euyada fag tagfon fanggalangun at mangena. Kanya nafasuksuan Uas ay at fangkamato sa sik suluk sis Dius at bale, nu katanya, Atalya wa nakatu gfabul anya. 12Kaduge unumk banwa, Uas ay anggan at fangkamato gsuksuan sis Dius at bale gina Atalya gfangguna sanya fag talun.
Currently Selected:
2 Krunika 22: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
