2 Krunika 11
11
Semaya at Longan sas Reubuam
1Fn 12:21-24
1Reubuam nu ndasug sas Erusalem, kanya nafaful sadik sandan waluk safuluk libuk tagsaful fia fag tagfawayan siginans fagdaul Uda ay Benamin at kasugfunanan laman namawayan ngay taw Israel ay laman kanya gdog nanfunan kafag ngay taw. 2Ay Yawi nalong sat fagsuguan Semaya te, 3“Nanlong o sas fun Reubuam, Sulumun at baguama, ay sas fagayu taw Israel tagbanwan sis Uda, ay sis Benamin te, 4‘Yawi glong te, Lag am gfawayan ay ngay faduksay fag ngay taw Israel. Fagayu am, ulii wan, aroro au wan at nafafasludan fagayu.’ ” Ay kanya fagayu nafaning Yawi at longan ay wa nanamawayan Erubuam.
5Ay Reubuam anfamato yay sis Erusalem, ay nafaogat fia tagsis Uda fag ngay furuan: 6Betleem, Etam, Tekwa, 7Bet-Sur, Suku, Adulam, 8Gat, Maresa, Sif, 9Aduraim, Lakis, Aseka, 10Sura, Ayalun, ay Kebrun. Kafag ngay furuan at ke ngay dingding alad tagsis Uda ay sis Benamin. 11Kanya nafaogat at fagnansarigan ay nafae ngay fun tagfawayan. Ay kanya nafon sa kafag ngay fun tagfawayan ngay fakonun, langis ulibu, ay fanlangu. 12Ay kanya nafae famalabag ay nafae ngay bangko kanya fag ngay furuan, famamut at famalabag. Nu katanya, kanya gagbilug way tagfunan sis Uda ay sis Benamin fag ngay furuan.
13Ay ngay tagfon fanggalangun ay taw Lebi tagbanwan sa sangay afud talun Israel nanangasadi wan sas Reubuam. 14Kanya fagayu naubun wan at ngay bale ay at ngay daga, ay nasas Uda ay sas Erusalem, aroro Erubuam talamean naiyan kanya fagayu laman Yawi at ngay taglong. 15Ay Erubuam nafili at tagfon fanggalangun laman gfakamulun sa sangay bale fagnansegan sa tangabat fag ngay buknga, ay laman sat nafawat fag ngay fagsegan kambing ay baka. 16Ay ngay taw Israel tagbanwan sa sangay afud talun Israel, takaylat nangakbang sas Yawi ngay taw Israel at Dius, nanangalo ngay taw Lebi sas Erusalem, laman namon at ngay fanggalangun sas Yawi, sat ngay mangaguyang at Dius. 17Ay kanya fagayu nafaogat at fagmafunanun sis talun Uda, ay kaduge tuluk banwa kanya fagayu nagubuk Reubuam, Sulumun at baguama. Ay nafaning Yawi, kata gina Dabid ay Sulumun gfunan.
Reubuam fag Talanan
18Ay Reubuam andadwa sas Makalat, Erimut at baguina ay Dabid at fufu, ay sas Abyail, Elyab at baguina ay Ese at fufu. 19Reubuam ay Makalat, e tuluk baguama: Eus, Semarya, ay Saam. 20Ay Reubuam andadwa yangay sas Maaka, Absalum at baguina. Ay at ngay baguama: Abya, Atay, Sisa, ay Selumit. 21Reubuam nu kesug Maaka gtungud yap tua tiba at mangena. Ay nu fagayu wan at mangena, labi walu, ay at mangena fag ngay fagsuguan unumk safulu. Ay at ngay sisian, duak safulu e waluk mangama ay unumk safuluk mangena. 22Ay kanya nafili at baguama Abya sit mangena Maaka, laman tagfangguna at ngay sisian, aroro kanya kaylat nu kanya ban at nangungbus anya laman sik fun. 23Ay Reubuam nafae fanambagun fia masine tiba at ngay baguama, ay nafatigwanan sa anya fagayu at maaladan fag ngay furuan ayu daul, tagsis Uda ay sis Benamin. Ay kanya nafon sat ngay baguama at ngay fagayudanun ay ngayuk mangena laman at ngay mangena.
Currently Selected:
2 Krunika 11: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
