1 Kurintu 13
13
Fakesugun Tagtungud sas Fagayu
1Dewa au saful fagayu taw ay anggan ngay tagbarita at fangaringang, dewa katanya, nu dway e si angku fakesugun, kata kway at meglis fag tingting ay kata sik udlung at awang yud e masuad. 2Ay dewa ro au makatu gfasaful Dius at longan, ay dewa ro au saful gfayamag at masuksuk fag ngay longan, ay dewa ro au saful fagayu fagsafulun, ay dewa ro au mafafalin buksul siginan ku fagafanudun at kaksvnan, nu dway ngap si angku fakesugun, kwe tungkul. 3Dewa ro au nafon fagayu ku ramraman, ay dewa ro au nafon wan ku bilug laman nangirug, nu dway ngap si angku fakesugun, we masuad sa angku.
4At ke fakesugun fag taw mafangagwanta tua ay malukme, ay di gfangalabian ay di kamatungudun, 5ay di gugali at mauri, di kamasadiliun, di gfangadotama ay di gfangadotina, ay di gamatangan at mauri dewa at iba nafauri anya, 6ay wa guseganan nu nalag at mauri, dewa katanya guseganan tua nu nalag at matuyan, 7ay mafanyan tua gugat, ay gafanud tua gugat, ay mafangagwanta tua gugat.
8Katabu way ban nu kamoyung Dius at longan, ay nu garingang sat yud katogdungug fag ngay fangaringang, ay anggan fagsafulun. Dewa katanya, fakesugun di ban e fakatabuan. 9Katsi ya tam fia e fagsafulun, ay ya tam fia saful gfayamag Dius at longan. 10Ay nu nsak ban fagayu nusnga setaw, umkalyam waban fagayu at kurang tagsi antam. 11Ebi gina au sik sisian, nu garingang au, ay ku amatanganan, ay nu gtogdungug au, kata yay sik sisian. Ay katsi nu mafagtainan kwan naubun kwan sisian at ugali. 12Aroro katsi nu glag tam, malikbug yay, kata yay nu nadama tam sa sik salaming, ay nu ndasug ban sik menit fagayu nusnga setaw mayamag tua sa antam. Ay katsi tam fagsafulun ya kasakan, dewa katanya nu ndasug ban sik menit, Dius gfasaful ban sa antam fagayu nusnga setaw.
13Ay tuy fag tulu sanya tua gugat: fagafanudun, ay fagsegun ay fakesugun, dewa katanya, tagtungud, fakesugun tua.
Currently Selected:
1 Kurintu 13: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
