1 Krunika 5
5
Rubin at Kasugfunanan
1Rubin, Israel at ngay baguama at kaka, kanya nafataladan at sadi at mama at mangena. Nu katanya, at fagmakakaun anfon sat faduksay Use at ngay baguama. Ay aroro katanya, bunwa Rubin at kinriruk laman kafag kasugfunanan at kaka. 2Uda dewa amabalyanan yap tua at ngay faduksay ay dewa siginan at kasugfunanan tagfangguna at ngay gaban, at fagmakakaun nafon way sas Use. 3Kayu tuy Rubin, Israel at baguama at ngay baguama: Anuk, Palu, Kesrun ay Karmi.
4Uel at ngay gaban: Semaya, Gug, Simei, 5Mikas, Reaya, Baal, 6ay Beera. Beera tagfangguna Rubin at kasugfunanan gina Tiglat-Pileser, Asirya at fun nataban anya fagayu. 7Kayu tuy Bera at ngay kalongan kinriruk sat ngay kasugfunanan at fagrirukan kata at gaban, Eyel fag tagfangguna ay Sakaryas, 8Bela, Asas at baguama, ay Asas, Sema at baguama ay Uel at fufu. Kayu tuy Rubin at kasugfunanan tagbanwan siginans Aruer sitsigons Nebu ay Baal-Meun. 9Ay aroro ankayu at ngay fagbaugun gina sis Gilyad, kanya fagayu nu gbanwan andugdug sas fakamenitan baliwa munakbang sis talun at yud e taw sabaliwas Liskung Eufrates. 10Ay gina yay Saul at fun, kanya fagayu nanamawayan ngay taw Agri ay nababo. Ay kanya fagayu nagbilug ngay taw Agri at fagbanwanan fagdaul sis fakamenitan baliwa talun Gilyad.
Gad at Kasugfunanan
11Gad at kasugfunanan nabanwan sis Basan, munakbang sis Rubin at gaban at fagbanwanan ay sitsigons Saleka. 12Gad at kasugfunanan: Uel, kanya tagfangguna sis Basan, at fadogan Safam, Anay ay Safat. 13At ngay tagfangguna galay at gaban: Mikael, Mesulam, Syeba, Uray, Akan, Sia ay Eber. 14Kanya fagayu Abyail, Kuri at baguama at ngay gaban. Kuri, Arwa at baguama, Gilyad at fufu ay Mikael at fufu tud. Mikael, Esisay at baguama ay Adu at fufu ay Bus at fufu tud. 15Aki, Abdyel at baguama ay Guni at fufu, tagfangguna at talanan. 16Ay kanya fagayu nabanwan sis Gilyad sis Basan ay sa sangay furuan sit ligung ay sas fagdaul datag Sarun. 17Ay at gaban anriruk sit fagrirukan ngay gaban, gina Utam gfunan sis Uda ay gina Erubuam gfunan sis Israel.
18Ufatk safulu e ufatk libu, fituk sandan unumk safuluk tagfawayan siginans Rubin ay Gad ay Manase fag wabilug kasugfunanan. Kanya fagayu mafananadan laman sas awayan ay saful gagbilug ngay famalabag, ngay fiso ay ngay godun. 19Ay kanya fagayu nanamawayan ngay taw Agri, taw Etur, taw Nafis, ay taw Nudab. 20Ay gina gfawayan, kanya fagayu naet gubuk sas Dius, ay Dius nabalus tua at darangin aroro kanya fagayu e fagafanudun tua. Nu katanya, Dius nafababo anya fagayu sa sangay taw Agri ay sa tiba ya at ngay fawayan. 21Ay kanya fagayu nabul ngay taw Agar at ngay fagbaugun, limak safuluk libuk kamelyu, duak sandan limak safuluk libuk tupa ay duak libuk asnu. Ay kanya fagayu nataban yangay sadik sandank libuk taw, 22ay ngayu at nafabul aroro Dius nagubuk anya fagayu gina gfawayan. Ay kanya fagayu nabanwan sanya fag ngay furuan yakmay tibak talun nababo ay nataban anya fagayu.
Manase fag Wabilug Kasugfunanan
23Manase fag wabilug kasugfunanan ngayu tua. Ay kanya fagayu nabanwan sis talun siginans Basan sitsigons Baal-Ermun, ay Senir (at ngayan yangay te, Buksul Ermun.) 24Ay tagfangguna at ngay talanan: Efer, Isi, Elyel, Asriel, Eremyas, Udabya ay Adyel. Kanya fagayu at maseganama fag ngay tagfawayan ay sik takadungug fag ngay tagfangguna at ngay talanan. 25Dewa katanya, kanya fagayu wa namatuyan sat ngay mangaguyang at Dius, abat ngate, naseg way at ngay nafabul fag ngay taw at ngay fagsegan. 26Nu katanya, Israel at Dius naylat Pul (at ngayan yangay te, Tiglat-Pileser), Asirya at fun, nu namawayan kanya fagayu. Ay fun Pul nataban Rubin ay Gad, ay Manase fag wabilug kasugfunanan, ay nataban sas Kalak, sas Kabur, sas Ara ay sas day Liskung Gusan, ay dasug katsi kanya fagayu gbanwan sanya.
Currently Selected:
1 Krunika 5: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
