2 थिस्सलुनीकियन 3
3
प्राथना करँइ के निबेदन
1हे भाई-बहिनिव, हमरे पंचन के खातिर प्राथना करत रहा, कि प्रभू के बचन सगले हार हरबी फइलय, अउर सब मनई ओखर आदर-सम्मान कइके अपनामँइ, जइसन तोंहरे बीच माहीं भ रहा हय, 2अउर इहव प्राथना करा, कि हम पंचे खराब अउर दुस्ट मनइन से बचे रही, काहेकि अइसन मनई प्रभू के ऊपर बिसुआस करँइ बाले नहीं होंय। 3पय प्रभू बिसुआस के काबिल हें; ऊँ तोंहईं मजबूती से स्थिर करिहँय, अउर उआ दुस्ट से बचाइके सुरच्छित रखिहँय। 4अउर तूँ पंचे प्रभू के ऊपर बिसुआस करते हया, एसे हमहीं पंचन काहीं तोंहरे ऊपर पूर भरोसा हय, कि जउन-जउन हुकुम हम पंचे तोंहईं दिहेन रहा हय, उनहीं तूँ पंचे मनते हया, अउर मनतव रइहा। 5अउर परमातिमा के प्रेम अउर मसीह के धीरज कइती बढ़ँइ के खातिर, प्रभू तोंहार अँगुआई करँय।
काम करँइ के जबाबदारी
6हे भाई-बहिनिव, हम पंचे, तोंहईं अपने प्रभू यीसु मसीह के नाम से हुकुम देइत हएन; कि तूँ पंचे सगले जन अइसन भाई-बहिनिन से अलग रहा, जिनखर चाल-चलन निकहा नहिं आय, काहेकि जउन सिच्छा ऊँ पंचे हमसे पाइन रहा हय, ओखे मुताबिक नहीं चलँय। 7काहेकि तूँ पंचे त खुदय जनते हया, कि तोंहईं कउनमेर से हमरे कि नाईं चाल चलँइ चाही; काहेकि तोंहरे पंचन के बीच माहीं हमार चाल-चलन गलत नहीं रहा। 8अउर हम पंचे सेंत-मेंत माहीं कोहू के रोटी नहीं खायन, बलकिन दिन-रात बड़े मेहनत से कस्ट सहिके काम धंधा करत रहेन हय, जउने तोंहरे पंचन म से कोहू के ऊपर भार न परय। 9अइसा नहिं आय कि हमहीं पंचन काहीं तोंहसे खाँय-पिअँइ के हक्क नहिं आय, हक्क हय, तऊ हम पंचे एसे कठिन मेहनत करत रहेन हय, कि जउने तुहूँ पंचे इहइमेर करा। 10अउर हम पंचे जब तोंहरे इहाँ रहेन हय, तबहिनव इआ हुकुम तोंहईं देत रहेन हय, कि “अगर जे कोऊ काम न करँइ चाहय, त उआ खाँइव क न पाबय।” 11हमहीं पंचन काहीं इआ सुनँय क मिलत हय, कि कुछ जने तोंहरे बीच माहीं अनुचित चाल चलत हें; अउर खुद कुछू काम नहीं करँय, अउर जे करतव हें, उनहूँ के काम माहीं टाँग अड़ाबत हें। 12इआमेर के मनइन काहीं हम पंचे प्रभू यीसु मसीह के नाम से इआ हुकुम देइत, अउर समझाइत हएन, कि ऊँ पंचे चुपचाप काम धन्धा कइके अपनेन कमाई के रोटी खाबा करँय। 13अउर हे भाई-बहिनिव, तूँ पंचे भलाई करँइ माहीं हिम्मत न छोंड्या, हमेसा लगे रहा। 14अगर कोऊ हमरे इआ चिट्ठी के बात काहीं नहीं मानय, त ओखे ऊपर नजर रक्खा; अउर ओखर संगत न करा, जउने उआ लज्जित होय। 15तऊ ओही दुसमन न समझा, बलकिन भाई जानिके ओही चेतउनी द्या।
अन्तिम नबस्कार
16अउर प्रभू जउन सान्ति के दाता हें, खुदय तोंहईं हरेकमेर से सान्ति देंइ। प्रभू तोंहरे पंचन के साथ रहँय। 17हम पवलुस अपने हाँथे के लिखाबट से नबस्कार लिखित हएन; हमरे हरेक चिट्ठिन के इहय चिन्हारी आय; हम इहइमेर से लिखित हएन। 18हमरे पंचन के प्रभू यीसु मसीह के किरपा तोंहरे पंचन के ऊपर होत रहय।
Currently Selected:
2 थिस्सलुनीकियन 3: bag
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
