1 कुरिन्थियन 9
9
यीसु मसीह के खास चेला के अधिकार अउर जबाबदारी
1अउर हमहूँ दुसरे मनइन कि नाईं अजाद हएन, अउर हमहूँ यीसु मसीह के खास चेला आहेन, अउर हम यीसु काहीं जउन हमार प्रभू आहीं, देखे हएन, अउर खुसी के खबर सुनामँइ के द्वारा प्रभू यीसु मसीह के बिसुआस माहीं, हमहिन तोहईं पंचन काहीं लइ आएन हय। 2अउर चाह अगर हम दुसरे मनइन के खातिर, यीसु मसीह केर खास चेला नहिंव आहेन, तऊ तोंहरे पंचन के खातिर, हम यीसु मसीह के खास चेला आहेन; काहेकि प्रभू के खास चेला होंइ के बारे माहीं तूँ पंचे हमार सबूत आह्या।
3अउर जे कोऊ हमरे ऊपर अरोप लगाबत हें, त उनखे खातिर हमार जबाब इआ हय, कि 4का तोंहसे, हमहीं पंचन काहीं, खाँइ-पिअँइ के खातिर मदत लेंइ के अधिकार नहिं आय? 5अउर का हमार पंचन के इआ अधिकार नहिं आय, कि कउनव मसीही बहिनी के साथ आपन काज करी, अउर उनहीं अपने साथ माहीं लइके इहाँ-उहाँ जई, जइसन कि यीसु मसीह के दूसर खास चेला लोग, अउर प्रभू यीसु के भाई लोग, अउर #9:5 यूनानी भाँसा माहीं पतरस काहीं कैफा कहत हेंपतरस घलाय करत हें। 6अउर का केबल हमहीं अउर बरनबासय भर काहीं आपन जीबिका चलामँइ के खातिर, काम करँइ केर अधिकार हय? 7अउर कउन अइसन मनई हय, जउन अपनेन कमाई से खाइके सेना माहीं सिपाही के काम करत हय? अउर कउन अइसन किसान हय, जउन अंगूर के बगिया लगाइके ओखर फर नहीं खाय? अउर कउन अइसन मनई हय, जउन बोकरिन अउर गड़रन काहीं पाल-पोसिके उनखर दूध नहीं पिअय?
8अउर का हम ईं बातन काहीं केबल मनई के सोच-बिचार के मुताबिक कहित हएन, अउर का इहय बात मूसा के बिधान घलाय नहीं बताबय? 9काहेकि मूसा के बिधान माहीं इआ लिखा हय, कि “फसल के गहाई करत माहीं बरधा के मुसका न लगाया।” अउर का परमातिमा केबल बरधन भर के फिकिर करत हें? नहीं। 10अउर खास करके का इआ बात हमरे पंचन के खातिर न होय कहिन हीं? हाँ इआ बात हमरेन पंचन के खातिर आय कहिन हीं, काहेकि खेत जोतँय बाला, कउनव आसा रखिके जोतत हय, अउर फसल के गहाई करँइ बाला, कुछ अनाज पामँइ के आसा से गहाई करत हय। 11एसे जब हम पंचे, तोंहरे भलाई के खातिर आत्मिक बीज बोयन हँय, त अगर हम पंचे तोंहसे #9:11 खाँइ-पिअँइ बाली चीजन काहीं लेई संसारिक चीजन के फसल काटँय चाही, त का इआ कउनव अचरज के बात आय? 12अउर जब दुसरे सेबकन के, तोंहसे पंचन से संसारिक चीजन काहीं लेंइ के अधिकार हय, त का हमार पंचन के अउर जादा तोंहरे ऊपर अधिकार नहिं आय? हय। पय हम पंचे इआ अधिकार के उपयोग नहीं किहे आहेन; पय हम पंचे सगले दुख-मुसीबत काहीं सहित हएन, कि जउने हमरे द्वारा मसीह के खुसी के खबर माहीं कउनव बाधा न आबय। 13अउर का तूँ पंचे इआ नहीं जनते आह्या, कि जे कोऊ मन्दिर माहीं सेबा करत हें, त ऊँ पंचे मन्दिरय से आपन खाना पाबत हें; अउर जे कोऊ बेदी के सेबा करत हें, त उनखर हींसा बेदी माहीं चढ़ाई जाँय बाली चीजन माहीं होत हय? 14इआमेर से प्रभू इआ हुकुम दिहिन हीं, कि जे कोऊ खुसी के खबर के प्रचार करत हें, त उनखे खाँइ-पिअँइ के प्रबन्ध खुसी के खबर सुनँय बालेन काहीं करँइ क चाही।
15पय हम ईं अधिकारन म से एकठइँअव के उपयोग कबहूँ नहीं किहेन, अउर ईं बातन काहीं हम एसे न होय लिखेन हँय, कि तोंहसे पंचन से खाँइ-पिअँइ के खातिर हमहीं कुछू मिलय, अउर अगर हम कोहू से कउनव चीज लेइत हएन, त हमार मर जाब नीक हय। पय कोहू से कउनव चीजन काहीं लिहे बिना, खुसी के खबर के प्रचार करब हमरे खातिर बड़ाई के बात आय; अउर हम इआ नहीं चाही, कि कोऊ हमरे बड़ाई काहीं हमसे छड़ाय लेय। 16अउर अगर हम खुसी के खबर के प्रचार करित हएन, त एमाहीं हमरे बड़ाई के कउनव बात नहिं आय, काहेकि प्रभू एखर जबाबदारी हमहीं सँउपिन हीं, एसे हमार इआ करतब्य आय, कि हम खुसी के खबर के प्रचार करी, अउर अगर न करी, त हमरे जीबन के खातिर धिक्कार हय! 17काहेकि अगर हम अपने मरजी से इआ काम करित हएन, त इनाम पामँइ के हकदार हएन, पय अगर अपने मरजी से नहीं करी, तऊ खुसी के खबर के प्रचार करँइ के जबाबदारी हमहीं सउँपी गे ही। 18त पुनि हमार इनाम का आय? हमार इनाम इआ आय, कि खुसी के खबर सुनामँइ माहीं हम मसीह के प्रचार सेंत-मेंत माहीं करी, अउर खुसी के खबर सुनामँइ के कारन जउन कुछू पामँइ के हमार अधिकार हय, त ओखर पूर-पूर उपयोग न करी।
19जबकि हम स्वतंत्र हएन, एखे बादव हम खुद काहीं सगले मनइन के दास बनाय दिहेन हँय, कि जउने जादा से जादा मनइन काहीं प्रभू यीसु मसीह के लघे खींच लई। 20हम यहूदी लोगन के खातिर यहूदी लोगन कि नाईं बन गएन, कि जउने यहूदी लोगन काहीं प्रभू यीसु मसीह के लघे खींच लई, अउर मूसा के बिधान के अधीनता माहीं हम नहिं आहेन, तऊ जे कोऊ मूसा के बिधान के अधीनता माहीं रहिके, ओहिन के मुताबिक चलत हें, त उनखे खातिर हमहूँ मूसा के बिधान के अधीनता माहीं होइ गएन, कि जउने मूसा के बिधान के अधीनता माहीं चलँइ बालेन काहीं, प्रभू यीसु मसीह के लघे खींच लई। 21अउर गैरयहूदी लोगन काहीं जिनखे लघे मूसा के बिधान नहिं आय, उनहीं प्रभू यीसु के लघे लइ आमँइ केर खातिर हम उनहिन कि नाईं बन गएन, हम मूसा के बिधान के बिरोधी नहिं आहेन, बलकिन हम मसीह के सिच्छा के अधीनता माहीं हएन। 22अउर हम निबल मनइन के खातिर निबल बन गएन, कि जउने निबल मनइन काहीं प्रभू यीसु मसीह के लघे खींच लई, अउर हम हरेक मनइन के खातिर उनहिन कि नाईं बन गएन, कि जउने कउनव मेर से कइअक जनेन काहीं मुक्ती देबाय देई। 23अउर हम इआ सब कुछ खुसी के खबर काहीं फइलामँइ के खातिर करित हएन, कि जउने अउर दुसरे मनइन के साथ आसिरबाद पामँइ माहीं हिंसदार होइ जई।
मसीही जीबन के दउड़-धूप
24अउर का तूँ पंचे इआ नहीं जनते आह्या, कि दउड़ के प्रतियोगिता माहीं हरेक जन दउड़त हें, पय इनाम त एकय जन पाबत हय; त तुहूँ पंचे अइसन दउड़ा कि जउने जीत जा। 25अउर कुस्ती लड़ँइबाले हरेक पहिलमान, अपने देंह काहीं तइआर करँइ के खातिर, हरेकमेर के कसरत करत हें; अउर ऊँ पंचे त नास होंइ बाले मुकुट काहीं पामँइ के खातिर इआ सगली मेहनत करत हें, पय हम पंचे त उआ मुकुट काहीं पामँइ के खातिर मेहनत करित हएन, जउन कबहूँ नहीं नास होय। 26अउर इहइमेर हमहूँ उआ मनई कि नाईं दउड़ित हएन, जउने के आँगे लच्छ हय, पय हम हबा माहीं मुक्का नहीं मारी। 27पय हम अपने देंह के बुरी इच्छन से लड़िके, उनहीं अपने कब्जे माहीं एसे लइ अइत हएन, कि कहँव अइसन न होय, कि दुसरे मनइन के खातिर प्रचार करी, अउर हम खुद कउनव बुरा काम कइके निकम्मा ठहर जई।
Currently Selected:
1 कुरिन्थियन 9: bag
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.