རོམ་མི་ལེའུ་ 1
1
བཀྲ་ཤིས་བདེ་ལེགས་ཞུ་བའི་སྐོར།
1ཨ་ནི་ཡི་གུ་འདི་ ང་ཡེ་ཤུ་ཁིརཱིས་ཀྱི་ཕྱག་ཞུ་མི་ པའུལ་གྱིས་གཏངམ་ཨིན་ དཀོན་མཆོག་གིས་ང་ལུ་ མི་ག་ར་ལུ་གཏམ་བཟང་བཤད་ནིའི་དོན་ལུ་ བཙག་འཐུ་མཛད་གནང་སྟེ་ སྐུ་ཚབ་ཀྱི་འགན་ཁུར་གནང་ཡི། 2ཨ་ནི་གཏམ་བཟང་དེ་གི་སྐོར་ལས་ དཀོན་མཆོག་གིས་ཧེ་མ་ལས་རང་ཁས་བླངས་བཞེས་ཏེ་ ཁོ་རའི་ལུང་སྟོན་པ་ཚུ་ལས་རྒྱུད་དེ་ དམ་པའི་གསུང་རབ་ནང་ལུ་བྲིས་བཞག་ནུག 3ཨ་ནི་གཏམ་བཟང་དེ་ དཀོན་མཆོག་གི་སྲས་ཀྱི་སྐོར་ལས་ཨིན་ ཁོ་ཕྱི་ཁར་ མི་གི་རང་བཞིན་ལུ་བལྟ་བ་ཅིན་ ད་བིད་ཀྱི་རྒྱལ་རིགས་ལས་སྦེ་འཁྲུངས་ནུག 4དེ་ལས་ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་དམ་པའི་རང་བཞིན་ལུ་བལྟ་བ་ཅིན་#༡:༤། alt. through the Holy Spirit ཁོ་གཤགས་ས་ལས་སྐུ་གསོན་པོ་སྦེ་བཞེངས་པའི་ཐོག་ལས་ ཁོ་དཀོན་མཆོག་གི་སྲས་ཨིན་ཟེར་སྟོན་གནང་ནུག 5དེ་གིས་འབད་ ཁིརཱིས་སྙན་གྲགས་ཅན་སྦེ་འགྱུར་ནི་གི་དོན་ལུ་ མི་རིགས་ག་ར་གིས་ གཏམ་བཟང་འདི་ལུ་དད་པ་བསྐྱེད་དེ་ ཁོ་གི་བཀའ་ལུ་ཉན་བཅུག་ནིའི་དོན་ལུ་ དཀོན་མཆོག་གིས་ང་ལུ་ཐུགས་རྗེ་གཟིགས་ཏེ་ སྐུ་ཚབ་ཀྱི་འགན་ཁུར་གནང་ཡི། 6ཁྱེད་ཆ་ཁྱབ་ཡང་ ཁོང་ག་ར་གི་གྲལ་ལས་ ཡེ་ཤུ་ཁིརཱིས་ཀྱི་བཀའ་ལུ་ཉན་ནི་གི་དོན་ལུ་ ཁོ་གི་མེ་སྦེ་འབོ་འབོཔ་ཨིན། 7དཀོན་མཆོག་གིས་བྱམས་པ་མཛད་མི་ ཁོ་རའི་དམ་པའི་མི་སྦེ་འབོ་མི་ རྒྱལ་ས་ རོམ་ནང་ཡོད་མི་ ཁྱེད་ག་ར་ལུ་ཨ་ནི་ཡི་གུ་འདི་འབྲི་དོ་ ང་བཅས་ཀྱི་ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱིས་ཞི་བདེ་དང་ཐུགས་རྗེ་ ཁྱེད་ག་ར་ལུ་གནང་བཅུག།
པའུལ་ རོམ་ལུ་འགྱོ་དགོ་མནོ་བའི་རེ་བ་གི་སྐོར།
8འགོ་དང་པ་རང་ ཡེ་ཤུ་ཁིརཱིས་ལས་རྒྱུད་དེ་ ངེ་གི་དཀོན་མཆོག་ལུ་ ཁྱེད་ག་ར་གི་དོན་ལུ་བཀའ་དྲིན་ཆེ་ཟེར་ཞུ་ནི་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱིས་ཁིརཱིས་ལུ་དད་པ་བསྐྱེད་ཅི་ཟེར་ འཛམ་བུ་གླིང་གི་ས་ཆ་ག་ར་ནང་ཁྱབ་སྟེ་ཡོད། 9དཀོན་མཆོག་གི་སྲས་ཀྱི་སྐོར་ལས་ གཏམ་བཟང་དེ་གཞན་ལུ་བཤད་པའི་རྒྱུད་ལས་སྦེ་ ངེ་གི་སེམས་ཀྱི་གདིང་ལས་ར་ཕྱག་ཞུ་མི་དཀོན་མཆོག་ལུ་ འཛོམ་དཔང་སྦེ་བཙུགས་ཏེ་ ང་གིས་རྟག་བུ་ར་ཁྱེད་ཀྱི་དོན་ལུ་སྨོན་ལམ་ཞུཝ་ཨིན། 10ང་གིས་དུས་རྟག་བུ་གི་སྨོན་ལམ་ནང་ དཀོན་མཆོག་གི་ཐུགས་དགོངས་ལས་སྦེ་ ཉིནམ་གཅིག་གི་ཚེ་ང་ཁྱེད་སྡོད་ས་ ག་དེ་འབད་རུང་འོང་ནིའི་གོ་སྐབས་ ཐོབ་བཅུག་ཟེར་ཞུཝ་ཨིན། 11ག་ཅི་སྨོ་ཟེར་བ་ཅིན་ ཁྱེད་དད་པ་ནང་སྒྲིང་སྒྲིང་བཟོ་ནི་གི་དོན་ལུ་ ཐུགས་ཉིད་ཀྱི་གསོལ་རས་ལ་ལུ་ཅིག་ ཁྱེད་དང་བགོ་བཤའ་བརྐྱབ་ནི་སྦེ་ ཁྱེད་སྡོད་ས་འོང་ནི་གི་རེ་བ་སྦོམ་ང་ལུ་ཡོད། 12འདི་ག་དེ་སྦེ་ཨིན་ན་ཟེར་བ་ཅིན་ ང་ཁྱེད་སྡོད་ས་འོངམ་ད་ ང་བཅས་གཅིག་གིས་གཅིག་ལུ་ སེམས་ཤུགས་བྱིན་ཏེ་དད་པ་སྒྲིང་སྒྲིང་བཟོ་ནིའི་རེ་བ་ཡོད།
13སྤུན་ཆ་ཚུ་ ང་གིས་ཁྱེད་ལུ་ཤེས་བཅུག་དགོ་པའི་བློ་གཅིག་ཡོད་ དེ་ག་ཅི་སྨོ་ཟེར་བ་ཅིན་ ང་ཁྱེད་སྡོད་ས་ལུ་འོང་ནིའི་དོན་ལུ་ ཚར་ལེ་ཤ་རང་གནས་སྐབས་བསྒྱིར་ཡི་ དེ་འབདཝ་ད་ ཚར་གཅིག་ཡང་ ཚགས་ཁར་ཚུད་མ་ཚུགས་ ང་ཁྱེད་སྡོད་ས་ལུ་འོང་དགོ་མནོ་མི་དོན་དག་དེ་ ང་གིས་ཧེ་མ་ ཕྱིའི་མི་རིགས་ཚུ་ལུ་ དཀོན་མཆོག་ལུ་དད་པ་བསྐྱེད་བཅུག་དོཝ་བཟུམ་སྦེ་ ཁྱེད་ རོམ་ལུ་སྡོད་མི་ཆ་ཁྱབ་ཀྱི་གྲལ་ལས་ཡང་ དད་པ་བསྐྱེད་བཅུག་ནི་དོན་ལུ་ཨིན། 14རིགས་བཟངམ་དང་ རིགས་ཞནམ་འབད་རུང་འདྲ་ ཡོན་ཏན་ཡོད་མི་དང་ མེད་མི་ཚུ་འབད་རུང་འདྲ་#༡:༡༤། lit. Greeks and barbarians; wise and foolish ཁོང་ག་ར་ལུ་ཆོས་བཤད་ནི་གི་འགན་ཁག་དེ་ང་གིས་འབག་དགོ། 15འདི་གི་དོན་ལས་སྦེ་ཁྱེད་ རོམ་ནང་སྡོད་མི་ཚུ་ལུ་ཡང་ ང་གིས་ག་དེ་དྲག་དྲག་གཏམ་བཟང་བཤད་པ་འོང་དགོ་མནོ་ཡི།།
དད་པ་གི་རྒྱུད་ལས་སྦེ་སྡོདཔ་ཨིན་པའི་སྐོར།
16ག་ཅི་སྨོ་ཟེར་བ་ཅིན་ དད་པ་བསྐྱེད་མིའི་ མི་ཆ་མཉམ་ འགོ་དང་པ་ ཡ་ཧུ་ད་པ་ཚུ་གི་དོན་ལུ་དང་ ཕྱིའི་མི་རིགས་ཚུ་ལུ་ དཀོན་མཆོག་གིས་སྐྱབས་མཛད་ནི་གི་དབང་ཆེ་ཤོས་འདི་ ཨ་ནི་གཏམ་བཟང་འདི་ཨིན་ འདི་ལུ་ང་གིས་ངོ་མ་ཚ་བར་བཤདཔ་ཨིན། 17ཨ་ནི་གཏམ་བཟང་གི་རྒྱུད་ལས་ དཀོན་མཆོག་གིས་ ཁོ་རའི་ཐུགས་དང་ལྡན་པའི་ མི་ཕྲངམ་སྦེ་མཛད་ནི་ལམ་སྟོན་གནངམ་ཨིན་ ཨ་ནི་ལམ་འདི་ འགོ་དང་པ་ལས་མཐའན་མཇུག་ཚུན་ཚོད་རང་ དད་པ་ལས་བརྟེན་ཏེ་ཨིན་ དམ་པའི་གསུང་རབ་ནང་།
ཆོས་སེམས་ཡོད་མི་དེ་ དད་པ་ལས་བརྟེན་ཏེ་ སྡོདཔ་ཨིན་ཟེར་བྲིས་ཏེ་འདུག།#༡:༡༧། ཧ་བ་ཀུཀ་ ༢:༤།
སྤྱོད་པ་ངན་པ་གི་ཐོག་ལས་བདེན་པ་ལུ་མནན་བཞག་པའི་སྐོར།
18-19དེ་འབདཝ་ད་ དཀོན་མཆོག་གི་སྐོར་ལས་ མི་སྡིག་ཅན་ཚུ་གིས་ཤེས་དགོ་མི་འདི་ཚུ་ དཀོན་མཆོག་གིས་ཁོང་ལུ་སྟོན་གནང་སྟེ་ མི་སྡིག་ཅན་ཚུ་གིས་ལེགས་ཤོམ་སྦེ་ཤེས་རུང་ སྡིག་པ་དང་སྤྱོད་པ་ངན་པ་གི་རྒྱུད་ལས་སྦེ་ བདེན་པ་ལུ་མནན་བཞག་ནུག་ དེ་འབདཝ་ལས་ ཞིང་ཁམས་ལས་ དཀོན་མཆོག་གིས་ཁོང་ལུ་ དགོངསམ་ཁྲེལ་ཏེ་ཆདཔ་གནངམ་ཨིན། 20དཀོན་མཆོག་ཁོ་རང་གིས་ འཇིག་རྟེན་མཛད་ཚར་བའི་ཤུལ་ལས་ ཁོ་གི་མཐའ་མེད་པའི་མཐུ་སྟོབས་དང་ ཁོ་ག་ར་ལས་མཐོ་ཤོས་ཅིག་ཨིན་ཟེར་ མངོན་གསུམ་དུ་མཐོང་ནུག་ ག་ཅི་སྨོ་ཟེར་བ་ཅིན་ དཀོན་མཆོག་གིས་མཛད་མི་ལུ་བལྟཝ་ད་ ཁོ་གི་རང་བཞིན་གྱི་སྐོར་ལས་ ཧིང་སངས་ས་སྦེ་ཧ་གོ་ཚུགས་ འདི་ལས་སྦེ་ དཀོན་མཆོག་དང་གཞན་འབྲེལ་མེད་ཟེར་ཧད་འཕུལ་ཏེ་སླབ་མི་ཚུགས། 21ཁོང་གིས་དཀོན་མཆོག་ལུ་ངོ་ཤེས་རུང་ ཁོ་ལུ་དཀོན་མཆོག་སྦེ་མ་བརྩིས་པར་ བཀའ་དྲིན་ཆེ་ཟེར་ཡང་མ་ཞུ་ དེ་ལས་ཁོང་གི་མནོ་བསམ་འདི་ཕར་ཕར་རང་ ཁུངས་མེད་པའི་རྩ་རྒས་ཀྱི་མནོ་བསམ་གཏང་སྟེ་ ཁོང་གི་སེམས་གནག་དུང་དུ་འགྱུར་ཏེ་ལུས་ནུག 22ཁོང་རང་གིས་འབད་བ་ཅིན་ མཁས་པ་འཐོན་ནི་གི་རྩིས་ཨིན་མས་ དེ་འབདཝ་ད་ ག་ནི་ཡང་མ་ཤེས་པར་ ཕར་ཕར་རང་རྩ་རྒས་ལུ་འགྱུར་ནུག 23གཟི་བརྗིད་དང་ལྡན་པའི་ འཁྲུང་ནི་དང་གཤགས་ནི་མེད་པའི་དཀོན་མཆོག་ལུ་དད་པ་མ་བསྐྱེད་པར་ ཁོང་གིས་ འཆི་བ་མྱོང་པའི་ མི་གི་སྐུ་འདྲ་ ཡང་ན་བྱ་བྱིའུ་ དུད་འགྲོ་སེམས་ཅན་ སྦུལ་ལ་སོགས་པའི་སྐུ་འདྲ་ ལྷམ་པ་མ་གཅིགཔ་ལེ་ཤ་བཟོ་སྟེ་ འདི་ཚུ་ལུ་དད་པ་སྐྱེདཔ་ཨིན་མས། 24དེ་གི་དོན་ལས་ ཁོང་ཕོ་རྒྱ་དང་ཨམ་སྲུ་ རང་གི་གཟུགས་བློ་བཙོང་ནིའི་མར་རབས་ཀྱི་སྤྱོད་པ་ ག་འབད་དགོ་མནོ་མིའི་འདོད་ཆགས་ཚུ་ དཀོན་མཆོག་གིས་འབད་བཅུག་ནུག 25ག་ཅི་སྨོ་ཟེར་བ་ཅིན་ དཀོན་མཆོག་གི་བདེན་པ་ལུ་ ཁོང་གིས་རྫུས་མ་དང་སོརཝ་མ་ཚད་ གནམ་དང་ས་མཛད་མི་དཀོན་མཆོག་ལུ་སྤངས་ཏེ་ ཁོ་གིས་མཛད་མི་ཚུ་ལུ་དད་པ་བསྐྱེདཔ་ཨིན་མས་ དེ་འབདཝ་ད་ དཀོན་མཆོག་དེ་དུས་རྟག་བུ་ར་བསྟོདཔ་ཕུལ་དགོ་མི་གཅིག་ཨིན་ ཨ་མཱེན། 26དེ་གིས་འབད་ དཀོན་མཆོག་གིས་ཁོང་ལུ་ བློ་བཙོང་ནིའི་ལཱ་རང་འབད་བཅུག་ནུག་ ཨམ་སྲུ་ཚུ་གིས་ཡང་ཕོ་རྒྱ་དང་འབྲེལ་བ་འཐབ་ནི་བཞག་སྟེ་ ཁོང་རའི་ནང་འཁོད་ནང་ལུས་འབྲེལ་འབད་ནུག 27འདི་བཟུམ་སྦེ་ མི་ཕོ་རྒྱ་ཚུ་གིས་ཡང་ ཨམ་སྲུ་ཚུ་དང་གཅིག་ཁར་ལུས་འབྲེལ་འབད་ནི་བཞག་སྟེ་ ཁོང་རང་གཅིག་གིས་གཅིག་ལུ་འདོད་ཆགས་བསྐྱེད་དེ་ ངོ་ཚ་སི་སིའི་ལཱ་ངན་པ་དེ་ཚུ་འབད་ནུག་ དེ་ལས་རང་གིས་འབད་མི་འཛོལ་བ་ལས་བརྟེན་ཏེ་ ཁོང་ལུ་ཆདཔ་ཕོག་སྟེ་སྡུག་བསྔལ་མྱོང་ནུག 28དཀོན་མཆོག་ལུ་ངོ་ཤེས་དགོ་མནོ་བའི་སེམས་ ཁོང་ལུ་མེདཔ་ལས་བརྟེན་ཏེ་ ཁོང་གིས་འབད་མ་བཏུབ་པའི་ལཱ་ཚུ་འབད་མི་སྦེ་ དཀོན་མཆོག་གིས་ཁོང་གི་མནོ་བསམ་དེ་ཚུ་ གོ་མ་ཆོདཔ་མཛད་དེ་བཞག་ནུག#༡:༢༨། lit. depraved mind 29ཁོང་གི་སེམས་ཁར་ལུ་སྡིག་པའི་རིགས་ མ་འདྲཝ་ལེ་ཤ་དང་ ངན་སེམས་དང་ འདོད་པ་ཆེ་དྲགས་དང་ གནོད་སེམས་བསྐྱེད་ནི་དང་ ཕྲག་དོག་བསྐྱེད་ནི་དང་ མི་གསད་ནི་དང་ འཐབ་རྒྱགས་འབད་ནི་དང་ མགུ་བསྐོར་བརྐྱབ་ནི་དང་ ཞན་སེམས་བསྐྱེད་ནི་དང་ དཀྲོགས་ཁ་རྐྱབས་ནི་དང་། 30འཕྱ་ཁ་གཏང་ནི་དང་ དཀོན་མཆོག་ལུ་ངོ་རྒོལ་འབད་ནི་དང་ ཞེ་ས་འབད་མ་བཏུབ་ནི་དང་ ཁམས་བཙོང་ནི་དང་ རང་བསྟོད་བརྐྱབ་ནི་དང་ ལཱ་ངན་པའི་ཐབས་ཤེས་འགྲིགས་ནི་དང་ ཕམ་གྱི་ཁ་ལུ་མ་ཉན་ནི་དང་། 31ཤེས་མཐོང་རུང་མ་ཤེསཔ་བཟོ་ནི་དང་ རང་གི་ཁ་ཚིག་འཇལ་ཚར་མི་ལུ་མ་འབད་ནི་ དེ་ལས་བྱམས་སེམས་མེད་མི་ སྙིང་རྗེ་མེད་མི་ འདི་བཟུམ་གྱི་ལཱ་ལེ་ཤ་གིས་གང་སྟེ་སྡོད་ནུག 32དཀོན་མཆོག་གི་བཀའ་ནང་ ཨ་ནི་བཟུམ་གྱི་མི་ཚུ་ཤི་བ་ཅིན་ཀྲིག་ཀྲི་རང་ཨིན་ཟེར་མི་འདི་ ཁོང་གིས་ཤེས་མཐོང་སྟེ་འབད་རུང་ ཨ་ནི་བཟུམ་གྱི་ལཱ་འབདཝ་ཨིནམ་མ་ཚད་ ད་རུང་འདི་བཟུམ་གྱི་ལཱ་འབད་མི་ གཞན་ཚུ་གི་ཁ་ཐུག་བཅརཝ་ཨིན།།
© 2012, Wycliffe Bible Translators, Inc. All rights reserved