Lo kila gəl ne 6

Kɔr ta neje gə misa̰ gə dɔngɔr gə ꞌto, gə bəngə ji rɛ̰ ta-je

1Ngaɓa m-a lo ɗaa m-o, lo gə Ngon badəm ɔr bəngə ji dɔngɔr to kəne horo nje gə siri gə ɗaa, m-o ndu dɔngɔr nekunda gə aw kəm baa horo nje gə sɔɔ gə le, pa gə ndu-e gə ɓar wəəl to gə nji gə ndangə be na: ꞌƊe. 2Ngaɓa m-o kunda gə nda kara. Ye gə al-ɛ le uwa kondoro ji-a gə; d-ar-ɛ jɔgə kara ngaɓa n-ɔdə n-aw gə nje cɛdə ɗɔ mba cɛdə ɗɔ.

3Lo gə n-ɔr ta bəngə ji gə njekum gə joo ɗaa, m-o ndu nekunda gə aw kəm baa gə njekum gə joo pa na: ꞌƊe! 4Cibi kunda gə ɗangə kara kasə ta naa gə pər be ce. Ye gə gə al-ɛ le d-ar-ɛ singa kar tuji ɗɛgɛgɛ gə dɔ nangə gə, mba kar dəwje ꞌtɔl naa gə yo gə nee; ɗaa kiya bayi gə boy ja d-ula ji-a gə.

5Logə n-ɔr ta bəngə ji gə njekum gə munda ɗaa, m-o ndu nekunda gə aw kəm baa gə njekum gə munda pa na: ꞌƊe! Ngaɓa m-o ɗaa to gə kunda gə ndul. Ye gə njekal-ɛ uwa nekɔji kɔy lə ne ji-a gə. 6Ɗaa ne ur mbi-m gə ta naa gə ndu be, horo nekundaje gə sɔɔ gə d-aw kəm baa, pa na: ngo waa kara kəm sulay kara, ngaɓa ngo mugay munda kəm sulay kara, kar ubu je gə kodo le, ꞌɗa-je məyɛr ang.

7Lo gə n-ɔr ta ne gə bəngə ji gə njekum gə sɔɔ to kəne ɗaa, m-o ndu nekunda gə aw kəm baa gə njekum gə sɔɔ pa na: ꞌƊe! 8Ɗaa, a o, m-o kunda gə ndul juma to gə mbi kam be. Dəw gə al-ɛ le ri-a na Yo, ɗaa lo gə jabaw dan go-e. Dəbə nangə gə sɔɔ le d-ar-je singamongə dɔ dəb-e gə kara gə mba kar ꞌtɔl dəwje kəne gə kiya bayi nəm, gə ɓo bo nəm, gə yo ngaɓa gə daje gə dɔ nangə gə nee nəm tɔ.

9Lo gə n-ɔr ta bəngə ji gə njekum gə mi ɗaa, m-a lo gə gəl no kɔgə ɗaa m-o kəm lə nje gə ꞌtɔl-je gə nekunja məsə mba tar lə Luba ngaɓa gə mba tar naji lə-je tɔ. 10D-uru ꞌkuwi gə ndu-je gə boy na: Saar ndɔ gə ɗa gə ja ɓa, ꞌɓəə neje, njerɔsangə gə dəw gə gadə-gadə, saar ndɔ gə ɗa gə ja ɓa kur-i a kəw gə mba kar-i ꞌgangə tar, gə ꞌdal ba̰a̰ məsə-sije dɔ dəwje gə dɔ nangə gə nee le wa? 11Ɗaa d-ar-je, na-na kara, kubu gə ngal yududu gə nda kələw-kələw. Ngaɓa ꞌpa d-ar-je kar d-uwa kɔr-je dɔ kar njɛ̰ be, saar gə mba kar nje baa kulaje lə-je, gə ngan ko̰-sijee gə d-a tɔl-je to gə ꞌjejee be tɔ le, d-udu ta-je bugum ɓa.

12Ɗaa m-a lo m-o, lo gə ngon badəm ɔr ta bəngə ji gə njekum gə misa̰ ɗaa, dɔ nangə ye to gə boy ngaɓa kar təl ndul njudə-njudə to gə kubu kuwa ndoo be, ngaɓa nay kara təl to gə məsə be ja tɔ̰y. 13Ɗaa ndɛ̰ndərɛ̰ndɛ̰je gə dara kara ꞌtoso nangə to gə kagə tungu gə kand-ɛ gə to gə kə̰rə̰-ɛ baa gə̰y nangə lo gə ləl bo yee be. 14Dara ɔr rɔ-ɛ ngərəng gə taar to gə kam mbede be, dɔ ər tɔ̰y gə ngon gore tɔ̰y d-ɔr-je lo kar-je gə gə ɗangə.

15Mbayje gə dɔ nangə gə nee, dəwje gə bo-bo, njekɔr no njeɗɔje, njenekingaje, gə njesingaje, ɓərəje tɔ̰y gə ngan kujije, d-iya rɔ-je bolo ərje gə, gə horo pil ərje gə dɔ ərje gə. 16Ɗaa ꞌpa d-ar dɔ ərje gə mbalje na: ꞌTosoje dɔ-si gə ɓo ꞌiya-je si əw ta kəm ye gə isi dɔ ngəndəng mbay gə, ngaɓa əw gə wungu lə Ngon badəm tɔ. 17Mba ndɔ gə bo gə kar wungu lə-je ɗe ngaa, na ja ɓa a kasə kar taar wa?

Currently Selected:

Lo kila gəl ne 6: lap

Highlight

Copy

Compare